Read Quechua Cuzco Bible 1988 MARCOS 8 Bible Online

MARCOS 8 - Quechua Cuzco Bible 1988 bible

MARCOS 8

¹Chay p'unchaykunapin askha runakuna huktawan huñukamurqanku. Mikhunanku mana kaqtintaq Jesusqa yachachisqankunata waqyaspa nirqan:

²—Kay runakunatan khuyapayani, kinsa p'unchayñan ñoqawan kashanku, manataq imapas mikhunankupaq kanchu.

³Mana mikhusqata wasinkuman kacharparipuqtiyqa ñanpin pisipankuman, wakinninkuqa karumantan hamunku, nispa.

⁴Yachachisqankunataq payta nirqanku: —Kay ch'inneqpiqa, ¿maypitaq t'anta kanman kay askha runaman saksachinapaq? nispa.

⁵Hinan paykunata tapurqan: —¿Hayk'a t'antallaykichistaq kashan? nispa. Paykunataq: —Qanchisllan, nirqanku.

⁶Chaymi Jesusqa runakunata pampapi tiyaykunankupaq kamachirqan. Qanchis t'antata hap'iykuspataq graciasta qospaña phasmirqan, hinaspan yachachisqankunaman qorqan runakunaman haywanankupaq, hinan runakunaman qorqanku.

⁷Kallarqantaqmi pisi challwakunapas, graciasta qospataq runakunaman haywanankupaq kamachirqan.

⁸Mikhuspankun saksaykurqanku, puchuq p'akikunatataq qanchis canastata hoqarirqanku.

⁹Mikhuqkunan yaqa tawa waranqa karqanku. Chaymantataq Jesusqa paykunata kacharparipurqan.

¹⁰Chay qhepatataq yachachisqankunawan boteman haykuspa Dalmanuta ladoman rirqanku.

¹¹Fariseokunan*f** hamuspanku Jesuswan churanakuyta qallarirqanku. Payta wateqaspataq hanaq pacha milagrota rikuchinanpaq mañakurqanku.

¹²Chaymi Jesusqa sonqonpi llakikuspa nirqan: ¿Imanaqtinmi milagro ruwanayta mañawankichis? Cheqaqtan niykichis, manan ima milagrotapas rikuchisqaykichischu, nispa.

¹³Paykunata saqespataq Jesusqa wakmanta boteman haykuspa qocha chimpaman rirqan.

¹⁴Jesuspa yachachisqankunataq t'anta apakuyta qonqasqaku, aswanpas ch'ulla t'antallankun botepi karqan.

¹⁵Jesustaq paykunata kamachirqan: —Cuidakuychis, waqaychakuychis fariseokunaq*f** qonchunmanta*f** Herodespa qonchunmantawan, nispa.

¹⁶Hinan yachachisqakunaqa ninakurqanku: —Mana t'antanchis kaqtinmi chaytaqa niwanchis, nispa.

¹⁷Jesustaq chayta reparaspa paykunata nirqan: —¿Imanaqtintaq ninakushankichis: Manan t'antanchis kanchu, nispa? ¿Manachu reparankichis, manachu entiendenkichispas? ¿Rumiyasqachu sonqoykichis kashan?

¹⁸¿Ñawiyoq kashaspachu mana rikunkichis, ninriyoq kashaspachu mana uyarinkichis? ¿Manachu yuyankichis

¹⁹phisqa t'antata phasmispa phisqa waranqaman mikhuchisqayta? ¿Hayk'a canastatan t'anta p'akisqata hoqarirqankichis? nispa. Paykunataq: —Chunka iskayniyoqtan, nirqanku.

²⁰Jesusmi nillarqantaq: —Qanchis t'antata tawa waranqapaq askhayachishaqtiyqa, ¿hayk'a canastatan t'anta p'akisqata hoqarirqankichis? nispa. Paykunataq: —Qanchistan, nirqanku.

²¹Hinan paykunata nirqan: —¿Manaraqchu entiendenkichis? nispa.

