Read Quechua Cuzco Bible 1988 MATEO 9 Bible Online

MATEO 9 - Quechua Cuzco Bible 1988 bible

MATEO 9

¹Chaymantataq Jesusqa boteman haykuspa qochanta chimparqan, hinaspan llaqtanman chayarqan.

²Jesusmanmi wantumurqanku mana kuyuriy atiq such'uta, hinan Jesusqa Diospi iñisqankuta reparaspa, chay such'uta nirqan: —Churíy, kallpachakuy, huchaykikunatan pampachayki, nispa.

³Chaymi kamachikuy simita yachachiqkunamanta wakinqa sonqonkupi nirqanku: —Kay runaqa Diostan pisichashan, nispanku.

⁴Jesustaq paykunaq yuyaykusqankuta yachaspa nirqan: — ¿Imanaqtintaq sonqoykichispi mana allinta yuyaykushankichis?

⁵¿Mayqentaq atikun: Huchaykikunatan pampachayki, niychu, icha: Sayarispa puriy, niytaqchu?

⁶Ñoqaqa Diospa Kachamusqan Runan kani, chaymi kay pachapi huchakunata pampachanaypaq atiyniyoq kasqayta yachanaykichispaq kay such'uta nisaq: —Sayariy, puñunaykita hoqarispa wasiykita ripuy, nispa.

⁷Hinan such'uqa wasinta ripurqan.

⁸Runakunataq chayta rikuspa muspharqanku, hinaspan Diosta hatuncharqanku, runakunaman chay hina atiyta qosqanmanta.

⁹Chaymanta rishaspataq Jesusqa Mateo sutiyoq runata rikurqan contribución cobrana wasipi sisata cobrashaqta. Hinaspan nirqan: —Qhepayta hamuy, nispa. Hinan Mateoqa sayarispa qhepanta rirqan.

¹⁰Chaymantataq Jesusqa Mateoq wasinpi mikhunanpaq tiyashaqtin, contribución cobraq askha runakuna, huchasapamanta qhawasqakuna hamuspa Jesuswan yachachisqankunapiwan kuska tiyaykurqanku.

¹¹Chayta rikuspan fariseokunaqa*f** Jesuspa yachachisqankunata nirqanku: —¿Imanaqtinmi yachachiqniykichisqa contribución cobraqkunawan, huchasapakunapiwan mikhun? nispanku.

¹²Jesustaq chayta uyarispa paykunata nisqan: —Qhalikunaqa manan hampiqta necesitankuchu, aswanpas onqosqakunallan necesitanku.

¹³Riychisyá, hinaspa kayta yachamuychis. Diosmi nin: Khuyapayakuq kanaykichistan munani, manan sacrificio haywawanaykichistachu munani, nispa. Ñoqaqa manan chanin runakunata waqyaqchu hamuni, aswanpas huchasapakunata waqyaqmi hamuni, nispa.

¹⁴Bautizaq Juanpa yachachisqankunan Jesusman qayllaykuspa tapurqanku: —Ñoqaykupas fariseokunapas*f** ayunaykun, ¿imanaqtintaq yachachisqaykikunari mana ayunankuchu? nispa.

¹⁵Chaymi Jesusqa paykunata nirqan: —¿Casamientoman invitasqakunaqa noviowan kuska kashaspa llakikunkumanchu? Manan. Ichaqa chayamunqan p'unchaykuna, noviota aparqoqtinkun ayunanqaku, nispa.

¹⁶Manan pipas mawk'a p'achamanqa mosoq telawan remiendanchu, chay hina kaqtinqa mosoq tela remiendon q'estispa mawk'akaqta astawan llik'inqa.

¹⁷Manataqmi pipas upi vinotaqa mawk'a qara odrekunaman hillp'unchu, chay hina kaqtinqa qara odrekunatachá poqospa phatachinqa, vinotaq hich'akunqa, qara odrekunapas llik'ikapunqan, aswanmi upi vinotaqa mosoq qara odrekunaman hillp'unku, chaymi vinopas mana usunqachu, odrepas mana llik'ikunqachu, nispa.

