Read Quechua Cuzco Bible 1988 LUCAS 10 Bible Online

LUCAS 10 - Quechua Cuzco Bible 1988 bible

LUCAS 10

¹Chaykuna qhepatataq Señor Jesusqa qanchis chunka iskayniyoqta akllaspa iskay-iskaymanta ñawpachirqan lliw rinan llaqtakunaman ayllukunamanwan.

²Paykunataqa nirqanmi: —Cosechanaqa askhallañan, llank'aqkunan ichaqa pisilla. Chay hinaqa, chakrayoqta valekuychis cosechanman llank'aqkunata kachananpaq.

³Riychis, ñoqan kachashaykichis atoqkunaq chawpinman oveja uñakunata hina.

⁴Ama apaychischu qolqetapas, qoqawatapas, usut'atapas, amallataq ñanpiqa pitapas napaykunkichischu.

⁵May wasiman haykuspaykichispas napaykunkichisraqmi: —Diosninchisña sumaqta kawsachisunkichis, nispa.

⁶Pillapas chaypi sumaq kawsay munaq runa kanqa chayqa, saminchayniykichis payman chayanqa, mana chaytaq kutimpusunkichis.

⁷Haykusqaykichis wasillapin samakunkichis, qosqasuykichista mikhuspa, ukyaspa. Llank'aqqa pagonta chaskinanpunin. Ama wasin-wasinta puriychischu.

⁸May llaqtamanpas haykusqaykichispi chaskisunkichis chayqa, imachus haywasqasuykichistan mikhunkichis.

⁹Chaypi onqosqakuna kaqtinqa qhaliyachinkichismi. Paykunatan ninkichis: Diosqa kaypiñan kashan kamachinasuykichispaq, nispa.

¹⁰May llaqtamanpas haykusqaykichispi mana chaskisunkichischu chayqa, callenkuman lloqsispan ninkichis:

¹¹—Llaqtaykichis hallp'a chakiykuman k'askakuqtawanpas contraykichispin chhaphchiyku. Ichaqa yachaychis, Diosqa kamachikunanpaq chayamusqanta, nispa.

¹²Niykichismi, taripay p'unchaypiqa Sodoma llaqtamanta kaqkunaraqmi pisi muchuchisqa kanqa chay llaqtamantaqa, nispa.

¹³¡Ay qanmanta, Corazín llaqta! ¡Ay qanmanta, Betsaida llaqta! Qankunapi ruwasqa milagrokuna, Tiro llaqtapi Sidón llaqtapiwan ruwakunman karqan chayqa, maypachañan usphapi luto p'achayoq tiyaykuspa Diosman kutirikunkuman karqan.

¹⁴Chayraykun Tiro llaqtamantapas Sidón llaqtamantapas taripay p'unchaypiqa aswan muchuchisqaraq qankunaqa kankichis.

¹⁵Qanrí, Capernaum llaqta, ¿yuyankichu hanaq pachakama hoqarisqa kayta? Manan. ¡Ukhu-pachakaman wikch'uykusqa kanki! nispa.

¹⁶Qankunata uyariqqa ñoqatan uyariwan, qankunata mana uyariyta munaqqa ñoqatan mana uyariyta munanchu, ñoqata mana uyariyta munaqtaq kachamuwaqniy Diosta mana uyariyta munanchu, nispa.

¹⁷Qanchis chunka iskayniyoq kachasqakunan kusisqa kutimpurqanku: —Señor, sutiykita rimariqtiykuqa supaykunapas kasuwankun, nispa.

¹⁸Chaymi Jesusqa paykunata nirqan: —Ñoqan rikurqani Satanasta rayo hina hanaq pachamanta urmaykamushaqta, nispa.

¹⁹Qankunamanmi atiyta qorqaykichis mach'aqwaykunata alacrán kurukunata sarunaykichispaq, awqaq tukuy kallpantapas atipanaykichispaq, manataq imapas imanasunkichischu.

²⁰Chaywanpas ama supaykuna kasusqasuykichismantachu kusikuychis, aswanqa kusikuychis sutiykichis hanaq pachapi qelqasqa kasqanmanta, nispa.

²¹Chay kikin raton Jesusqa Santo Espirituq kusikuywan hunt'aykusqan nirqan: —Yayalláy, qanmi kanki hanaq pachapipas kay pachapipas Munaychakuq. Kay yachaykunatan yachayniyoqkunamanta yuyayniyoqkunamantawan pakarqanki, huch'uykunamantaq sut'incharqanki, chaymantan yupaychayki. Arí, Yayáy, ahinatapunin qanqa munarqanki.

