Read Quechua Cuzco Bible 1988 MARCOS 6 Bible Online

MARCOS 6 - Quechua Cuzco Bible 1988 bible

MARCOS 6

¹Chaymanta lloqsispantaq Jesusqa llaqtanman rirqan, yachachisqankunapas paywan rirqanku.

²Samana p'unchay chayamuqtintaq, Diosmanta yachachina wasipi yachachiyta qallarirqan, llapankutaq payta uyarispa muspharqanku: —¿Maypitaq kay runaqa kaykunata yachamurqan? ¿Imaynatataq kay yachaytaqa chaskirqan? ¡Milagrokunataraqmi ruwashanpas!

³¿Manachu payqa Mariaq churin carpintero? ¿Manachu payqa Jacoboq, Josepa, Judaspa, Simonpapas wawqen? ¿Manachu panankunapas ñoqanchiswan kashanku? nispa. Hinaspan paymanta huk-niraq karqorqanku.

⁴Jesustaq ichaqa paykunata nirqan: —Profetaqa*f** allin respetasqan, ichaqa llaqtanpi ayllunpi familianpi kaqkunallan mana respetanchu, nispa.

⁵Hinaspan mana ima milagrotapas chaypi ruwarqanchu, aswanpas wakin onqosqakunallata qhaliyachirqan paykunaman makinta churaykuspa.

⁶Jesusqa paykunaq mana iñisqankumantan muspharqan. Chaymantataq muyuriqnintin llaqtakunata yachachispa purirqan.

⁷Chunka iskayniyoq yachachisqankunata waqyaspataq, iskay-iskayta kachayta qallarirqan. Supaykunata runakunamanta qarqonankupaqtaq atiyta paykunaman qorqan.

⁸Hinaspan paykunata kamachirqan: —Ama imatapas ñanpaq apakuychischu qoqawatapas, t'antatapas, qolqetapas.

⁹Aswanpas tawnallata apaspa usut'allayoq cuerpoykichispi p'achallayoq riychis, nispa.

¹⁰Paykunataqa nillarqantaqmi: —Maypipas huk wasiman haykuspaykichisqa chayllapin samakunkichis chay llaqtamanta ripunaykichiskama.

¹¹Maypipas mana chaskisunkichismanchu, manataq uyarisunkichismanchu chayqa, chaymanta lloqsispa chakiykichispi kaq hallp'atapas chhaphchinkichis mana allin ruwasqankuta yachanankupaq, nispa.

¹²Hinan lloqsispa runakunaman willamurqanku huchankuta saqepuspa Diosman kutirikunankupaq.

¹³Askha supaykunatan runakunamanta qarqorqanku, askha onqosqakunatapas aceitewan hawispan qhaliyachirqanku.

¹⁴Rey Herodesmi chaykunamanta rimaqta uyarirqan, runakunaq Jesusmanta rimasqanrayku. Wakin runakunan nirqanku: Bautizaq Juanmi wañusqanmanta kawsarimpun, chaymi payqa kay hina atiyniyoq kashan, nispa.

¹⁵Wakintaq: Payqa Eliasmi, nirqanku. Wakinñataq: Payqa ñawpa profetakunamanta*f** huknin hinan, nirqanku.

¹⁶Herodestaq chayta uyarispa nirqan: Kayqa qhoruchisqay Juanmi, paymi wañusqanmanta kawsarimpun, nispa.

¹⁷Herodesmi wawqen Felipeq warmin Herodiaswan casarakurqan, chaymi Juanqa Herodesta nirqan: Wawqeykiq warminwan tiyashasqaykiqa manan chaninchu, nispan. Hinan Herodesqa Juanta hap'ichimuspa carcelman wisq'achirqan.

¹⁸

¹⁹Herodiasqa Juanta cheqnikuspan wañuchiyta munarqan, manataq atirqanchu.

²⁰Herodesqa manchakurqanmi Juanta, chanin runa Dios manchakuq runa kasqanta yachaspa, chayraykun payta waqaycharqan. Herodesqa kusisqan Juanpa rimasqanta uyarirqan, hinaña hawapi-ukhupi sonqoyoq kashaspapas.

²¹Herodiaspa suyasqan p'unchaymi chayamurqan. Herodesmi nacesqan p'unchayninpi kamachikuqninkunaman, ejéricito umallinkunaman, Galilea provinciapi allichachaq runakunamanwan hatun mikhuyta haywasharqan,

²²hinan Herodiaspa ususinqa haykuspa tusurqan. Herodestapas mikhuq-masinkunatapas kusichiqtintaq, reyqa sipasta nirqan: —Ima munasqaykitapas mañakuway, ñoqataq qosqayki, nispa

²³sipasman jurarqan: Tukuy ima mañakuwasqaykitan qosqayki, kamachisqay suyuq kuskannintapas, nispa.

²⁴Sipastaq lloqsispan mamanta tapurqan: —¿Imatan mañakusaq? nispa. Mamantaq nirqan: —Bautizaq Juanpa umanta mañakuy, nispa.

²⁵Hinan usqhaylla reyman haykuspa mañakurqan: —Bautizaq Juanpa umanta kunanpacha platopi qoykuway, nispa.

²⁶Reytaq sinchita llakikurqan, ichaqa prometekusqanta mikhuq-masinkuna uyarisqanrayku mana atirqanchu “manan” niyta.

²⁷Hinaspan reyqa huknin guardiata kamachirqan: —Juanpa umanta usqhaylla apamuy, nispa.

