Read Quechua Cuzco Bible 1988 LUCAS 12 Bible Online

LUCAS 12 - Quechua Cuzco Bible 1988 bible

LUCAS 12

¹Waranqa-waranqa runakuna sarunakunankukama huñukamushanankamataq Jesusqa yachachisqankunamanraq nirqan: —Cuidakuychis fariseokunaq*f** qonchunmanta*f**, chayqa iskay uya-kayninkun.

²Manan imapas pakasqaqa kanchu mana rikhuriqqa, manataq ima pakasqapas kanchu mana yachakuqqa.

³Chaymi pakapi imapas nisqaykichisqa sut'ipi uyarisqa kanqa, wasi ukhupi ninrillaman imapas nisqaykichisqa wasi patakunamantan sut'i willasqa kanqa.

⁴Amigoykuna, qankunatan niykichis, ama manchakuychischu cuerpoykichista wañuchiqkunataqa, chaymantaqa manan ima ruwaytapas atinkumanñachu.

⁵Aswanpas niykichismi pitachus manchakunaykichista. Manchakuychisqa Diosta, paymi wañuchispa infiernoman wikch'uykunanpaq atiyniyoqqa. Arí, niykichismi, paytapuni manchakuychis.

⁶¿Manachu phisqa pichitankaqa iskay huch'uy qolqeman vendekun? Chaywanpas manan huknillantapas Diosqa qayllanpiqa qonqapunchu.

⁷Chay hinallataqmi chukchaykichispas llapallan yupasqa kashan. Chay hinaqa ama manchakuychischu, askha pichitankamantapas aswan chaniyoqmi kankichis, nispa.

⁸Pipas runakunaman “reqsinin” niwaqniymantaqa Diospa Kachamusqan Runapas*f** Diospa angelninkunaq qayllanpi “reqsinin” nillasaqtaqmi.

⁹Pipas runakunaman “manan reqsinichu” niwaqniytaqa Diospa angelninkunaq qayllanpipas “manan reqsinichu” nillasaqtaqmi.

¹⁰Pipas Diospa Kachamusqan Runa*f** contra imallatapas ninman chayqa, pampachasqan kanqa, Santo Espíritu contra mana allinta rimaspa pisichaqmi ichaqa, mana pampachasqachu kanqa, nispa.

¹¹Diosmanta yachachina wasikunaman, juezkunaman, kamachikuqkunamanpas pusasunkichis chayqa, aman llakikunkichischu imaynatachus kutichinaykichismanta imatachus ninaykichismantapas.

¹²Santo Espiritun chay kikin rato imatachus ninaykichistaqa yachachisunkichis, nispa.

¹³Runakuna ukhumantataq huk runa Jesusta nimurqan: —Yachachikuq, wawqeyta niykapuway herenciaykuta rakinakapunaykupaq, nispa.

¹⁴Jesustaq payta nirqan: —Yaw, runa, ¿pitaq qankuna ukhupi juezpaqpas rakiqpaqpas churawarqan? nispa.

¹⁵Chaymantataq runakunata nirqan: —Qhawariychis, tukuy imatapas munapayaymanta cuidakuychis. Runaqa askha kaqniyoq kashaspapas, manan ninmanchu: Kawsashallasaqmi, nispaqa, nispa.

¹⁶Chaymi huk rikch'anachiy simita paykunaman nirqan: —Huk qhapaq runan chakranmanta askhallataña cosecharqan.

¹⁷Hinaspan payqa sonqonpi nirqan: ¿Imanasaqmi? ¿Maymanñataq waqaychasaq kay cosechaytaqa? nispa.

¹⁸Kayta ruwasaq: Taqena wasiykunata thunispa aswan hatuchaqkunata sayarichisaq, chaymantaq lliw cosechayta kaqniykunatawan waqaychasaq,

¹⁹hinaspa sonqoyta nisaq: Sonqolláy, ñan askhaña kaqniykuna askha watapaq taqesqa kapuwan. Kunanqa, samakusaq, mikhukusaq, ukyakusaq, q'ochukusaq, nispay.