²²Yayaymi tukuy imaymanata reqsichiwarqan. Manan pipas yachanchu pichus Churi kasqantaqa aswanqa Yayallan, manallataq pipas yachanchu pichus Yaya kasqantaqa aswanqa Churillan, hinallataq pimanchus Churiqa reqsichiyta munanman chayllapiwanmi yachan, nispa.

²³Yachachisqankunaman kutirispataq paykunallaman nirqan: —Kusisamiyoqmi rikushasqaykichista rikuqkunaqa.

²⁴Niykichismi, askha profetakunan*f**, reykunan rikushasqaykichis rikuyta munarqanku, manataq rikurqankuchu. Paykunan uyarishasqaykichis uyariytapas munarqanku, manataq uyarirqankuchu, nispa.

²⁵Diospa kamachikuy siminta yachachiqmi Jesusta wateqananpaq sayarirqan: —Yachachikuq, ¿imatan ruwasaq wiñay kawsayniyoq kanaypaq? nispa.

²⁶Jesustaq payta nirqan: —¿Imataq Diospa kamachikuy siminpi qelqasqa kashan? ¿Ima ninmi leesqaykipi? nispa.

²⁷Paytaq nirqan: —Señor Diosniykitan munakunki tukuy sonqoykiwan, tukuy almaykiwan, tukuy kallpaykiwan, tukuy yuyayniykipiwan, runa-masiykitataq qan kikiykita hina munakunki ninmi, nispa.

²⁸Jesustaq nirqan: —Allintan ninki, chayta ruway, hinan kawsanki, nispa.

²⁹Paytaq ichaqa mana qhepapi kayta munaspa Jesusta nirqan: —¿Pitaq runamasiyri? nispa.

³⁰Chaymi Jesusqa nirqan: —Huk runatan Jerusalén llaqtamanta Jericó llaqtaman uraykushaqtin suwakuna hap'irqorqan. Chaykunan llat'anarqospa k'iriykuspa wañunayashaqta wikch'uspa ripurqanku.

³¹Huk sacerdote chay ñanta uraykuspataq, llat'anasqa runata rikuspa chimpallanta pasarqan.

³²Chhaynallataqmi huk Leví runapas chayneqman chayaspa, payta rikuspa chimpallanta pasarqan.

³³Ichaqa Samaria llaqtayoq runan chay ñanta purishaspa paypa kasqanman chayarqan, rikuspataq khuyapayaykurqan.

³⁴Hinaspan asuykuspa, vinowan aceitewan k'irinkunata hampiykuspa wataykurqan, sillakunan uywaman sillaykachispataq tampuman aparqan, hinaspan payta cuidarqan.

³⁵Qhepantin p'unchay ripushaspataq iskay p'unchay jornal qolqeta tampuyoqman qorqan: —Payta cuidaykapullawanki, lliw ima gastasqaykimantapas kutimuspaymi pagapusqayki, nispa.

³⁶¿Mayqentaq chay kinsantinmanta suwakunaq llat'anasqanpa runamasin? ¿Imaninkitaq? nispa.

³⁷Hinan payqa nirqan: —Payta khuyapayaykuqmi, nispa. Chaymi Jesusqa nirqan: —Riy, kaqllatataq qanpas ruwamuy, nispa.

³⁸Rishaspantaqmi Jesusqa huch'uy llaqtaman haykurqan, hinan Marta sutiyoq warmi wasinpi Jesusta chaskirqan.

³⁹Paypa ñañanmi María sutiyoq karqan, paymi Jesuspa ñawpaqenpi tiyaykuspa rimasqanta uyarisharqan.

⁴⁰Martataq ichaqa askha ruwanakuna atipaqtin asuykuspa nirqan: —Señorníy, ¿manachu imapas qokusunki sapallayta ñañay ruwachishawaqtin? Niykapuway yanapawananpaq, nispa.

⁴¹Jesustaq nirqan: —Marta, Marta, afanasqan kashanki, imaymanawan llakisqa.

⁴²Llapan ruwanamanta aswan allinqa hukllan, chay allinkaqtan Mariaqa akllakun, chaytaqa manan pipas paymanta qechunqachu, nispa.