Read Quechua Cuzco Bible 1988 MARCOS 3 Bible Online

MARCOS 3 - Quechua Cuzco Bible 1988 bible

MARCOS 3

¹Jesusqa Diosmanta yachachina wasimanmi wakmanta haykurqan, chaypin kasharqan huk runa hukkaq makin ch'akisqa.

²Fariseokunataq*f** Jesusta samana p'unchaypi qhaliyachinmanchus chayta qhamiyarqanku, payta huchachanankupaq.

³Hinaqtinmi ch'akisqa makiyoq runata Jesusqa nirqan: —Sayarimuspa chawpipi sayaykuy, nispa.

⁴Paykunatataq Jesusqa nirqan: —¿Diospa kamachikuyninqa samana p'unchaypi allin ruwanatachu, icha mana allin ruwanatachu kamachikun? ¿Kawsayta qespichinatachu, icha wañuchinatachu kamachikun? nispa. Paykunataq ichaqa ch'inlla karqanku.

⁵Hinan muyuriqninpi kaqkunata phiñasqa qhawarispa, sonqonku rumiyasqa kasqanmanta llakikuspa runata nirqan: —Haywarimuy makiykita, nispa. Runataq haywarirqan, chaymi makinqa qhaliyarqapurqan.

⁶Chaymi fariseokunaqa*f** lloqsispa Herodes t'aqapiwan Jesús contra rimanakurqanku wañuchinankupaq.

⁷Jesustaq ichaqa yachachisqankunawan qocha pataman rirqan, hinan Galilea provinciamanta ancha askha runa paypa qhepanta rirqan. Hinallataq Judea hap'iymanta.

⁸Jerusalén llaqtamanta, Idumea hap'iymanta, Jordán mayu inti lloqsimuy ladomanta, Tiro llaqtaq, Sidón llaqtaq muyuriqninmantawan tukuy ruwasqankunamanta uyarispa, ancha askha runakuna Jesusman hamurqanku.

⁹Chaymi yachachisqankunata kamachirqan boteqa kaqllapipuni kashananpaq, askha runakuna kasqanrayku payta mana k'iskinankupaq.

¹⁰Askhatataqmi qhaliyachirqan, chayraykun tukuy ñak'arichisqa kaqkunaqa Jesusman mat'ipakamurqanku payta llamiykunankupaq.

¹¹Supaykunataq Jesusta rikuspa, ñawpaqenpi qonqorikurqanku, hinaspan qaparispa nirqanku: —Qanqa Diospa Churinmi kanki, nispanku.

¹²Paytaq ichaqa allin-allinta paykunata kamachirqan ama paymanta sut'ita rimarinankupaq.

¹³Orqoman wicharispataq, Jesusqa pikunatachari munarqan chaykunata waqyakurqan, hinan payman hamurqanku.

¹⁴Chunka iskayniyoq qharikunatan akllakurqan paywan purinankupaq, Diosmanta allin willakuykunata willaqta kachananpaq,

¹⁵supaykunatapas runakunamanta qarqonankupaqwan.

¹⁶Paykunan karqan: Simón (paytan Pedro sutiwan suticharqan),

¹⁷Zebedeoq churinkuna Jacobo, Juanpiwan (paykunatan Boanerges sutiwan suticharqan, chayqa “Q'aqyaq runakuna” ninantan nin),

¹⁸Andrés, Felipe, Bartolomé, Mateo, Tomás, Alfeoq churin Jacobo, Tadeo, Zelote*f** nisqa t'aqamanta Simón,

¹⁹Judas Iscariotepiwan, paymi Jesusta hap'iykachiqqa karqan.

²⁰Hinamantataq wasiman hamurqanku. Chaymi wakmanta runakuna huñunakamurqanku, chayraykun paykunaqa manaña mikhuytapas atirqankuchu.

²¹Jesuspa familiantaq chaypi kasqanta uyarispa payta pusanankupaq hamurqanku, “manan yuyayninpichu kashan” niqtinku.

²²Jerusalén llaqtamanta hamuspankun Kamachikuy simita yachachiqkunapas nirqanku: —Kay runaqa supaykunata kamachiq Beelzebupa hunt'aykusqanmi kashan, chaymi supaykunata qarqon, nispa.

²³Paykunata waqyaspataq rikch'anachiy simikunapi nirqan: —¿Satanasqa pay kikinta qarqokunmanchu?

²⁴Huk suyupi runakuna cheqninakun chayqa, chay suyuqa tukukapunqan.

²⁵Huk familiapas cheqninakun chayqa, chay familiaqa tukukapunqan.

²⁶Satanaspas kikinpa contranpi hatarispaqa, t'aqanasqa kaspaqa, manan takyanmanchu, aswanmi tukukapunqa.

²⁷Manan pipas kallpasapaq wasinman haykuspa kaqninkunata suwayta atinmanchu kallpasapata manaraq watashaspaqa, wataspañan ichaqa wasinta suwayta atinman.

²⁸Cheqaqtan niykichis, Diosmi runakunaq ima huchantapas tukuy mana allin rimaywan k'amisqankutapas pampachanqa,

²⁹pipas Santo Espíritu contra mana allinta rimaspa pisichaqmi ichaqa mana hayk'aqpas pampachasqachu kanqa, aswanmi wiñaypaq huchayoq kapun, nispa.

³⁰Chaytaqa nirqan, “supaypa hunt'aykusqanmi kashan” niqtinkun.

³¹Chayllamanmi Jesuspa wawqenkuna mamanpiwan hamurqanku, hinaspan hawapi kashaspanku payta waqyamuqta kachaykurqanku.

³²Jesuspa muyuriqninpi tiyashaq runakunataq payman willarqanku: —Mamaykin wawqeykikunapiwan hawapi maskhashasunkiku, nispa.

³³Hinan paykunata nirqan: —¿Pitaq mamaypas wawqeykunapas? nispa.

³⁴Muyuriqninpi kaqkunata qhawarispataq nirqan: —Kayqa mamaypas wawqeykunapas.

³⁵Pipas Diospa munayninta ruwaqmi wawqeypas, panaypas, mamaypas, nispa.