Read Quechua Cuzco Bible 1988 LUCAS 11 Bible Online

LUCAS 11 - Quechua Cuzco Bible 1988 bible

LUCAS 11

¹Huk kutinmi Jesusqa huk cheqaspi mañakusharqan, mañakuyta tukuqtintaq huknin yachachisqanqa payta nirqan: —Señorníy, yachachiwayku mañakuyta, imaynan Juanpas yachachisqankunaman yachachirqan hinata, nispa.

²Chaymi paykunata nirqan: —Mañakuspaykichisqa kay hinatan ninkichis: Yayayku, sutiyki yupaychasqa kachun, kamachikuq-kayniyki takyachisqa kachun,

³sapa p'unchay mikhunaykuta qowayku.

⁴Huchaykutapas pampachawayku, imaynan ñoqaykupas huchallikuwaqniykuta pampachayku hinata. Amataq wateqasqa kanaykuta munaychu, nispaykichis, nispa.

⁵Paykunataqa nillarqantaqmi: —Mayqenniykichistaq kuska tutata amigonpata rispa ninman: Amigóy, ama hinachu kay, kinsa t'antaykita ayniriway,

⁶huk amigoymi chayarqamuwasqa, manataqmi imaypas kanchu haywarinaypaq, nispa.

⁷Hinaqtintaq payqa ukhumanta nimunman: Ama rimapayamuwaychu, punkupas wisq'asqañan, wawaykunantinmi puñukushani, manan hatarimuymanchu mañakusqaykita qonaypaq, nispa.

⁸Amigonña kashaspapas manan kuska tutataqa qoykunanpaq hatarinmanchu, chaywanpas sinchitapuni rimapayaqtinqa hatarispa qonmanpunin ima mañakusqantapas.

⁹Chaymi ñoqaqa niykichis, mañakuychis qosunkichismi, maskhaychis tarinkichismi, wasiyoqta waqyakuychis uyarimusunkichismi.

¹⁰Pipas mañakuqqa chaskinmi, maskhaqpas tarinmi, waqyakuqpas uyarisqataqmi.

¹¹¿Mayqenniykichistaq tayta kashaspaykichis churiykichis challwata mañakuqtin, mach'aqwayta qoykuwaqchis?

¹²Runtuta mañakuqtinpas, ¿alacrán kuruta qoykuwaqchis?

¹³Qankunapas mana allin kashaspa wawaykichisman allin kaqkunataqa qoyta yachankichismi, chaymantapas astawanraqmi hanaq pachapi kaq Yayaykichisqa mañakuqninkunaman Santo Espiritunta qonqapuni, nispa.

¹⁴Huk runamantan upayachiq supayta Jesusqa qarqorqan, hinan supay lloqsirqoqtin upa runaqa rimarirqan, chaymi runakunaqa muspharqanku.

¹⁵Wakintaq ichaqa nirqanku: —Supaykunaq kamachiqnin Beelzebupa atiyninwanmi supaykunataqa qarqon, nispa.

¹⁶Hukkunataq payta wateqaspa Diospa atiyninwan ruwasqa milagrota ruwananta munarqanku.

¹⁷Chaymi Jesusqa yuyaykusqankuta yachaspa paykunata nirqan: —Huk suyupi runakuna cheqninakun chayqa, suyuqa tukukapunqan. Huk wasipi kaqkunapas cheqninakun chayqa, chay wasiqa ch'usaqyapunqan.

¹⁸Supaykunata Beelzebupa atiyninwan qarqonki, niwankichismi riki, ichaqa Satanaspas pay kikin contra sayarinman chayqa, ¿imaynataq kamachikushallanman?

¹⁹Ñoqataqchus Beelzebupa atiyninwan supaykunata qarqoni chayqa, t'aqaykichis runakunari, ¿piqpa atiyninwantaq qarqonku? Paykunan pantasqaykichistaqa rikuchisunkichis.

²⁰Aswanpas ñoqachus Diospa atiyninwan supaykunata qarqoni chayqa, Diosqa kaypiñan kashan kamachinasuykichispaq.

²¹Armakunayoq kallpasapa runa wasinta waqaychan chayqa, tukuy kaqninpas llapallanmi kashan.

²²Armakunapi hap'ipakuqtinpas paymanta aswan kallpasapa hamuspanmi atipanqa, hinaspan llapan armakunata qechuspa kaqninkunata rakirqonqa.

²³Mana ñoqawan kaqqa, ñoqaq contraymi, mana ñoqawan huñuqtaqmi ch'eqechin.

²⁴Runamanta supay lloqsispaqa, ch'aki purunkunapin purin samaykuyta maskhaspa, mana tarispataq nin: Lloqsimusqay wasiyman kutiykapusaq, nispa.

²⁵Kutispataq pichasqata allichasqata tarin.

²⁶Chaymi rispa paymanta aswan millay qanchis supaykunatawan pusamun, hinaspan haykuspa chaypi tiyanku. Chay runataq ñawpaq kawsayninmantapas aswan millayraq qhepamanqa kapun, nispa.

²⁷Chaykunata Jesusqa nishaqtinmi runakuna ukhumanta huk warmi kunkayoqta payta nimurqan: —Kusisamiyoqmi wachakuqniyki ñuñuqniyki warmiqa, nispa.

²⁸Paytaq nirqan: —Aswan kusisamiyoqqa Diospa siminta uyarispa hunt'aqkunan, nispa.

²⁹Runakuna Jesusman huñukamuqtinkutaq, payqa nirqan: —Kay tiempo runakunaqa mana allinmi, milagrotan rikuyta munan, Diosqa manan milagrota rikuchinqachu, aswanpas profeta*f** Jonasta sucedesqallantan milagrota hina rikuchinqa.

