Read Quechua Cuzco Bible 1988 MARCOS 2 Bible Online

MARCOS 2 - Quechua Cuzco Bible 1988 bible

MARCOS 2

¹Pisi p'unchaykunamantan wakmanta Jesusqa Capernaum llaqtaman haykurqan, wasipi kashasqantaq uyarikurqan.

²Hinan askha huñunakamurqanku, chay hinapin punkupas mana ayparqanñachu sayaykunankupaq, paykunamantaq Jesusqa Diosmanta allin willakuykunata willarqan.

³Hinaqtinmi wakin runakunaqa payman hamurqanku huk such'uta tawamanta wantumuspa.

⁴Askha runa kasqanraykun Jesusman mana asuykuyta atirqankuchu, chaymi paypa kashasqan wasi patata paskaspa t'oqospanku ima, puñunapi sirishaqta such'uta uraykachirqanku.

⁵Jesustaq paykunaq iñisqankuta reparaspa, such'uta nirqan: —Churíy, huchaykikunatan pampachayki, nispa.

⁶Kamachikuy simita wakin yachachiqkunataq chaypi tiyasharqanku, paykunan sonqonkupi yuyaykuspa

⁷nirqanku: ¿Imaraykutaq kayri chay hinata riman? ¡Diosta pisichaspan riman! ¿Pitaq huchakunata pampachaytari atinman, manachu Dioslla? nispa.

⁸Hinan sonqonkupi chay hina yuyaykusqankuta Jesusqa sonqonpi yachaspa paykunata nirqan: —¿Imaraykun chay hinata sonqoykichispi yuyaykunkichis?

⁹¿Mayqentaq aswan atikuq: Huchaykikunatan pampachayki, nispa such'uta niychu, icha: Hatariy puñunaykita hoqarispa ripuy, niytaqchu?

¹⁰Ñoqaqa Diospa Kachamusqan Runan kani, chaymi kay pachapi huchakunata pampachanaypaq atiyniyoq kasqayta yachanaykichispaq, kay such'uta nisaq:

¹¹Qantan niyki: Hatariy, puñunaykita hoqarispa wasiykita ripuy, nispa.

¹²Hinaqtinmi hatarispan hina, puñunanta hoqarispa, llapankuq ñawpaqenmanta lloqsirqan. Chaymi llapanku musphaspa Diosta hatuncharqanku: Manan kay hinataqa hayk'aqpas rikurqanchischu, nispanku.

¹³Jesustaq wakmanta qocha pataman lloqsirqan, hinan tukuy runakuna payman huñukurqanku, chaymi paykunata yachachirqan.

¹⁴Chaymanta rishaspanmi rikurqan Alfeoq churin Levita, contribución cobrana wasipi sisata cobrashaqta, hinaspan nirqan: —Qhepayta hamuy, nispa. Hinan sayarispa Leviqa qhepanta rirqan.

¹⁵Levipa wasinpi Jesusqa mikhunanpaq tiyashaqtintaqmi, contribución cobraqkuna, huchasapamanta qhawasqakuna, Jesuspa yachachisqankunapiwan kuska askha runa tiyasharqanku. Askhan karqanku, Jesuspa qhepanta hamusqankurayku.

¹⁶Contribución cobraqkunawan huchasapamanta qhawasqakunapiwan mikhuqta Jesusta rikuspankutaq, Fariseo*f** t'aqamanta kamachikuy simita yachachiqkunaqa Jesuspa yachachisqankunata nirqanku: —¿Imaraykun payqa contribución cobraqkunawan huchasapakunapiwan mikhunpas ukyanpas? nispa.

¹⁷Jesustaq chayta uyarispa paykunata nirqan: —Qhalikunaqa manan hampiqta necesitankuchu, aswanpas onqosqakunallan necesitanku. Manan hamurqani chanin runakunata waqyaqchu, aswanpas huchasapakunata waqyaqmi, nispa.

¹⁸Bautizaq Juanpa yachachisqankunapas, fariseokunaq*f** yachachisqankunapas ayunashaqtinkun runakunaqa hamuspa Jesusta tapurqanku: —¿Imaraykun Juanpa yachachisqankunapas, fariseokunaq*f** yachachisqankunapas ayunanku, yachachisqaykikunañataq mana ayunankuchu? nispa.

¹⁹Jesustaq paykunata nirqan: —¿Casamientoman invitasqakunaqa, novio paykunawan kashaqtinqa ayunankumanchu? Paykunawan novio kashaqtinqa manan ayunankumanchu.

²⁰Ichaqa chayamunqan p'unchaykuna, noviota aparqoqtinkun ayunanqaku.

²¹Manan pipas mawk'a p'achamanqa mosoq telawan remiendanchu, chay hina kaqtinqa mosoq tela remiendon q'estispa mawk'akaqta astawan llik'inqa.

²²Manataqmi pipas upi vinotaqa mawk'a qara odrekunaman hillp'unchu, chay hina kaqtinqa, upi vinon poqospa phatachinqa, vinopas hich'akunqan, odrepas llik'ikapunqan, aswanmi upi vinotaqa mosoq qara odrekunaman hillp'unku, nispa.

²³Samana p'unchaypi chakra ukhunta Jesús rishaqtinmi, yachachisqankunaqa purin-purin trigo umata k'aptayta qallarirqanku.

²⁴Chaymi fariseokunaqa*f** payta nirqanku: —Qhawariy, ¿imaraykun yachachisqaykikunaqa samana p'unchaypi Diospa kamachikuyninta p'akispa ruwanku? nispa.

²⁵Jesustaq paykunata nirqan: —¿Manachu hayk'aqpas leerqankichis Davidpa ruwasqanta? Abiatar uma sacerdote kashaqtinmi Davidqa runankunapiwan pisichikuspa yarqachikuspa Diospa wasinman haykurqan, hinaspa Diospa ñawpaqenpi churasqa t'antakunata mikhurqan, runankunamanpas qoykullarqantaq. Chay t'antakunataqa sacerdotekunallan mikhuqku, nispa.

²⁷Paykunataqa nillarqantaqmi: —Samana p'unchayqa runapaq churasqan karqan, manan runachu samana p'unchaypaq.

²⁸Chayraykun, ñoqaqa Diospa Kachamusqan Runa kaspa, samana p'unchaypi imatachus ruwanankuta kamachikunaypaq atiyniyoq kani, nispa.