Read Quechua Cuzco Bible 1988 MARCOS 10 Bible Online

MARCOS 10 - Quechua Cuzco Bible 1988 bible

MARCOS 10

¹Jesusmi Capernaum llaqtamanta lloqsispa Judea hap'iyman rirqan, hinaspa Jordán mayu inti lloqsimuy ladoman chimparqan. Hinan wakmanta askha runakunaqa payman huñukamurqanku, Jesustaq paykunata yachachirqan imaynan yachachillaqpuni hinata.

²Fariseokunataq*f** asuykamuspa Jesusta wateqanankupaq tapurqanku: —¿Diospa kamachikuyninman hinaqa atikunchu qosaq warminmanta t'aqakuynin? nispa.

³Jesustaq paykunata tapurqan: —¿Imatataq Moisesqa kamachirqasunkichis? nispa.

⁴Fariseokunataq*f** nirqanku: —Moisesqa nirqanmi: Qosaqa t'aqanakuy papelta warminman qospa t'aqakunmanmi, nispa, nispanku.

⁵Jesustaq paykunata nirqan: —Rumi sonqo kasqaykichisraykun chay kamachikuytaqa qelqapurqasunkichis,

⁶kay pachata Dios kamashaspaqa qharita warmitawanmi kamarqan.

⁷Chaymi qhariqa taytanta mamanta saqepuspa warminwan hukllachakapunqa.

⁸Hinaspan iskayninku huk runa hinallaña kanqaku. Chay hinaqa manan iskayñachu kanku, aswanpas hukllañan.

⁹Chayrayku Diospa hukllachasqantaqa ama runaqa t'aqachunchu, nispa.

¹⁰Wasipi kashaspataq yachachisqankunaqa chayllamantataq wakmanta Jesusta tapurqanku.

¹¹Hinan paykunata nirqan: —Pipas warminmanta t'aqakuspa huk warmiwan casarakunman chayqa, ñawpaq warmintan wasanchan.

¹²Kaqllataq warmipas qosanmanta t'aqakuspa huk qhariwan casarakunman chayqa, wasanchanmi, nispa.

¹³Wawakunatan Jesuspa llamiykunanpaq pusamurqanku, yachachisqankunataq pusamuqkunata phiñarikurqanku.

¹⁴Jesustaq ichaqa chayta rikuspa phiñasqa paykunata nirqan: —Wawakunaqa hinalla ñoqaman hamuchunku, ama paykunata hark'aychischu, Diosqa kay wawakuna hina kaq runakunallatan kamachinqa.

¹⁵Cheqaqtan niykichis, wakin runakunaqa wawa hinan Diosta kamachiqninkupaq chaskinku, pipas Diosta mana chay hinata chaskiqqa manapunin Diospa kamachisqanchu kanqa, nispa.

¹⁶Hinaspan wawakunata marq'arikurqan, paykuna pataman makinta churaykuspataq saminchaykurqan.

¹⁷Ñanta Jesús puririshaqtinmi huk runa phawaylla hamurqan, hinaspan paypa ñawpaqenpi qonqoriykukuspa tapuykukurqan: —Allin yachachikuq, ¿imatan ruwasaq wiñay kawsayniyoq kanaypaq? nispa.

¹⁸Jesustaq payta nirqan: —¿Imaraykun “allin” niwanki? Manan pipas kanchu “allinqa”, aswanpas sapan Diosllan.

¹⁹Kamachikuykunataqa yachankin riki: Aman wasanchankichu. Aman pitapas wañuchinkichu. Aman suwakunkichu. Aman llullakuspa tumpankichu. Aman q'otunkichu. Taytaykita mamaykita yupaychanki, nisqata, nispa.

²⁰Hinan payqa Jesusta nirqan: —Yachachikuq, waynacha kasqaymantañan tukuy chaykunataqa hunt'arqani, nispa.

²¹Hinaqtinmi Jesusqa munakuywan qhawaykuspa payta nirqan: —Kanraqmi ruwanayki, phaway tukuy kaqniykita vendemuspa wakchakunaman qomuy, hinan hanaq pachapi qhapaq-kayniyki kanqa. Kutimuspaykitaq qhepayta hamuy, nispa.

²²Paytaq chayta uyarispa khuyay llakisqa ripurqan, askha kaqniyoq kasqanrayku.

²³Hinaqtinmi Jesusqa muyuriqninta qhawarispan yachachisqankunata nirqan: —¡May sasapunin qhapaqkunapaqqa Diosta kamachiqninkupaq chaskiyqa kanqa!

²⁴Hinan yachachisqankunaqa chayta uyarispa muspharqanku. Jesustaq wakmanta paykunata nirqan: —Churillaykuna, ¡may sasapunin Diosta kamachiqpaq chaskiyqa!

²⁵Camello nisqa animalraqmi yawriq ninrin suchuytaqa atinman Diosta kamachiqninpaq qhapaqpa chaskinanmantaqa, nispa.

²⁶Chayta uyarispan sinchita musphaspa tapunakurqanku: —Chhaynaqa, pillañataq qespichisqaqa kanman? nispa.

²⁷Jesustaq paykunata qhawarispa nirqan: —Runakunaqa manan qespikuyta atinmanchu, Diosmi ichaqa qespichiyta atin, Diosqa tukuy imatapas atinmi, nispa.

²⁸Chaymi Pedroqa nirqan: —Ñoqaykuqa lliw imaymanaykuta saqespan qhepaykita hamuyku, nispa.

