Read Quechua Cuzco Bible 1988 MARCOS 1 Bible Online

MARCOS 1 - Quechua Cuzco Bible 1988 bible

MARCOS 1

¹Kay hinatan Diospa Churin Jesucristomanta allin willakuykunaqa qallarirqan:

²Profeta*f** Isaiasmi qelqarqan: Willaqniytan ñawpaqeykita kachani, paymi ñanta hamunaykipaq allichanqa.

³Ch'inneqpin huk runa waqyakun: —¡Allichaychis Señor Diospa ñanninta! ¡Cheqanyachiychis purinankunata! nispan, nispa.

⁴Chaymi bautizaq Juanqa ch'inneqpi kasharqan, hinaspan willakurqan: —Huchaykichista saqepuspa Diosman kutirikuychis, hinaspa bautizachikuychis huchaykichis pampachasqa kananpaq, nispa.

⁵Hinan lliw Judea provinciamanta, Jerusalén llaqtamanta kaqkunapiwan payta uyariq rirqanku, hinaspan huchankuta willakuspa Jordán mayupi llapanku paywan bautizachikurqanku.

⁶Juantaq camello millmamanta ruwasqa p'achawan p'achasqa, qara chumpiwan chumpiykusqa karqan, langostata, wanqoyru misk'itawantaq mikhuq.

⁷Runakunamanmi willarqan: —Qhepaytan hamushan ñoqamanta aswan atiyniyoq, paypa usut'a watullantapas k'umuykuspa manan ñoqaqa paskanaypaq hinachu kani.

⁸Ñoqaqa unuwanmi bautizarqaykichis, paymi ichaqa Santo Espirituwan bautizasunkichis, nispa.

⁹Chay p'unchaykunapin Galilea provinciapi Nazaret llaqtamanta Jesusqa hamurqan, hinan Jordán mayupi Juanqa payta bautizarqan.

¹⁰Unumanta lloqsimuspan hinataq Jesusqa rikurqan hanaq pachata kicharikushaqta, Santo Espiritutapas urpita hina payman uraykamushaqta.

¹¹Hinan hanaq pachamanta nimurqan: —Qanmi munasqay Churiy kanki, qanmi anchata kusichiwanki, nispa.

¹²Hinamantataq Diospa Espiritunqa Jesusta ch'inneqman pusarikurqan.

¹³Chay ch'inneqpin tawa chunka p'unchay kamurqan Satanaspa wateqasqan. Phiña animalkunaq kasqanpin kasharqan, angelkunataq payta servisharqanku.

¹⁴Juanta carcelman wisq'asqanku qhepatataq Jesusqa Galilea provinciaman rispa Diosmanta allin willakuykunata willarqan:

¹⁵—Tiempoqa chayarqamunñan, kunanqa Diosmi kamachikunqa, chayrayku huchaykichista saqepuspa Diosman kutirikuychis, Diosmanta allin willakuykunapitaq iñiychis, nispa.

¹⁶Galilea qocha patanta rishaspataq Jesusqa rikurqan Simonta wawqen Andrestawan. Paykunaqa challwaqkunan karqanku, chaymi challwana llikata qochaman wikch'uykusharqanku.

¹⁷Hinan Jesusqa paykunata nirqan: —Qhepayta hamuychis, runakunata Diosman pusamuytan yachachisqaykichis, nispa.

¹⁸Llikankuta saqespanku hinataq paywan ripurqanku.

¹⁹Chaymanta chhikantawan ñawpaqman rispataq Jesusqa rikurqan Zebedeoq churinkuna Jacobota Juantawan, paykunan botepi llikakunata allichasharqanku.

²⁰Hinan paykunatapas waqyarqan paywan ripunankupaq. Taytanku Zebedeota llank'aqkunatawan botepi saqespataq paypa qhepanta ripurqanku.

²¹Chaymantataq Capernaum llaqtaman haykurqanku, samana p'unchay chayamuqtintaq Jesusqa Diosmanta yachachina wasiman haykuspa yachachirqan.