²²Betsaida llaqtaman Jesús chayaqtintaq ñawsa runata payman pusamurqanku, hinaspan llamiykuspa qhaliyachinanpaq rogakurqanku.

²³Hinan Jesusqa ñawsata makinmanta llaqta hawaman pusarqan, hinaspan thoqayninwan ñawinta llusiykuspa makinwan umanta llamiykuspa tapurqan: —¿Icha imallatapas rikunkichu? nispa.

²⁴Hinan payqa qhawaykacharikuspa nirqan: —Runakunatan sach'akunata hina rikushani, ichaqa purishaqta, nispa.

²⁵Chaymi Jesusqa wakmanta ñawinta llamiykurqan, hinan chay runaqa allinta qhawaspa rikupusharqan, chaymi karumanta lliwta sut'ita rikurqan.

²⁶Chaymantataq Jesusqa wasinman kachapurqan: —Aman llaqtaman haykunkichu, nispa.

²⁷Chay qhepatataq Felipeq kamachisqan Cesarea llaqta qayllapi llaqtachakunaman Jesusqa yachachisqankunapiwan rirqanku. Hinaspanmi yachachisqankunata ñanpi tapurqan: —Runakunari, ¿pi kasqaytataq ninku? nispa.

²⁸Paykunataq kutichirqanku: —Wakinmi Bautizaq Juan kasqaykita ninku, wakintaq profeta*f** Elías kasqaykita ninku, wakinñataq profetakunamanta huknin kasqaykita ninku, nispanku.

²⁹Chaymi Jesusqa paykunata tapurqan: —Qankunari, ¿pi kasqaytataq ninkichis? nispa. Pedrotaq payta nirqan: —Qanqa Diospa Akllasqan Criston kanki, nispa.

³⁰Chaymi paykunata allin-allinta kamachirqan ama pimanpas payqa Cristo kasqanta rimarinankupaq.

³¹Hinaspan paykunata yachachirqan: —Ñoqaqa Diospa Kachamusqan Runan*f** kani, anchatapunin ñak'arisaq. Ñoqataqa kurak runakunan, sacerdote umallikunan, kamachikuy simita yachachiqkunan qhawarpariwaspa wañuchiwanqaku, kinsakaq p'unchaypitaq kawsarimpusaq, nispa.

³²Chay hina sut'itan paykunaman willarqan. Chaymi Pedroqa Jesusta wakman pusaspa anyarqan chay nisqanmanta.

³³Hinan Jesusqa yachachisqankunaman kutirispa Pedrota k'amirqan: —¡Hatariy ñoqamanta Satanás! Qanqa manan Dios hinachu yuyanki, aswanpas runa hinallan yuyanki, nispa.

³⁴Hinaspan runakunata yachachisqankunatawan waqyaspa nirqan: —Pipas qhepayta hamuyta munaqqa pay kikinta nikuchun: Manañan ñoqapaqchu kawsani, nispa, hinaspa ñoqarayku ñak'arispa wañunanpaq kaqtinpas qhepayta hamuchun.

³⁵Pipas pay kikillanta waqaychakuyta munaqqa wiñaypaqmi chinkapunqa, pipas ñoqarayku Diosmanta allin willakuykunaraykupiwan wañuqmi ichaqa wiñaypaq kawsanqa.

³⁶Huk runachus kay pachantinpi lliw kaqkunata hap'ikapuspa, wiñaypaq chinkapunqa chayqa, ¿ima allintaq paypaq kanqa?

³⁷Chay hinari, ¿hayk'atataq runaqa qonman kawsayninta qespichinanpaq?

³⁸Pipas ñoqamanta simiykunamantawan kay mana kasukuq huchasapa runakuna qayllapi p'enqakunqa chayqa, Diospa Kachamusqan Runapas*f** paymantaqa p'enqakullasaqtaqmi, ch'uya angelkunapiwan Yayaypa hatunchasqan hamuspay, nispa.