Read Quechua Cuzco Bible 1988 MARCOS 7 Bible Online

MARCOS 7 - Quechua Cuzco Bible 1988 bible

MARCOS 7

¹Jerusalén llaqtamanta hamuq fariseokunataq,*f** kamachikuy simita wakin yachachiqkunapiwan Jesusman huñukamurqanku.

²Paykunan Jesuspa wakinnin yachachisqankunata makinkuta mana maqchikuspa mikhuqta rikurqanku.

³(Fariseokunaqa*f** llapan Judío runakunapiwanmi ñawpa runakunaq yachachisqanta waqaychaspa, makinkuta mana maqchikuspaqa mana mikhuqkuchu.

⁴Plazamanta kutimuspapas makinkuta mana maqchikuspaqa manan mikhuqkuchu, hinallataq wak imaymana ruwaykunatapas ruwaqku, chaymi maqchiqku ukyana qerukunata, jarrokunata, cobre vasokunatapas).

⁵Hinaspan fariseokunaqa*f** kamachikuy simita yachachiqkunapiwan Jesusta tapurqanku: —¿Imanaqtinmi yachachisqaykikunaqa mana ñawpa runakunaq yachachisqanman hinachu purinku, aswanpas mana maqchisqa makintin mikhunku? nispa.

⁶Jesustaq paykunata nirqan: —Iskay uyakuna, qankunamantan profeta*f** Isaiasqa qelqarqan: Kay runakunaqa simillanwanmi yupaychawan, sonqonkutaq ichaqa ñoqamanta karupi kashan.

⁷Yanqapaqmi yupaychawanku, yachachikuyninkupas runaq yachachikuynillanmi, nispa.

⁸Qankunaqa Diospa kamachikuyninta saqespan runakunaq yachachikuyninta ruwankichis, nispa.

⁹Paykunataqa nillarqantaqmi: —Diospa kamachikuynintan saqerparinkichis kikiykichispa yachachiyniykichista ruwanaykichispaq.

¹⁰Moisesmi yachachirqan: Taytaykita mamaykita allinta rikuy. Pipas taytanta mamanta ñakaqqa, wañuchun, nispa.

¹¹Qankunataq yachachinkichis: Pipas taytanta mamanta ninman: Manan yanapaykimanchu, qanman qonaytan Diosman qopuni Diospaq ofrenda nisqata, nispa chayqa,

¹²manañan taytantapas mamantapas yanapachinkichisñachu.

¹³Chay hina ruway yachachisqaykichiswan Diospa siminta mana valeqman tukuchipunkichis, askhatan chay hinakunataqa ruwankichis, nispa.

¹⁴Hinaspan runakunata waqyaspa nirqan: —Llapalla uyariwaspaykichis entiendeychis:

¹⁵Manan imapas mikhusqanchu runataqa huchallichin, aswanpas sonqonpi yuyaykuspa ruwasqanmi runataqa huchallichin.

¹⁶[Uyarinanpaq ninriyoqqa uyarichun, nispa.]

¹⁷Jesusqa runakunamanta t'aqarikuspa wasiman haykuqtinmi yachachisqankunaqa chay rikch'anachiy simimanta tapurqanku.

¹⁸Chaymi paykunata nirqan: —¿Qankunapas manachu entiendenkichis? ¿Manachu reparankichis tukuy imapas mikhusqanqa runata mana huchallichisqanta?

¹⁹Mikhunaqa manan sonqomanchu haykun, aswanpas wiksamanmi, hinaspan hisp'anaman lloqsipun, nispa. (Chaytan nirqan llapan mikhunakunaqa ch'uya kasqanta sut'inchaspa.)

²⁰Nillarqantaq: —Runaq sonqonmanta lloqsimuqmi runataqa huchallichin.

²¹Runakunaq sonqonmantaqa lloqsimun: mana allin yuyaykuna, wasanchaykuna, qhellipi puriykuna, runa wañuchiykuna,

²²suwakuykuna, munapakuykuna, millay kaykuna, q'otuykuna, mana p'enqarikuykuna, lerq'opayaykuna, k'amikuykuna, anchaykachaykuna, mana yuyayniyoq kaykunapiwan.

²³Chay mana allinkunan sonqomanta lloqsimuspa runata huchallichin, nispa.

²⁴Chayneqmantan Jesusqa Tiro llaqtaman rirqan. Chaypi kasqanta mana pipas yachananta munaspan wasiman haykurqan, chaywanpas runakunaqa yacharqankupunin.

²⁵Huk warmin Jesuspa chaypi kasqanta uyarirqospa hamurqan, chay warmiq ususinmi supaypa ñak'arichisqan karqan, paymi Jesuspa ñawpaqenpi qonqoriykukurqan.

²⁶Chay warmiqa manan Judío miraychu karqan, aswanpas Siria suyupi Fenicia hap'iypi tiyaq runakunaq mirayninmi karqan. Paymi ususinmanta supayta qarqonanpaq Jesusta rogakurqan.

²⁷Chaymi payqa warmita nirqan: —Ñawpaqtaqa wawakunaraq saksaykuchunku, manan allinchu wawakunaq t'antanta qechurqospa alqokunaman qaraykuyqa, nispa.

²⁸Hinan warmiqa Jesusta nirqan: —Arí, wiraqocháy, alqokunapas wawakunaq mikhusqanmanta usuqtaqa mesa ukhupi mikhunkun, nispa.

²⁹Hinaqtinmi payta nirqan: —Allinpunin nisqaykiqa, ripuy, supayqa ususiykimanta lloqsinñan, nispa.

³⁰Warmitaq wasinman chayaspa ususinta puñuna patapi sirishaqta tarirqan, supaypas paymanta lloqsisqataña.

³¹Tiro ladomanta kutimuspataq Jesusqa Sidonninta Decápolis nisqa chunkantin llaqtakuna chawpinta Galilea qochaman chayarqan.

³²Chaymanmi huk akllu-roqt'u runata pusamurqanku, hinaspan Jesusta rogakurqanku payman makinta churaykuspa qhaliyachinanpaq.

³³Hinan Jesusqa runakunamanta wakneqman pusaspa akllu-roqt'u runaq iskaynin ninrinman dedonta sat'iykurqan, thoqayninwantaq qallunta llosiykurqan.

³⁴Hinaspan hanaq pachata qhawarispa sonqonta ch'allaq nichikuspa nirqan: —¡Efata! nispa. Chayqa ¡kicharikuy! ninantan nin.

³⁵Chaymi ninrinkunaqa kicharikapurqanpacha, qallunpas paskarikapurqan, allintataq rimapusharqan.

³⁶Hinan Jesusqa ama pimanpas willanankupaq paykunata kamachirqan. Chay hinata kamachishaqtinpas, astawanraqmi willakurqanku.

³⁷Chaymi uyariqkunaqa anchata musphaspa nirqanku: —Jesusqa lliwtan allinta ruwan, roqt'ukunatan uyarichin, upakunatan rimarichin, nispa.