²⁹Jesustaq nirqan: —Cheqaqtan niykichis, pipas wasintapas, wawqenkunatapas, panankunatapas, taytantapas, mamantapas, wawankunatapas, chakrankunatapas, ñoqarayku Diosmanta allin willakuykunaraykupiwan saqemuqqa,

³⁰qatiykachasqaña kaspapas pachak kutitawanraqmi kay tiempopi chaskinqa wasikunata, wawqekunata, panakunata, mamakunata, wawakunata, chakrakunatapas, qhepa tiempopitaq wiñay kawsayta chaskinqa.

³¹Ichaqa kunan p'unchay askha hatunpaq qhawasqakunan pisipaq qhawasqa kanqaku, kunan p'unchay pisipaq qhawasqakunataq hatunpaq qhawasqa kanqaku.

³²Jerusalén llaqtamanmi wichasharqanku, Jesustaq ñawpaqenkuta risharqan. Yachachisqankunaqa muspharqankun, paykunaq qhepanta riqkunataq manchasqa risharqanku. Hinaqtinmi Jesusqa chunka iskayniyoq yachachisqankunata sapaqman wakmanta pusaspa, imaymana payta sucedenanta willarqan:

³³—Qhawariychis, Jerusalén llaqtamanmi wichashanchis, Diospa Kachamusqan Runaqa*f** sacerdote umallikunaman kamachikuy simita yachachiqkunaman hap'iykachisqan kasaq, hinan wañunaypaq huchachawanqaku, mana Judío runakunamantaq hap'iykachisqa kasaq,

³⁴paykunan asipayawanqaku, suq'aykuwanqaku, thoqaykuwanqaku, wañuchiwanqaku ima. Ichaqa kinsakaq p'unchaypitaq kawsarimpusaq, nispa.

³⁵Hinamantataq Zebedeoq churinkuna Jacobowan Juanwan Jesusman asuykurqanku: —Yachachikuq, ima mañakusqaykutapas uyariwanaykikutapunin munayku, nispanku.

³⁶Chaymi Jesusqa paykunata tapurqan: —¿Imatan qankunapaq ruwanayta munankichis? nispa.

³⁷Paykunataq nirqanku: —Kamachikushaspayki hukniykuta paña ladoykipi, hukniykutataq lloq'e ladoykipi tiyaykachiwayku, nispa.

³⁸Jesustaq paykunata nirqan: —Manan ima mañakusqaykichistapas yachankichischu. ¿Ñoqa hina ñak'ariyta atiwaqchischu? ¿Ñoqa hina wañuytapas atiwaqchischu? nispa.

³⁹Paykunataq nirqanku: —Arí, atisaqkun, nispa. Jesustaq paykunata nirqan: —Arí, ñoqa hinapas ñak'arinkichismi, ñoqa hinapas wañunkichismi,

⁴⁰paña ladoypi lloq'e ladoypi tiyaykunaykichismi ichaqa, mana ñoqaq tiyaykachinaychu, aswanpas pikunapaqchus wakichipusqa kashan chaykunaq tiyaykunanpaqmi, nispa.

⁴¹Chunkantin yachachisqankuna chayta uyarispataq Jacobopaq Juanpaqwan phiñakurqanku.

⁴²Jesustaq paykunata waqyaspa nirqan: —Yachankichismi hatun suyukunapi kamachikuqkunaqa paykuna ukhupi munaychakusqankuta, runakuna ukhupi hatun kaqkunapas atiyniyoq kasqankuta.

⁴³Qankuna ukhupin ichaqa mana chay hinachu kanqa, aswanpas qankuna ukhupi hatun-kayta munaqqa serviqniykichismi kanqa.

⁴⁴Mayqenniykichispas uma kayta munaqqa lliwpa serviqniykichismi kanqa.

⁴⁵Diospa Kachamusqan Runapas*f** manan servichikunaypaqchu hamurqani, aswanpas servinaypaqmi, hinaspa askha runa kacharisqa kananrayku wañunaypaq, nispa.

⁴⁶Chaymantan Jericó llaqtaman chayarqanku. Jericó llaqtamanta yachachisqankunantin runakunapiwan Jesús lloqsimushaqtintaq, Timeoq churin ñawsa Bartimeo ñan patapi limosnata mañakuspan tiyasharqan.

⁴⁷Nazaret llaqtayoq Jesús kasqanta uyarispataq waqyakurqan: —¡Jesús! ¡Rey Davidpa miraynin! ¡Khuyapayaykuway! nispa.

⁴⁸Hinan ñawsata askha phiñarikurqanku upallananpaq, paytaq ichaqa aswan kallpawan waqyakurqan: —¡Rey Davidpa miraynin, khuyapayaykuway! nispa.

⁴⁹Hinaqtinmi Jesusqa sayaykuspa nirqan: —Waqyamuychis, nispa. Hinan ñawsataqa waqyamurqanku: —Kallpachakuy, sayariy, waqyasunkin, nispa.

⁵⁰Chaymi payqa capanta wikch'uspan sayarirqospa Jesusman phawarirqan.

⁵¹Jesustaq payta tapurqan: —¿Ima ruwapunaytan munanki? nispa. Chaymi ñawsaqa nirqan: —Señorníy, qhawarichiwanaykitan munani, nispa.

⁵²Jesustaq nirqan: —Ripuy, iñiyniykin qhaliyachisunki, nispa. Hinan kaq rato qhawarirqan, hinaspan Jesuspa qhepanta ripurqan.