¹⁸Chaykunata Jesús paykunaman nishallaqtinraqmi, Judío runakunaq huknin umalli payman hamurqan, qonqoriykukuspataq nirqan: —Ususiymi kunallanraq wañurqapun, ama hinachu kay, payta llamiykampuway kawsarinanpaq, nispa.

¹⁹Chaymi Jesusqa yachachisqankunapiwan paypa qhepanta rirqan.

²⁰Huk warmin chunka iskayniyoq wataña yawar apaywan onqosharqan. Paymi sonqonpi nirqan: —Jesuspa p'achallantapas llamiykuspayqa qhaliyasaqpunin, nispa. Hinaspan Jesuspa qhepanta asuykuspa p'achanpa ch'ullpanta llamiykurqan.

²²Jesustaq ichaqa warmiman kutirispa nirqan: —Ususíy, kallpachakuy, iñiyniykin qhaliyachisunki, nispa. Hinan warmiqa kaq rato qhaliyarqapurqan.

²³Jesustaq uma runaq wasinman chayaspa, wañuchikuqpapi qenata tocapakuqkunata qaparkachaqkunatawan rikuspa

²⁴nirqan: —Lloqsiychis, sipasqa manan wañunchu, puñushallanmi, nispa. Hinaqtinmi runakunaqa Jesusta asipayarqanku.

²⁵Runakunata qarqospataq Jesusqa wasiman haykuspa makinmanta sipasta hap'iykurqan, hinan sipasqa hatarirqan.

²⁶Chaymi Jesuspa chay ruwasqankunata lliw chay cheqaskunapi yacharqanku.

²⁷Chaymanta Jesús rishaqtinmi, iskay ñawsakuna waqyakuspa payta qatipakurqanku: —¡Rey Davidpa miraynin, khuyapayaykuwayku! nispanku.

²⁸Wasiman Jesús haykuqtintaq chay ñawsakunaqa payman asuykurqanku, hinan Jesusqa paykunata nirqan: —¿Iñinkichischu kay mañakusqaykichis ruwanayta? nispa. Paykunataq: —Arí, wiraqochayku, nirqanku.

²⁹Chaymi ñawinkuta llamiykurqan: —Iñisqaykichisman hina ruwasqa kachun, nispa.

³⁰Ñawinkutaq kicharikapurqan. Hinan Jesusqa allin-allinta paykunata kamachirqan: —Aman kaytaqa pimanpas willankichischu, nispa.

³¹Paykunataq ichaqa lloqsispa hina Jesuspa lliw ruwasqankunata chay cheqaskunapi willakurqanku.

³²Ñawsa kashaspa qhaliyaq runakuna lloqsishaqtinkutaq supaypa ñak'arichisqan upa runata Jesusman pusamurqanku.

³³Supayta Jesús qarqoqtintaq upaqa rimarirqan, chaymi runakunaqa musphaspa nirqanku: —Manan hayk'aqpas Israel suyupi kay hinataqa rikurqanchischu, nispa.

³⁴Fariseokunataq*f** ichaqa nirqanku: —Kay runaqa supaykuna kamachiqpa atiyninwanmi supaykunata qarqon, nispa.

³⁵Jesusqa llapan llaqtakunata ayllukunatawanmi purirqan, Diosmanta yachachina wasinkupi yachachispa, Diospa kamachikuq kananmanta allin willakuykunata willaspa, imaymana onqoyniyoq nanayniyoq runakunata qhaliyachispa.

³⁶Chaypin Jesusqa runakunata rikurqan mana michiqniyoq ovejakunata hina llaksasqata qatirparisqata, chaymi paykunata khuyapayarqan.

³⁷Hinaspanmi yachachisqankunata nirqan: —Cosechanaqa askhapunin, llank'aqkunataq ichaqa pisilla.

³⁸Chayrayku chakrayoqta valekuychis cosechanman llank'aqkunata kachamunanpaq, nispa.