Read Quechua Cuzco Bible 1988 MARCOS 13 Bible Online

MARCOS 13 - Quechua Cuzco Bible 1988 bible

MARCOS 13

¹Dios yupaychana wasimanta Jesús lloqsishaqtintaq huknin yachachisqanqa payta nirqan: —Yachachikuq, ¡qhawariy kay hina sumaq ch'eqosqa rumikunata, kay hina hatun wasikunatapas! nispa.

²Jesustaq nirqan: —¿Rikunkichu kay hatun wasikunata? Manan rumi patapi huk rumillapas qhepanqachu, llapanmi thunisqa kanqa, nispa.

³Dios yupaychana wasi chimpa Olivos orqopi Jesús tiyashaqtintaq Pedro, Jacobo, Juan, Andrespiwan sapallanpi payta tapurqanku:

⁴—Willawayku, ¿hayk'aqmi kay nisqaykiqa kanqa? ¿Ima señaltaq kanqa llapan kaykuna hunt'akunan kashaqtinri? nispa.

⁵Hinan Jesusqa paykunata nirqan: —Cuidakuychis, pipas pantachisunkichismantaq.

⁶Askhan sutiywan sutichakuspa hamunqaku: Ñoqan Diospa Akllasqan Cristoqa kani, nispanku, hinaspan askhata pantachinqaku.

⁷Awqa-tinkuykunamanta, ch'aqwaykunamanta rimasqata uyarispaykichisqa aman musphankichischu, chay hinapunin kanan, ichaqa mana p'uchukayraqchu kanqa.

⁸Llaqtakunan huk llaqtakunawan maqanakunqaku, huk suyun hukkaq suyuwan maqanakunqa, kanqataqmi kayneqpi chayneqpi pacha chhaphchiykuna, yarqaykuna, ch'aqwaykunapas, chaykunaqa ñak'ariy qallariyllaraqmi kanqa.

⁹Qankuna ichaqa kikiykichista cuidakuychis, uma runakunaq huñunakuyninmanmi apasunkichis, Diosmanta yachachina wasikunapin maqasunkichis, kamachikuqkunaq reykunaq ñawpaqenmantaq ñoqarayku waqyachisqa kankichis, ahinapin ñoqamanta paykunaman willankichis.

¹⁰Ñawpaqtaqa Diosmanta allin willakuykunan llapa suyukunaman willasqapuni kanqa.

¹¹Kamachikuq uma runakunaman entreganasuykichispaq apasunkichis chayqa, aman ñawpaqmanta llakipakunkichischu imatachus ninaykichismantaqa, aswanpas chay horapi yuyaychasqasuykichistan rimankichis, manan qankunachu rimankichisqa, aswanpas Santo Espiritun.

¹²Wawqen wawqenta, taytataq churinta wañuchinapaq entreganqa, churikunataq tayta-mamakuna contra hatarispa wañuchinqaku.

¹³Ñoqaraykun lliwpa cheqnisqan kankichis, ichaqa pipas p'uchukaykama qaqa sayaqmi qespichisqa kanqa.

¹⁴Diospa millakusqan qhellichaq runan Dios yupaychana wasipi sayanqa, chayta rikuqtiykichisqa Judea hap'iypi kaqkuna orqokunaman ayqechunku. (Kayta leeqqa entiendechun).

¹⁵Wasi patapi kashaqpas ama uraykuspa wasinmanta imatapas horqonanpaq haykuchunchu.

¹⁶Chakrapi kashaqpas p'achanta apananpaq ama wasinman kutichunchu.

¹⁷¡Ay chay p'unchaykunapi wiksallikuqkunamanta! ¡Ay wawata ñuñuqkunamantapas!

¹⁸Diosmanta mañakuychis chaykuna ama paray tiempopi kananpaq.

¹⁹Chay p'unchaykunaqa manchay ñak'ariymi kanqa, manan Diospa kamay qallarisqanmantapacha kunankama chay hinaqa hayk'aqpas karqanchu, manallataq kanqapaschu.

²⁰Manachus Señor Diosqa chay p'unchaykunata pisiyachinman karqan chayqa, manan pipas qespichisqachu kanman, aswanpas paypa akllakusqankunaraykun chay p'unchaykunataqa pisiyachirqan.

²¹Pipas nisunkichis: ¡Qhawariychis, kaypin Diospa Akllasqan Cristo kashan! otaq: ¡Qhawariychis, haqaypin kashan! nispa chayqa, aman creenkichischu.

²²Llulla “Cristokunan” llulla profetakunapiwan*f** rikhurimunqaku, hinaspan señalkunata milagrokunata ruwanqaku, chay hinapi atispaqa Diospa akllakusqankunatapas pantachinankupaq.

²³Chayrayku qankunaqa cuidakuychis, ñawpaqmantañan lliwta willashaykichis.

²⁴Chay p'unchaykunapin chay ñak'ariy qhepataña inti tutayanqa, killapas mana k'anchanqachu,

²⁵qoyllurkunapas cielomantan t'akakamunqa, cielopi kaq ch'askakunapas chhaphchisqan kanqa.

²⁶Chaypachan Diospa Kachamusqan Runata*f** rikuwanqaku, hatun atiywan lliphlli-kaywan phuyupi hamushaqta.

²⁷Hinaspan angelniykunata kachasaq teqsimuyuntinmanta akllakusqaykunata huñumunanpaq.

²⁸Yachaychis higos sach'amanta kay yachachikuyta: K'allman q'omeryamuqtin raphinkunapas ch'ikchirimuqtinmi, poqoy timpo sispaykamusqanta yachankichis.

²⁹Ahinallataq qankunapas, kaykuna hunt'akusqanta rikuspaykichisqa, Diospa Kachamusqan Runa*f** sispaykamushasqayta yachankichis.

³⁰Cheqaqtan niykichis, manan kay mirayqa tukukunqachu lliw chaykuna hunt'akunankama.

³¹Hanaq pachapas kay pachapas tukukunqan, simiykunan ichaqa mana tukukunqachu.

³²Chay p'unchayta chay horatawanmi ichaqa mana pipas yachanchu, manan hanaq pachapi kaq angelkunapas, manallataq Churipas, aswanpas Yayallan.

³³Manan yachankichischu hayk'aqchus chaykuna kanantaqa, chayrayku cuidakuychis, makilla kashaychis.

³⁴Kayqa karuman puriq runamanmi rikch'akun, paymi wasinta saqerqan, kamachinkunamanpas atiyta qorqan, sapankamantaq ruwanata, punku qhawaqtapas kamachirqan makilla kashananpaq.

³⁵Makilla kashaychis, manan yachankichischu hayk'aqchus wasiyoqpa hamunantaqa, ch'isintachus, icha kuska tutatachus, icha wallpa waqaytachus, ichari tutamantataqchus.

³⁶Paqtataq qonqaylla hamuspa puñushaqta tarirqosunkichisman.

³⁷Qankunaman nisqaykunataqa, llapanmanmi nini: ¡Makilla kashaychis! nispa.