Read Quechua Cuzco Bible 1988 MARCOS 5 Bible Online

MARCOS 5 - Quechua Cuzco Bible 1988 bible

MARCOS 5

¹Qocha chimpamantaq Gerasa llaqta runakunaqman chayarqanku.

²Botemanta Jesús lloqsiqtin hinan panteonmanta supaypa ñak'arichisqan runa paywan tupaq hamurqan.

³Paymi panteonpi tiyaq, manataq cadenakunawanpas watayta pipas atiqñachu.

⁴Askha kutiñan thunkunakunawan, cadenakunawanpas watasqa karqan, paytaq ichaqa cadenakunatapas p'itirqan, thunkunakunatapas ñut'urqan, manataq pipas atipayta atiqchu.

⁵Tuta p'unchaymi orqokunapipas panteonpipas qaparkachaspa purillaqpuni, pay kikinta rumikunawan k'irikuspa.

⁶Jesusta karumanta rikuspataq phawarimuspa qonqoriykukurqan.

⁷Chaymi Jesusqa nirqan: —Supay, kay runamanta lloqsiy, nispa. Hinan supayqa kunkayoqta qaparispan nirqan: —¿Iman ñoqawan ruwanayki Qollana Diospa Churin Jesús? Diosraykun rogakuyki, ama ñak'arichiwaychu, nispa.

⁹Jesustaq payta tapurqan: —¿Iman sutiyki? nispa. Chaymi kutichirqan: —“Waranqa-waranqan” sutiyqa, askha kasqaykurayku, nispa.

¹⁰Hinan anchata rogakurqan ama sinchi karuman qarqonanpaq.

¹¹Chay orqo qayllapin askha khuchikuna mikhusharqan.

¹²Llapan supaykunataq Jesusta rogakurqanku: —Khuchikunaman kachawayku, chaykunaman haykunaykupaq, nispa.

¹³Chaymi Jesusqa hinata kacharparirqan. Chay millay supaykunataq lloqsispa khuchikunaman haykurqanku, hinan khuchikunaqa t'aqantin qochaman phawaykurqanku, heq'epaspataq wañupurqanku. Chay khuchikunaqa iskay waranqa hinan karqan.

¹⁴Khuchi michiqkunataq ayqerispa, llaqtapi, campopipas willakamurqanku. Chaymi lloqsimurqanku imachus kasqanta rikunankupaq.

¹⁵Jesusman hamuspankutaq askha supaypa ñak'arichisqan runata, p'achasqa tiyashaqta, yuyayninpiña kashaqta rikuspa mancharikurqanku.

¹⁶Rikuqkunataq paykunaman willarqanku, imachus chay supaypa ñak'arichisqan runawanpas khuchikunawanpas sucedesqanta.

¹⁷Chaymi Jesusta rogakurqanku hallp'ankumanta ripunanpaq.

¹⁸Hinan boteman Jesús haykuqtin, supaykunaq ñak'arichisqan runaqa payta rogakurqan: —Qanwanmi ripuyta munani, nispa.

¹⁹Jesustaq ichaqa mana munarqanchu, aswanmi nirqan: —Wasiykita ripuspa familiaykikunaman willamuy Señor Diospa imaymana ruwapusqasuykita khuyapayasqasuykitawan, nispa.

²⁰Hinan ripurqan, Jesuspa imaymana paypaq ruwasqanta Decápolis nisqa chunkantin llaqtakunapi willakurqan. Hinan lliw runa muspharqanku.

²¹Wakmanta Jesusqa qocha chimpaman botepi chimpaqtintaq askha runakuna payman huñukamurqanku. Payqa qocha patapin kasharqan.

²²Diosmanta yachachina wasipi Jairo sutiyoq uma runataq hamurqan, hinaspan Jesusta rikuspa hina ñawpaqenpi qonqoriykukuspa

²³khuyayta rogaykukurqan: —Ususichaymi wañurqapushanña, hamuriway, llamiykampuway qhaliyaspa kawsananpaq, nispa.

²⁴Chaymi Jesusqa paywan rirqan, askha runataq qhepanta rispa payta k'iskiykurqanku.

²⁵Chaypin huk warmi karqan, chunka iskayniyoq wataña yawar apaywan onqoshaq.

²⁶Paymi askha hampiqkunawan hampichikuspa sinchita ñak'arisqa, lliw kaqnintapas tukukapusqa, manataq imapas qhaliyachisqañachu, aswanmi astawan mana allin kapusqa.

²⁷Paymi Jesusmanta rimaqta uyarispa yuyaykurqan: P'achallantapas llamiykuspayqa qhaliyasaqmi, nispa. Chaymi qhepanta asuykurqan runa-runanta, hinaspa p'achanta llamiykurqan.

²⁹Yawar apaynintaq thanirqapurqan, hinan chay ñak'ariymanta cuerponpi qhaliyasqanta yachakurqan.

³⁰Jesustaq atiyninwan qhaliyachisqanta reparaspa hina runakunaman kutirispa nirqan: —¿Pin llamiykamuwan? nispa.

³¹Yachachisqankunataq nirqanku: —Qhawariyyá runakunaq k'iskipakamusqasuykita, ninkiraqtaq: —¿Pin llamiykamuwan? nispayki, nispa.

³²Jesustaq muyuriqninta qhawaykacharqan pichus llamiqninta rikunanpaq.

³³Hinan warmiqa mancharisqa khatatataspa, qhaliyasqa kasqanta yachakuspa Jesuspa ñawpaqenpi qonqoriykukurqan, hinaspan tukuy imatachus ruwasqanta payman willarqan.

³⁴Chaymi Jesusqa nirqan: —Ususíy, Diospi iñiyniykin qhaliyachisunki, sumaqllaña ripuy, manan ñak'arinkiñachu, nispa.

³⁵Jesús rimashallaqtinraqmi Diosmanta yachachina wasipi uma runaq wasinmanta hamurqanku: —Ususiykiqa wañukapunñan, ¿imapaqñataq yachachikuqtaqa astawan sayk'uchinki? nispanku.

³⁶Jesustaq ichaqa chay nisqankuta mana kasuspa uma runata nirqan: —Ama mancharikuychu, iñillay, nispa.

³⁷Hinaspan mana pitapas qhepan rinanta munarqanchu, aswanpas Pedrota, Jacobota, Jacoboq wawqen Juanllatawanmi.

³⁸Hinaspan Diosmanta yachachina wasipi uma runaq wasinman chayaspa runakunata rikurqan, paykunan qaparkachasharqanku, waqasharqanku, khuyayta llakikusharqanku.

³⁹Haykuspataq paykunata nirqan: —¿Imaraykun qaparkachaspa waqashankichis? Sipaschaqa manan wañunchu, aswanpas puñushallanmi, nispa.

⁴⁰Chaymi Jesusta asipayarqanku, paytaq ichaqa lliwta hawaman qarqospa sipaschaq tayta-mamanta, paywan kaqkunatawan pusarikuspa sipaschaq kasqanman haykurqan.

⁴¹Sipaschata makinmanta hap'iykuspataq Arameo rimaypi nirqan: —Talita kumi, nispa, chay simiqa: Sipascha, qantan niyki, sayariy, ninantan nin.

⁴²Sipaschataq sayarirqospa puririrqan, chaymi manchayta muspharqanku. Payqa chunka iskayniyoq watayoqmi karqan.

⁴³Jesustaq paykunata allintapuni kamachirqan ama pimanpas chay ruwasqanta rimarinankupaq. Sipaschaman mikhunata qonankupaqtaq kamachikurqan.