²⁰Diostaq ichaqa payta nirqan: —Mana yuyayniyoq runa, kunan tutan wañunki. Waqaychasqaykikunari, ¿pipaqtaq kanqa? nispa.

²¹Chhaynan payllapaq qhapaq-kayta waqaychaqqa, Diospa qhawarinanpaqmi ichaqa wakcha, nispa.

²²Chaymantataq Jesusqa yachachisqankunata nirqan: —Chayraykun niykichis, ama llakipakuychischu imatachus mikhunaykichismantapas imawanchus p'achakunaykichismantapas.

²³Kawsayqa mikhuymantapas aswan chaniyoqmi, cuerpopas p'achamantaqa aswan chaniyoqmi.

²⁴Qhawariychis alqamarikunata, manan tarpunkupaschu cosechankupaschu, manan despensankupas taqenkupas kanchu, chaywanpas Diosmi mikhuchin. Qankunaqa phalaq animalkunamantapas aswan chaniyoqmi kankichis.

²⁵¿Mayqenniykichistaq atinman llakikushaspan sayayninman huk chhikallantawanpas yapaykukuyta?

²⁶Chayllatapas ruwayta mana atishaspaykichisqa, ¿imapaqtaq imamantapas llakikunkichis?

²⁷Qhawariychis hamanq'ay t'ikakuna imaynatachus wiñasqanta, manan llank'ankupaschu phuskankupaschu. Niykichismi, rey Salomonpas qhapaqña kashaspapas, manan chay huknin t'ika hinallapas p'achakurqanchu.

²⁸Chay hinatan Diosqa campopi plantakunata p'achachin, chaykunan huk p'unchay wiñan qhepantin p'unchaytaq hornoman wikch'uykunku. ¿Chaychu Diosqa qankunatapas mana uywasunkichisman? ¡Qankunaqa pisi iñiyniyoqmi kankichis!

²⁹Chayrayku ama puriychischu: ¿Imatataq mikhuykusaqpas? ¿Imatataq ukyaykusaqpas? nispaqa. Amayá llakipakuychischu.

³⁰Tukuy chaykunamantaqa Diospi mana iñiq llapa runakunan llakipakunku. Yayaykichisqa yachanmi chaykuna pisisqasuykichista.

³¹Aswanpas munaychis tukuy imapi Dios kamachiqniykichis kananta, hinan chaykunata payqa qosunkichis, nispa.

³²Qankunaqa pisi ovejakuna hinallaña kaspapas, ama manchakuychischu, Yayaykichismi kamachikuyninpi kamachiysikunaykichista munan.

³³Kaqniykichista vendespa wakchakunaman qoychis, hinaspa mana thantakuq qolqe waqaychanata ruwakuychis, hanaq pachapi mana hayk'aq tukukuq qhapaq-kayta huñuychis, chaymanqa manan suwapas chayanchu, manallataq chaypiqa thutapas thutanchu.

³⁴Maypichus qhapaq-kayniykichis kashan, chayllapitaqmi sonqoykichispas kashan, nispa.

³⁵Listollaña kaychis, lamparaykichispas hap'ichisqallaña kachun.

³⁶Casarakuymanta patronninkuq kutimpunanta suyaq runakuna hina qankunapas kaychis, paykunan chayamuspa waqyakamuqtin punkuta usqhaylla kichanku.

³⁷Kusisamiyoqmi patronninkuq kutimuspa rikch'ashaqta tarisqan chay kamachikunaqa. cheqaqtan niykichis, kikin patronmi p'achanta allichakuspa mikhunankupaq tiyaykachispa servinqa.

³⁸Chawpi tutatapas, wallpa waqaytapas hamuspa chay hina suyashaqta paykunata tarinqa chayqa, kusisamiyoqmi chay kamachikunaqa.