²⁸Hinan guardiaqa carcelta rispa Juanpa umanta qhorurqamuspa huk platopi apamuspa sipasman qorqan, paytaq mamanman qorqan.

²⁹Juanpa yachachisqankunataq chayta uyarispa hamurqanku, hinaspan ayanta wanturqanku p'ampamunankupaq.

³⁰Jesuspa kachasqankunataq kutimuspanku Jesuswan huñuykukurqanku, hinaspan tukuy ruwasqankuta yachachisqankutawan payman willarqanku.

³¹Mikhunankupaqpas manan tiemponku karqanñachu runakuna sapa rato chayamusqanrayku, chaymi Jesusqa paykunata nirqan: —Hamuychis huk ch'inneq cheqasman, hinaspa huk chhikanta samariychis, nispa.

³²Chaymantataq huk botepi ch'inneq cheqasman paykunalla ripurqanku.

³³Askha runakunataq paykuna ripushaqta rikuspa Jesusta yachachisqankunatawan reqsirqorqanku, hinan llapa llaqtakunamanta chakillapi phawaspanku, manaraq paykuna chayashaqtin chayman chayarqorqanku, hinaspan Jesusman huñuykukurqanku.

³⁴Botemanta lloqsimuspataq Jesusqa ancha askha runakunata rikurqan, hinaspan paykunata khuyapayaykurqan, mana michiqniyoq ovejakuna hina kaqtinku, chaymi imaymanata paykunaman yachachiyta qallarirqan.

³⁵Ch'isiyaykushaqtintaq yachachisqankunaqa Jesusman asuykuspa nirqanku: —Kayqa ch'inneqmá, tutayanqañataq kanpas,

³⁶paykunata kachapuy muyuriq campoman llaqtakunaman rinankupaq, hinaspa mikhunata rantikamunankupaq, nispa.

³⁷Jesustaq paykunata nirqan: —Qankuna mikhuchiychis, nispa. Hinan payta nirqanku: —¿Iskay pachak jornalpa chanin qolqewan t'antaman rispachu rantimusaqku, paykunata mikhuchinaykupaq? nispa.

³⁸Jesustaq paykunata nirqan: —¿Hayk'a t'antaykichistaq kashan? Qhawamuychis, nispa. Yachamuspataq nirqanku: —Phisqa t'antawan, iskay challwallawanmi kashan, nispanku.

³⁹Hinan paykunata kamachirqan q'omer q'achu patapi llapallankuta t'aqa-t'aqata tiyachimunankupaq.

⁴⁰Chaymi tiyaykurqanku pachak pachakmanta, phisqa chunka phisqa chunkamanta t'aqasqa.

⁴¹Phisqantin t'antata, iskaynin challwatawan hap'iykuspataq hanaq pachata qhawarispa graciasta qorqan, t'antakunata phasmispataq yachachisqankunaman qorqan runakunaman rakimunankupaq, kaqllataq iskaynin challwatapas llapallankuman rakichirqan.

⁴²Hinan llapallanku mikhurqanku saksaykunankukama.

⁴³Puchuq t'anta p'akita challwa ñut'utawanmi chunka iskayniyoq canasta hunt'ata hoqarirqanku.

⁴⁴Mikhuqkunamantaqa qharikunallan phisqa waranqa karqanku.

⁴⁵Hinaspanmi Jesusqa yachachisqankunata botepi Betsaida llaqtaman ñawpachirqan, paytaq chaykama runakunata kacharparipusharqan.

⁴⁶Paykunata kacharparipuspataq orqota rirqan Diosmanta mañakuq.

⁴⁷Tutayaykuqtintaq boteqa chawpi qochataña risharqan, Jesustaq qocha patallapiraq sapallan kasharqan.

⁴⁸Hinaspan paykunata rikurqan lloqenawan boteta ñak'ayta suchuchishaqta, ñawpaqenkumanta wayramusqanrayku. Pacha illarimuyta hinataq unu patanta purispa paykuna ladoman Jesusqa rirqan, paykunata ñawpariyta yuyaspa.

⁴⁹Paykunataq ichaqa unu patanta purishaqta Jesusta rikuspa: —¡Manchachikuqmi! nispa qaparirqanku.

⁵⁰Llapankun payta rikuspa mancharikurqanku. Chaymi Jesusqa paykunata nirqan: —¡Kallpachakuychis, ñoqan kani, ama mancharikuychischu! nispa.

⁵¹Paykunaq kasqanku botemantaq wicharqan, wayrataq thanirqapurqan, hinan paykunaqa muspharqanku.

⁵²T'anta askhayachisqanmantaqa manaraqmi entienderqankuchu sonqonku rumiyasqa kasqanrayku.

⁵³Qochata chimpaspankutaq, Genesaret hallp'aman chayaspa boteta wataykurqanku.

⁵⁴Paykuna botemanta lloqsishaqtinkutaq, runakunaqa Jesusta reqsirqorqanku.

⁵⁵Hinaspan tukuy muyuriqta phawarispanku, hinantinmanta onqosqakunata puñunankupi apamurqanku, maypichus Jesuspa kashasqanta uyarisqanku cheqasman.

⁵⁶Jesuspa chayasqan huch'uy llaqtakunapipas, hatun llaqtakunapipas, ayllukunapipas onqosqakunataqa plazakunapin churarqanku, hinaspan Jesusta rogakurqanku p'achan patallatapas llamiykunankupaq, hinan lliw payta llamiykuqkunaqa qhaliyapurqanku.