Read Quechua Cuzco Bible 1988 MARCOS 9 Bible Online

MARCOS 9 - Quechua Cuzco Bible 1988 bible

MARCOS 9

¹Jesusqa paykunata nillarqantaqmi: —Cheqaqtan niykichis, Diosqa atiywan kamachikunanpaq hamuqtinmi, kaypi kaqkunamanta wakinniykichisqa kawsashankichisraq, nispa.

²Soqta p'unchay qhepatataq Jesusqa Pedrota, Jacobota, Juantawan huk alto orqoman paykunallata pusarqan, hinaspan ñawpaqenkupi rikch'aynin huk-niraqman tukurqan.

³P'achanpas rit'i hina yuraqllaña k'ancharishaqmi rikhurirqan, mana kay pachapi mayqen t'aqsaqpas chay hina yuraqyachiyta atinmanchu.

⁴Hinan paykunaqa rikurqanku Eliasta Moisestawan Jesuswan parlashaqta.

⁵Chaymi Pedroqa Jesusta nirqan: —Yachachikuq, may allinmi kaypi kayninchisqa. Kinsa ch'ukllata ruwasaqku, hukta qanpaq, hukta Moisespaq, huktataq Eliaspaq, nispa.

⁶Ancha mancharisqa kaspankun Pedroqa mana reparakuspa chay hinata rimarqan.

⁷Chayllamanmi huk phuyu hamuspa paykunata pakaykurqan, chay phuyumantan huk kunka nimurqan: Kaymi munasqay Churiy, payta uyariychis, nispa.

⁸Muyuriqninkuta qhawarispankutaq manaña chay hukkunata rikurqankuchu, aswanpas sapan Jesusllatañan.

⁹Orqomanta paykuna uraykamushaqtinkutaq Jesusqa paykunata kamachirqan kay rikusqankuta ama pimanpas willanankupaq, aswanpas Diospa Kachamusqan Runa*f** wañusqanmanta kawsarimpuqtinña rimarinankupaq.

¹⁰Chaymi paykunaqa chay rikusqankuta mana pimanpas rimarirqankuchu, paykuna purallan tapunakurqanku: —¿Imataq wañusqamanta kawsarimpuyri? nispa.

¹¹Hinaspan Jesusta tapurqanku: —¿Imanaqtinmi kamachikuy simita yachachiqkunaqa: Eliasraqmi ñawpaqtaqa hamunan, ninku? nispa.

¹²Jesustaq paykunata nirqan: —Arí, Eliasqa ñawpaqtapunin hamun, paymi tukuy imaymanata allichan. ¿Manachu Diospa Simin Qelqapi nin: Diospa Kachamusqan Runaqa*f** sinchitan ñak'arinqa pisichasqataqmi kanqa, nispa?

¹³Ichaqa niykichismi, Eliasqa hamurqanñan, tukuy ima munasqankutan payta ruwarqanku, paymanta Diospa Simin Qelqapi nisqaman hina, nispa.

¹⁴Jesusqa kinsa yachachisqankunapiwan hamuspankun, wakin yachachisqankunaq muyuriqninpi askha runakunata rikurqan, kamachikuy simita wakin yachachiqkunataq paykunawan churanakushaqta.

¹⁵Llapan runakunataq qonqaylla Jesusta rikuspa muspharqanku, hinaspan payman phawarispa napaykurqanku.

¹⁶Jesustaqmi paykunata tapurqan: —¿Imamantataq paykunawan churanakushankichis? nispa.

¹⁷Hinan runa ukhumanta huknin nimurqan: —Yachachikuq, qanmanmi upayachiq supaypa ñak'arichisqan churiyta pusamurqani,

¹⁸chay supaymi maypi hap'ispapas wat'akichispa phosoqota aqtuchin, kiruntapas k'arkakichin, hinaspan k'aspi chutarikun. Yachachisqaykikunatan valekurqani chay supayta qarqonanpaq, ichaqa manan atinkuchu, nispa.

¹⁹Jesustaq paykunata nirqan: —¡Ay, mana iñiyniyoq runakuna! ¿Hayk'aqkaman muchusqaykichis? Chay waynata pusamuwaychis, nispa.

²⁰Pusamuqtinkutaq Jesusta rikuspa hina supayqa waynata chhaphchirqan, pampaman urmaspataq waynaqa phosoqota aqtuspa qhosparqan.

²¹Jesustaq taytanta tapurqan: —¿Hayk'aqmantañan payqa kay hina kashan? nispa. Taytantaq nirqan: —Wawa kasqanmantañan.

²²Askha kutin wañuchinanpaq ninamanpas unumanpas wikch'uykun, ima ruwayllatapas atispaykiqa khuyapayawaspaykiku yanapaykuwayku, nispa.

²³Hinan Jesusqa payta nirqan: —¿Imanaqtinmi “atispaykiqa” ninki? ¡Iñiqpaqqa tukuy imapas atikunmi! nispa.

²⁴Chaymi waynaq taytanqa kunkayoqta nirqan: —Iñinin, ¡yanapaykuway astawanraq iñinaypaq!