³⁹Kayta ichaqa yachaychis, ima horatachus suwaq hamunanta wasiyoq yachanman chayqa, rikch'ashanmanpunin, hinaspan wasinta mana t'oqochinmanchu.

⁴⁰Diospa Kachamusqan Runaqa*f** mana suyasqaykichis horatan hamusaq, chayrayku listollaña kaychis, nispa.

⁴¹Chaymi Pedroqa Jesusta nirqan: —Señorníy, kay rikch'anachiy simitaqa, ¿ñoqallaykupaqchu, icha, llapapaqchu ninki? nispa.

⁴²Hinan Señor Jesusqa nirqan: —¿Pitaq allin yuyayniyoq hunt'aq mayordomoqa? Paytan patronqa wasinpi kaqkunata kamachinanpaq churan, tiempollanpi kamachinkunaman mikhunatapas qonanpaq.

⁴³Kusisamiyoqmi chay mayordomoqa kanqa patronnin hamuspa chay hina ruwashaqta tarinman chayqa.

⁴⁴Cheqaqtan niykichis, paytan patronqa churanqa tukuy kaqninkunata qhawananpaq.

⁴⁵Ichaqa chay mayordomochus sonqonpi ninman: Patronniyqa manaraqmi chayamunqachu, nispa. Hinaspa qhari kamachikunata warmi kamachikunata maqayta qallarinman, hinallataq mikhunman, ukyanman, machanmanpas chayqa,

⁴⁶patronninmi chayamunqa mana suyasqan p'unchaypi, mana yachasqan horapi, hinaspan sinchita suq'aykunqa, mana iñiyniyoqkunawan kuskatataq payta muchuchinqa.

⁴⁷Patronninpa munayninta yachashaspan mana wakichikuq, mana kasukuq kamachiqa aswan suq'aykusqan kanqa.

⁴⁸Patronninpa munayninta mana yachaspa suq'anapaq hina ruwaqmi ichaqa pisi suq'asqalla kanqa. Pimanchus Diosqa askhata qon, chaymantaqa askhallatataqmi mañanqa, pimanchus Diosqa aswan askhata hap'ichin, chaymantaqa aswan askhallatataqmi mañanqa.

⁴⁹Ñoqaqa ninatan kay pachaman apamurqani. Chhaynaqa, maytan munayman rawrashanantaña.

⁵⁰Sinchi ñak'arinaymi kashan, maytapunin llakikushani hunt'akunankama.

⁵¹¿Yuyankichischu hamusqaywan kay pachaqa thak kananta? Manan, aswanpas t'aqanachiqmi hamuni.

⁵²Kunanmantan huk familiapi phisqa t'aqanasqa kanqaku, kinsan iskaypa contranpi, iskaytaq kinsaq contranpi.

⁵³T'aqanasqan kanqaku, taytan churin contra, churitaq taytan contra, mamataq ususin contra, ususitaq maman contra, suegrataq qhachunin contra, qhachuntaq suegran contra, nispa.

⁵⁴Runakunatapas nillarqantaq: —Inti haykuy ladomanta phuyu lloqsimuqta rikuspaykichismi ninkichis: Paramunqan, nispa, paranpunitaq kanpas.

⁵⁵Uray wayra wayramuqtinmi ninkichis: Ruphaykunqan, nispa, ruphaykunpunitaq kanpas.

⁵⁶¡Iskay uyakunan kankichis! Cieloqpas kay pachaqpas imayna kasqanta qhawaytan yachankichis, ¿imaynataq kay p'unchaykunapi imayna kasqanta manari reparankichischu?

⁵⁷¿Imaraykutaq kikiykichispas manari chaninkaqta reqsinkichischu?

⁵⁸Awqaykiwan gobernadorman rispaykiqa ñanllapiraq paywan allipunay, paqtan juezman aysaykusunkiman, jueztaq alcaideman hap'ichisunkiman, alcaidetaq watay wasiman apaykusunkiman.

⁵⁹Chaymantaqa manapunin lloqsimunkichu llapallan manukusqaykita kutichipunaykikama, nispa.