Read Quechua Cuzco Bible 1988 MATEO 8 Bible Online

MATEO 8 - Quechua Cuzco Bible 1988 bible

MATEO 8

¹Orqomanta Jesús uraykamuqtinmi askha runakuna paypa qhepanta rirqanku.

²Chayllamanmi aycha qaranpi millay onqoyniyoq runaqa Jesusman hamuspa ñawpaqenpi qonqoriykukurqan, hinaspan nirqan: —Señor, munanki chayqa atinkin alliyachiwayta, nispa.

³Chaymi Jesusqa makinwan llamiykuspa nirqan: —Munanin, qhali kapuy, nispa. Hinan onqoyninqa kaq rato chinkapurqan.

⁴Jesustaq payta nirqan: —Amapunin pimanpas kaytaqa willankichu, aswanpas sacerdoteman rispa qhawachikamuy, hinaspa Moisespa kamachikusqanman hina ofrendata haywamuy alliyapusqaykita paykuna yachanankupaq, nispa.

⁵Capernaum llaqtaman Jesús haykuqtinmi Roma soldado capitanqa Jesusman asuykuspa rogakurqan:

⁶—Señor, kamachiymi such'uyaspa wasiypi onqoshan sinchi nanayta muchuspa, nispa.

⁷Chaymi Jesusqa nirqan: —Rispaymi qhaliyachimusaq, nispa.

⁸Capitantaq nirqan: —Señor, ¿pitaq ñoqari kani wasiyman haykuykamunaykipaq? Aswanpas rimarillay, kamachiyqa qhaliyallanqan.

⁹Ñoqapas kamachina runan kani, kamachinitaq soldadokunatapas. Huknintan nini: Riy, nispa, hinan rin. Huknintataq nini: Hamuy, nispa, hinan hamun. Kamachiytapas nini: Kayta ruway, nispa, hinan ruwan, nispa.

¹⁰Chayta uyarispanmi Jesusqa muspharqan, hinaspan qhepan riqkunata nirqan: —Cheqaqtan niykichis, manapunin Israel runakunapipas mayqentapas kay hina iñiyniyoq runataqa tarirqanichu.

¹¹Niykichismi askhan tukuy hinantinmanta hamunqaku, hinaspan Diospa kamachikushasqanpi tiyaykunqaku Abrahamwan, Isaacwan, Jacobpiwan.

¹²“Diospa kamachikushasqanpin kashani” niqkunataq ichaqa laqhayaqman qarqosqa kanqaku. Chaypin waqanqaku, kirunkutapas k'achachachanqaku, nispa.

¹³Hinaspan Jesusqa capitanta nirqan: —Kutipuy, iñisqaykiman hina ruwasqa kachun, nispa. Chay kamachintaq kaq rato qhaliyarqapurqan.

¹⁴Chaymantataq Jesusqa Pedroq wasinman haykuspa Pedroq suegranta tarirqan fiebrewan puñunapi onqoshaqta.

¹⁵Hinaspan makinta llamiykuqtin fiebre onqoyqa thanirqapurqan, hinan warmiqa hatarispa paykunaman mikhunata haywarqan.

¹⁶Ch'isiyaykuytañataq Jesusman pusamurqanku supaykunaq ñak'arichisqan askha runakunata, hinan Jesusqa rimarispalla supaykunata qarqorqan, llapan onqosqakunatapas qhaliyachirqan.

¹⁷Chay hinapin profeta*f** Isaiaspa nisqanqa hunt'akurqan. Isaiasmi nisqa: Pay kikinmi onqoyninchiskunamanta qhaliyachiwarqanchis, nanayninchiskunatapas qechuwarqanchis, nispa.

¹⁸Jesusqa muyuriqninpi askha runakunata rikuspanmi yachachisqankunata kamachirqan qochanta chimpanankupaq.

¹⁹Chay raton kamachikuy simita yachachiqqa payman asuykuspa nirqan: —Yachachikuq, maytaña riqtiykipas qhepaykitan risaq, nispa.

²⁰Chaymi Jesusqa nirqan: —Atoqkunapas t'oqoyoqmi, phalaq animalkunapas q'esayoqmi, Diospa Kachamusqan Runaqmi ichaqa mana kanchu maypi puñuykunallanpas, nispa.

²¹Hinan hukkaq yachachisqanqa payta nirqan: —Señorníy, simiykimanta risaq, taytay wañuqtin p'ampaykamuq, nispa.

²²Jesustaq nirqan: —Qhepayta hamuy, hina wañusqakunaqa ayankuta p'ampamuchunku, nispa.

²³Chaymantataq Jesusqa boteman haykuspa yachachisqankunapiwan rirqan.

²⁴Chayllamanmi sinchi wayra qochapi hatarirqan, unuq phoqchiqeynintaq boteman hunt'aykusharqanña, Jesustaq ichaqa puñusharqan.

²⁵Hinaqtinmi yachachisqankunaqa Jesusman asuykuspa rikch'achirqanku: —¡Señor, qespichiwayku, chinkaykapushanchisñan! nispanku.

²⁶Hinan Jesusqa paykunata nirqan: —¡Pisi iñiyniyoq runakuna! ¿Imanaqtinmi mancharikushankichis? nispa. Chaymi sayarispa wayratapas qochatapas phiñarikurqan, chay hinapin t'ak-nisqa kapurqan.

²⁷Hinan paykunaqa musphaspa ninakurqanku: —¿Pitaq kay runari, chaytaq wayrapas qochapas kasun? nispanku.

²⁸Qocha chimpapi Gádara runakunaq hallp'anmanmi Jesusqa chayarqan, chayllamanmi panteonmanta lloqsimurqanku supaykunaq ñak'arichisqan iskay runakuna, paykunaqa sinchi phiñan karqanku, manañan pillapas chay ñannintaqa purirqanchu. Paykunan Jesusman qayllaykurqanku.

²⁹Hinaspan qaparirqanku: —Diospa Churin Jesús, ¿iman ñoqaykuwan ruwanayki? ¿Manaraq tiemponpichu ñak'arichiqniyku hamunki? nispanku.

³⁰Qayllankupitaq t'aqantin askha khuchikuna mikhurasharqanku.

³¹Chaymi supaykunaqa Jesusta rogakurqanku: —Qarqowaspaykikuqa haqay khuchikunaman haykuchiwayku, nispa.

³²Jesustaq paykunata nirqan: —Riychisyá, nispa. Hinan lloqsispanku chay t'aqantin khuchikunaman haykurqanku, t'aqantin llapa khuchikunataq qaqa patanta qochaman phawaykuspa unupi wañurqanku.

³³Chaymi khuchi michiqkunaqa ayqerqanku, llaqtaman rispataq lliwta willakurqanku imachus supaypa ñak'arichisqan runakunawan sucedesqanta.

³⁴Hinan llaqtallantin lloqsimurqanku Jesuswan tupaq, payta rikuspataq rogakurqanku llaqtankumanta ripunanpaq.