²⁵Jesustaq askha runakunaq huñukamusqanta rikuspa hina, supayta phiñarikurqan: —Upayachiq roqt'uyachiq supay, ñoqan kamachiyki: ¡Lloqsiy paymanta, amañan payman kutiykunkichu! nispa.

²⁶Hinan supayqa qaparispa waynata sinchita chhaphchispa lloqsirqan, chaymi waynaqa aya hina karqan. Askhan nirqanku: —Wañusqan kashan, nispa.

²⁷Jesustaq ichaqa makinmanta hap'ispa sayarichirqan, hinan waynaqa sayarirqan.

²⁸Wasiman Jesús haykuqtintaq yachachisqankunaqa sapaqpi payta tapurqanku: —¿Imanaqtintaq ñoqaykuri mana qarqoyta atirqaykuchu? nispa.

²⁹Hinan paykunata nirqan: —Kay hina supaykunataqa Diosmanta mañakuyllawanmi runamanta pipas qarqonman, nispa.

³⁰Chaymanta lloqsispataq Galilea provincianta purirqanku, manataq piqpa yachanantapas munarqankuchu.

³¹Jesusqa yachachisqankunata yachachispan nirqan: —Diospa Kachamusqan Runaqa*f** runakunamanmi hap'iykachisqa kasaq, wañuchiwanqakun, ichaqa kinsakaq p'unchaypin kawsarimpusaq, nispa.

³²Paykunataq chay rimasqanta mana entienderqankuchu, tapuykuytapas manchakurqankutaq.

³³Capernaum llaqtamanmi chayarqanku, hinan wasipi kashaspaña Jesusqa paykunata tapurqan: —¿Imamantan ñanpi tapunakusharqankichis? nispa.

³⁴Paykunataq ch'inlla karqanku, mayqenninkuchus qollana kanankumanta ñanpi tapunakusqankurayku.

³⁵Chaymi Jesusqa tiyaykuspa chunka iskayniyoq yachachisqankunata waqyaspa nirqan: —Pipas qollana kayta munan chayqa, llapamanta huch'uyyaykukuqmi kanan, llapatataq servinanpas, nispa.

³⁶Hinaspanmi huk wawata chawpinkuman sayaykachirqan, marq'arikuspataq paykunata nirqan:

³⁷—Pipas sutiypi kay hina wawata chaskiqmi ñoqata chaskiwan, ñoqata chaskiwaqtaq mana ñoqallatachu chaskiwan, aswanpas kachamuwaqniy Diostan chaskin, nispa.

³⁸Juantaq Jesusta nirqan: —Yachachikuq, huk runatan sutiykipi supaykunata qarqoshaqta rikumuyku, payqa manan ñoqanchiswan puriqchu, chaymi hark'amurqayku, nispa.

³⁹Jesustaq nirqan: —Ama payta hark'aychischu, pipas sutiypi milagrota ruwashaspaqa manan ñoqa contraqa millayta rimanmanchu.

⁴⁰Mana contranchispi kaqqa ñoqanchiswanmi kashan.

⁴¹Pipas huk vaso unuta haywarisunkichis Diospa Akllasqan Cristoq kasqaykichisrayku chayqa, cheqaqtan niykichis premiotaqa chaskinqapunin, nispa.

⁴²¡Ay! ¡Pipas ñoqapi iñiq kay huch'uykunamanta hukninta huchaman urmachiqqa! Paypaqqa aswan allinmi kanman karqan kunkanman molino rumita warkuykuspa mama qochaman wikch'uykunanku.

⁴³Makiykitaqchus huchaman urmachisunkiman chayqa kuchurqoy, aswan allinmi kanman ch'ulla makillayoq kawsayman haykuyniyki, iskay makiyoq kashaspa infiernoman, mana wañuy atiq ninaman rinaykimantaqa. (

⁴⁴Manan chaypiqa kurupas wañunchu, ninapas manallataq hayk'aqpas wañunchu).

⁴⁵Chakiykitaqchus huchaman urmachisunkiman chayqa kuchurqoy, aswan allinmi kanman ch'ulla chakillayoq kawsayman haykuyniyki, iskay chakiyoq kashaspa infiernoman wikch'uykusqa kanaykimantaqa. (

⁴⁶Manan chaypiqa kurupas wañunchu, ninapas manallataq hayk'aqpas wañunchu).

⁴⁷Ñawiykitaqchus huchaman urmachisunkiman chayqa horqorqoy, aswan allinmi kanman Diospa kamachikushasqanman ch'ulla ñawillayoq haykuyniyki, iskay ñawiyoq kashaspa infiernoman wikch'uykusqa kanaykimantaqa.

⁴⁸Manan chaypiqa kurupas wañunchu, ninapas manallataq hayk'aqpas wañunchu.

⁴⁹Llapanmi ninawan ch'uyanchasqa kanqaku.

⁵⁰Kachiqa sumaqmi, kachitaqchus q'aymayanman chayqa, ¿imawanmi kachiman tukuchiwaqchis? Kikiykichispi kachiyoq kaychis, hukkuna hukkunawantaq sumaqta kawsaychis, nispa.