Read Quechua Cuzco Bible 1988 MARCOS 11 Bible Online

MARCOS 11 - Quechua Cuzco Bible 1988 bible

MARCOS 11

¹Jerusalén llaqtaman qayllaykushaspankun, Olivos orqo chakipi Betfagé llaqtachawan Betania llaqtachawan tupayman chayarqanku, chaymantan Jesusqa iskay yachachisqankunata nirqan:—

²Haqay chimpa llaqtachaman riychis, chayman haykuspan mana sillakusqa malta asno watasqata tarimunkichis, hinaspan paskaspa aysamunkichis.

³Pipas: ¿Imapaqmi paskashankichis? nisunkichis chayqa, ninkichis: Señorninchismi kayta necesitan, nispa, chaymi aysachimusunkichis, nispa.

⁴Paykunataq rispanku calle punkupi malta asno watasqata tarirqanku, hinaspan paskasharqanku.

⁵Chaypi kaq wakin runakunataq paykunata nirqan: — ¿Imanashankichismi? ¿Imapaqmi malta asnota paskashankichis? nispa.

⁶Hinan paykunaqa Jesuspa nimusqanta hina nirqanku. Chaymi mana hark'arqankuchu.

⁷Malta asnotataq Jesusman aysamurqanku, hinan p'achankuwan caronaykuqtinku Jesusqa sillaykukurqan.

⁸Askhan p'achankuta ñanpi mast'arqanku, wakintaq raphisapa k'allmakunata wit'uspa ñanpi mast'arqanku.

⁹Hinaspanmi ñawpaqenta qhepanta riqkunaqa qaparirqanku: —¡Yupaychasqa kachun Diosqa! ¡Saminchasqa kachun Señor Diospa sutinpi hamuqqa!

¹⁰¡Saminchasqa kachun machulanchis Davidpa hamuq kamachikuyninqa! ¡Yupaychasqa kachun Diosqa! nispanku.

¹¹Jesusmi Jerusalén llaqtaman haykuspa Dios yupaychana wasiman rirqan. Muyuriqninpi kaqkunata lliwta qhawarispataq, ch'isiyaykuyña kaqtin, chunka iskayniyoq yachachisqanwan Betania llaqtachaman rirqan.

¹²Qhepantin p'unchaymi Betania llaqtachamanta lloqsirqanku, hinan Jesusqa yarqachikurqan,

¹³chaymi raphiyoq higos sach'ata karumanta rikuspa asuykurqan rurunta chaypi tarinanrayku. Chayman asuykuspataq, mana imatapas tarirqanchu, aswanpas raphillata, mana higos tiempo kasqanrayku.

¹⁴Chaymi Jesusqa higos sach'ata nirqan: —¡Amaña hayk'aqpas pipas ruruykitaqa mikhuchunchu! nispa. Yachachisqankunataq chayta uyarirqanku.

¹⁵Jerusalén llaqtamanmi chayarqanku, hinaspan Jesusqa Dios yupaychana wasiman haykuspa chaypi qhatuqkunata rantiqkunata hawaman qarqomurqan. Qolqe cambiaqkunaq mesankunatapas urpi qhatuqkunaq tiyanankunatapas t'ikrarqarirqan.

¹⁶Manataq Dios yupaychana wasi pationta ñanta hina imatapas pasachinankuta munarqanchu.

¹⁷Hinaspan paykunata yachachirqan: ¿Manachu Diospa Simin Qelqaqa nin: Wasiyqa tukuy runakunaq mañakunanpaq wasi nisqan kanqa, nispa? Qankunataq ichaqa suwakunaq tiyanan qaqa wasiman hina tukuchipusqankichis, nispa.

¹⁸Chayta uyarispankun kamachikuy simita yachachiqkunaqa sacerdote umallikunapiwan Jesusta wañuchiyta munarqanku, ichaqa llaqtallantin Jesuspa yachachikuyninmanta musphaqtinkun payta manchakurqanku.

¹⁹Ch'isiña kaqtintaq llaqtamanta lloqsipurqanku.

²⁰Qhepantin paqar rishaspataq, higos sach'ata rikurqanku saphinmantapacha ch'akisqanta.

²¹Hinan Pedroqa yuyarirqospan Jesusta nirqan: —Yachachikuq, qhawariy, ñakasqayki higos sach'aqa ch'akirqapusqan, nispa.

²²Jesustaq nirqan: —Diospi iñiychis.

²³Cheqaqtan niykichis, pipas sonqonpi mana iskayrayaspa kay orqota ninman: Anchhuriy, qochaman wikch'uykukuy, nispa chayqa, nisqanman hinan ruwasqa kanqa iñisqanrayku.

²⁴Chaymi niykichis: Diosmanta tukuy imatapas mañakuspaykichisqa iñiychis chaskisqaykichistaña, hinan chaskinkichis.

²⁵Diosmanta mañakushaspaykichis piwanpas phiñanasqa kasqaykichista yuyarinkichis chayqa, pampachaychis. Chay hinapin hanaq pachapi kaq Yayaykichis qankunatapas huchallikusqaykichismanta pampachasunkichis. [

²⁶Manachus qankuna pampachankichis chayqa, hanaq pachapi kaq Yayaykichispas manallataqmi huchallikusqaykichista pampachanqachu], nispa.

²⁷Chaymantataq Jerusalén llaqtaman kutirqanku, Dios yupaychana wasipi Jesús purishaqtintaq, sacerdote umallikuna, kamachikuy simita yachachiqkuna, kurak runakunapiwan payman asuykurqanku,

²⁸hinaspan Jesusta nirqanku: —¿Ima atiywanmi kaykunata ruwanki? ¿Pitaq kaykunata ruwanaykipaq atiyta qorqasunki? nispanku.

²⁹Hinan Jesusqa paykunata nirqan: —Ñoqapas hukta tapuykusqaykichis, kutichiwankichistaq, hinan ima atiywanchus kaykuna ruwasqayta willasqaykichis.

³⁰¿Pitaq Juanta kachamurqan bautizananpaq? ¿Dioschu? Icha, ¿runakunachu? Niwaychis, nispa.

³¹Hinan paykunapura churanakurqanku: —“Diosmi” nisun chayqa, ninqan: ¿Imaraykun payta mana creerqankichischu? nispan.

³²“Runakunan” nisun chayqa ... llapallan Juantaqa cheqaq profetapaq*f** hap'irqanku, chaymi runakunata manchakurqanku.

³³Hinan Jesusman kutichirqanku: —Manan yachaykuchu, nispa. Chaymi Jesusqa paykunata nirqan: —Manan ñoqapas willaykichismanchu ima atiywanchus kaykuna ruwasqayta, nispa.