³⁰Imaynan Nínive llaqta runakunapaq Jonasqa huk milagro hina karqan, ahinallataqmi Diospa Kachamusqan Runapas*f** kay tiempo runakunapaq huk milagro hina kasaq.

³¹Sabá suyu reinan sinchi karumanta Salomonpa yachayninta uyariq hamurqan, kunantaqmi kaypi kashan Salomonmantapas aswan yachayniyoqqa. Chayraykun taripay p'unchaypi chay reina hatarimuspa kay tiempo runakunata huchachanqa.

³²Nínive llaqta runakunan Jonaspa willakusqanwan Diosman kutirikurqanku, kunantaqmi kaypi kashan Jonasmantapas aswan allin willakuqqa. Chayraykun taripay p'unchaypi chay runakuna hatarimuspa kay tiempo runakunata huchachanqa.

³³Manan pipas lamparata hap'ichispaqa pakamanpaschu raki ukhumanpaschu churan, aswanmi k'anchana pataman churan, haykumuqkuna k'anchayta rikunankupaq.

³⁴Ñawiqa lámpara hinan cuerpota k'anchan, chaymi ñawiyki allin kashan chayqa lliw cuerpoykipas k'anchayniyoq kanqa, mana allinchus ñawiyki kashan chayqa, cuerpoykipas tutayaqllataqmi kanqa.

³⁵Chay hinaqa cuidakuy, qanpi kaqqa k'anchaymi, manataq tutayaqchu.

³⁶Ahinaqa lliw cuerpoyki k'anchayniyoq kaspaqa, mana imallanpas tutayaq kaqtinqa, llapanmi cuerpoyki k'anchanqa, lamparaq k'anchaynin k'anchasqasuykita hina, nispa.

³⁷Rimayta tukuqtintaq huk fariseoqa*f** Jesusta waqyarqan paywan mikhunanpaq, chaymi Jesusqa wasiman haykuspa mikhuq tiyaykurqan.

³⁸Mikhunanpaq Jesusqa mana mayllikuqtintaq fariseoqa*f** muspharqan.

³⁹Chaymi Señor Jesusqa payta nirqan: —Qankunaqa fariseokuna*f** vasotapas platotapas patallantan mayllinkichis, sonqoykichistaq ichaqa suwakuywan mana allin ruwaywan hunt'a kashan.

⁴⁰¡Mana yuyayniyoqkuna! ¿Diosqa manachu patantapas ukhuntapas ruwallarqantaq?

⁴¹Aswanpas platoykichismanta wakchakunaman qoychis, chay hinapin qankunapaqqa lliw imapas ch'uya kanqa.

⁴²¡Ay qankunamanta, fariseokuna*f**! Hierba buenamanta, rudamanta, llapa yuyukunamantawanmi diezmota qoshankichis, ichaqa manan runakunapaq chanintachu ruwankichis, manallataq Diostapas munakunkichischu. Chaykunatan ruwanaykichispuniqa karqan, diezmo qoytapas mana qonqaspa.

⁴³¡Ay qankunamanta, fariseokuna*f**! Diosmanta yachachina wasikunapin allinkaq tiyanakunallapi tiyayta munankichis, plazakunapipas napaykunatan munankichis.

⁴⁴¡Ay qankunamanta! Mana rikhuriq aya p'ampanakuna hinan kankichis, runakunan mana yachaspa patanta purinku, nispa.

⁴⁵Chaymi Diospa kamachikuyninta yachachiqkunamanta huknin payta nirqan: —Yachachikuq, chayta nispaqa ñoqaykutapas k'amishawankikun, nispa.

⁴⁶Chaymi Jesusqa nirqan: —¡Ay qankunamantapas, Diospa kamachikuyninta yachachiqkuna! Llasa q'epikunatan runakunaman q'epichinkichis, qankunataq ichaqa mana huk dedollaykichiswanpas q'epikunata yanapaykunkichischu.

⁴⁷¡Ay qankunamanta! Machulaykichismi profetakunata*f** wañuchirqanku, qankunataq chay p'ampasqakuna patapi yuyarina saywata ruwankichis.

⁴⁸Chay hinaqa, qankunan machulaykichispa ruwasqankunata yachaqkunapas “Allinmi” niqkunapas kankichis. Paykunaqa wañuchirqankupunin, qankunataq ichaqa ayanku p'ampasqa patapi yuyarina saywata ruwankichis.

⁴⁹Chayraykun Diospa yachayninqa nirqan: —Profetakunatapas*f** apostolkunatapas*f** paykunamanqa kachasaqmi, wakinninkutan wañuchinqaku, wakinninkutataq qatiykachanqaku, nispa.

⁵⁰Kay pacha kamasqamantapachan llapallan profetakuna*f** wañuchisqa kasqanmanta kay tiempo runakuna manuchasqa kanqa,

⁵¹Abelta wañuchisqamanta Zakariasta wañuchisqakama. Zakariastan Dios yupaychana wasi altar qayllapi wañuchirqanku. Arí, niykichismi, qankunan manuchasqa kankichis.

⁵²¡Ay qankunamanta, Diospa kamachikuyninta yachachiqkuna! Qankunaqa Dios reqsiytan runakunaman yachachinaykichis karqan, ichaqa huk hinatan yachachipurqankichis, Dios reqsiyta munaqkunatapas hark'arqankichismi, nispa.

⁵³Chaymanta Jesús lloqsiqtintaq kamachikuy simita yachachiqkunaqa fariseokunapiwan*f** sinchita paypaq phiñakapurqanku, imaymanamantataq tapupayarqanku

⁵⁴imapipas pantaqtinqa chayman tumpalla payta huchachanankupaq.