Read Quechua Cuzco Bible 1988 MARCOS 4 Bible Online

MARCOS 4 - Quechua Cuzco Bible 1988 bible

MARCOS 4

¹Wakmantataq Jesusqa qocha patapi yachachiyta qallarirqan, hinaspan askha runakuna payman huñukamurqanku, chayrayku payqa qochapi huk bote kashaqman haykuspa tiyaykurqan, llapa runataq qocha patapi kasharqan.

²Hinaspan rikch'anachiy simikunapi imaymanata yachachirqan, yachachishaspan paykunata nirqan:

³—Uyariychis, muhu t'akaqmi rirqan t'akamuq.

⁴T'akashaqtinmi wakinqa ñan pataman chayarqan, phalaq animalkunataq phawaykamuspa chayta pallarqapurqan.

⁵Wakin muhutaq mana askha hallp'ayoq rumi-rumiman chayarqan, hallp'a mana ukhu kaqtintaq lloqsimurqanpacha.

⁶Hinaspan inti lloqsimuspa ruphapurqan, ch'akipurqantaq mana saphiyoq kasqanrayku.

⁷Wakin muhutaq khiska-khiskaman chayarqan, khiskakuna wiñamuspataq p'ampapurqan, chaymi mana rurupurqanchu.

⁸Wakin muhutaq allin hallp'aman chayaspa wiñarqan, hinaspan wakin rururqan kinsa chunkata, wakintaq soqta chunkata, wakintaq pachakta, nispa.

⁹Paykunataqa nillarqantaqmi: —Uyarinanpaq ninriyoqqa uyarichun, nispa.

¹⁰Askha runakuna ripuqtintaq Jesuspa qayllanpi qhepaqkunaqa chunka iskayniyoq yachachisqanpiwan chay rikch'anachiy simimanta tapurqanku.

¹¹Hinan paykunata nirqan: —Ñawpaqa pakasqa karqan imaynatachus runakunata Diospa kamachinan, chaytan kunanqa sut'ita willashaykichis, wak runakunaman ichaqa imaymanatapas rikch'anachiy simikunapi yachachini,

¹²ñawinkuwan qhawashaspa mana rikunankupaq, ninrinkuwan uyarishaspapas mana entiendenankupaq, Diosman mana kutirikunankupaq, huchankupas mana pampachasqa kananpaq, nispa.

¹³Hinaspan paykunata nirqan: —¿Manachu kay rikch'anachiy simita entiendenkichis? Chay hinari, ¿imaynatataq llapan rikch'anachiy simikunata entiendenkichis?

¹⁴Muhu t'akaqqa, Diospa siminta willaqmi.

¹⁵Chay ñan pataman chayaqkunaqa Diospa siminta uyariqkunan, uyariqtinkuñan ichaqa, Satanasqa hamurqospan sonqonkuman chayaq simita aparqonpacha.

¹⁶Chay rumi-rumiman chayaqkunaqa Diospa siminta uyarispa hina kusisqa chaskiykuqkunan.

¹⁷Ichaqa mana saphiyoq hina kaspankun pisi p'unchaykunallapaq kanku, Diospa siminrayku muchuchisqa qatiykachasqa kaspataq huk-niraq karqospa saqepunku.

¹⁸Chay khiska-khiskaman chayaqkunaqa Diospa siminta uyariqkunan,

¹⁹ichaqa kay kawsaypi afanakuykuna, qhapaq-kaypa sonqo suwaynin, imaymana munapayaypiwantaq sonqoman haykuspa simita p'ampapunku, chaymi mana rurupunchu.

²⁰Chay allin hallp'aman chayaqkunaqa Diospa siminta uyariqkunan. Chaykunan chaskikuspa rurunku, wakin kinsa chunkata, wakintaq soqta chunkata, wakintaq pachakta, nispa.

²¹Paykunataqa nillarqantaqmi: —¿Pipas k'anchashaq lamparata raki ukhuman otaq puñuna pata ukhuman churanchu? Manan, k'anchana patamanmi churan.

²²Lliw pakasqa kaqtapas mana sut'inchasqa kaqtapas Diosmi rikhurichinqa.

²³Uyarinanpaq ninriyoqqa uyarichun, nispa.

²⁴Paykunataqa nillarqantaqmi: —Reparaychis imatachus uyarisqaykichista, imaynatachus runa-masiykichista juzgankichis, kikillantataqmi Diospas juzgasunkichis. Qankuna uyariqkunataqa aswantaraqmi juzgasunkichis.

²⁵Pipas reparay yachaqtaqa Diosmi astawanraq reparachinqa, pipas mana reparaqmantataqmi pisi reparasqantapas Diosqa qechupunqa, nispa.

²⁶Jesusqa nillarqantaqmi: —Kay hinamanmi Diospa kamachikushasqanqa rikch'akun: Huk runan muhuta hallp'aman t'akan.

²⁷P'unchaykunan pasan, muhutaq lloqsimuspa wiñan, imaynachus wiñasqantaqa manan t'akaqqa yachanchu.

²⁸Hallp'aqa kikillanmantan ruruchin: ñawpaqta q'achuta, chaymantataq espigata, hinamantañataq espigapi trigota hunt'achin,

²⁹ruru poqoqtinñataq ichhunawan ichhunku, cosecha chayamuqtin, nispa.

³⁰Jesustaq nirqan: —¿Imawamni Diospa kamachikushasqanta rikch'anachisunchis? Chayri, ¿ima rikch'anachiy simiwantaq tupanachisunchis?

³¹Hallp'aman t'akasqa mostaza muhu hinan, kay muhun llapa muhumantaqa aswan huch'uylla,

³²t'akasqataqmi wiñan, hinaspan lliw yuyukunamanta aswan hatun rikhurin, k'allmachakuntaq hatuchaqkunata, chay hinapin phalaq animalkunapas llanthunpi tiyanku, nispa.

³³Jesusqa kay hina askha rikch'anachiy simiwanmi paykunaman Diospa siminta willarqan, entiendeyta atisqankuman hina.

³⁴Runakunamanqa rikch'anachiy simikunallawanpunin rimapayaq, yachachisqankunamanmi ichaqa sapaqllapi lliwta sut'incharqan.

³⁵Chay p'unchay ch'isiyaykuqtintaq Jesusqa paykunata nirqan: —Qocha chimpaman risunchis, nispa.

³⁶Askha runakunata kacharparipuspataq, kasqan botepi Jesusta pusarqanku, huk botekunapas riysillarqantaqmi.

³⁷Hinan manchay sinchi wayra wayramurqan, chaymi unuqa boteman qhellakuspa hunt'aykusharqanña.

³⁸Jesustaq boteq qhepallanpiña sawnanaman k'iraykusqa puñusharqan, rikch'achispankutaq nirqanku: —Yachachikuq, ¿manachu imapas qokusunki? ¡Chinkaykushanchisñan! nispanku.

³⁹Jesustaq hatarimuspa wayrata phiñarikurqan, hinaspan qochata nirqan: —¡Samp'ayay! ¡Thanipuy! nispa. Wayrataq thanirqapurqan, hinan t'ak-nisqa karqan.

⁴⁰Paykunatataq nirqan: —¿Imaraykun kay hina mancharisqa kashankichis? ¿Manachu Diospi iñinkichis? nispa.

⁴¹Hinan anchata mancharikuspanku ninakurqanku: —¿Pitaq kayri, chaytaq wayrapas, qochapas kasun? nispanku.