²²Paymi atiywanpuni yachachirqan, manataq kamachikuy simita yachachiqkuna hinachu, chaymi runakunaqa yachachisqanmanta muspharqanku.

²³Diosmanta yachachina wasipitaq supaypa ñak'arichisqan runa kasharqan, paymi qaparirqan:

²⁴—¡Waw! Nazaret llaqtayoq Jesús, ¿imataq ñoqaykuwan ruwanayki? ¿Tukuwaqniykuchu hamunki? Reqsiykin pichus kasqaykita, qanqa Diospa Kachamusqan mana Huchayoqmi kanki, nispa.

²⁵Jesustaq payta phiñarikurqan: —¡Upallay, lloqsiy paymanta! nispa.

²⁶Millay supaytaq chay runata wat'akichirqan, hinaspan sinchita qaparispa paymanta lloqsirqan.

²⁷Chaymi llapanku musphaspa ninakurqanku: —¿Imataq kayri? ¡Wak yachachikuymá kayqa! Millay supaykunata atiywan kamachin, paykunataq kasunku, nispa.

²⁸Galilea provincia muyuriqnintinpitaq Jesusmanta uyarikurqanpacha.

²⁹Diosmanta yachachina wasimanta lloqsispa hinataq, Simonpa Andrespa wasinman Jacobowan Juanpiwan rirqanku.

³⁰Simonpa suegrantaq fiebrewan onqosharqan, hinan paymanta Jesusman willarqanku.

³¹Chaymi Jesusqa asuykuspa makinmanta hap'iykuspa hatarichirqan, fiebretaq thanirqapurqan, hinaspan paykunaman mikhunata haywarqan.

³²Ch'isiyaykuspa inti haykuqtinña Jesusman pusamurqanku llapan onqoyniyoqkunata, supaypa ñak'arichisqankunatawan,

³³punkumantaq llaqtallantin huñukamurqanku.

³⁴Jesustaq askhata imaymana niraq onqoywan onqosqakunata qhaliyachirqan, askha supaykunatapas runakunamanta qarqorqan. Supaykunatataq mana rimarichirqanchu payta reqsisqankurayku.

³⁵Jesusqa tutallamanta hatarispataq, manaraq illarishaqtin lloqsirqan, ch'usaq cheqasman rispataq Diosmanta chaypi mañakurqan.

³⁶Hinan Simonqa paywan kaqkunapiwan Jesusta maskharqanku.

³⁷Tarimuspankutaq nirqanku: —Lliw runan maskhashasunki, nispa.

³⁸Jesustaq nirqan: —Hakuchis qaylla llaqtakunata, chaypipas Diospa siminta willamunaypaq, chaypaqmi kay pachamanqa hamurqani, nispa.

³⁹Hinaspan Galilea provinciantinpi purirqan, Diosmanta yachachinanku wasikunapi willaspa, supaykunatapas runakunamanta qarqospa.

⁴⁰Jesusmanmi aycha qaranpi millay onqoyniyoq runa rogakuspan asuykurqan, qonqoriykukuspataq nirqan: —Munanki chayqa atinkin alliyachiwayta, nispa.

⁴¹Jesustaq payta khuyapayaspa makinwan llamiykurqan: —Munanin, qhali kapuy, nispa.

⁴²Rimariqtin hinataq onqoyninqa chinkapurqan, qhalitaq kapurqan.

⁴³Hinan Jesusqa payta allin-allinta kamachispa kachapurqan,

⁴⁴niykurqantaq: —Qhawariy, aman pimanpas qhaliyachisqayta willankichu, aswanpas rispa sacerdotewan qhawachikamuy, Moisespa kamachikusqanman hina qhaliyasqaykimanta ofrendata haywamuy, chaymi qhaliyasqaykita llapa yachanqaku, nispa.

⁴⁵Paytaq ichaqa ripuspa qhaliyasqa kasqanmanta sinchita willakuyta qallarirqan, chaymi Jesusqa manaña sut'ita mayqen llaqtamanpas haykuyta atiqchu, aswanmi campokunallapiña kaq, hinan tukuyneqmanta payman hamuqku.