Read Quechua Cuzco Bible 1988 LUCAS 13 Bible Online

LUCAS 13 - Quechua Cuzco Bible 1988 bible

LUCAS 13

¹Chay tiempon wakin runakuna Jesusman rispa willarqanku: —Galilea provincia runakunan sacrificio haywanankupaq animalkunata wañuchishaqtinku, Pilatoqa paykunata wañuchirqan, hinan yawarninkuqa animalkunaq yawarninwan chhaqrukurqan, nispa.

²Chaymi Jesusqa paykunata nirqan: —¿Yuyankichischu chay runakuna Galilea provinciapi tiyaq runakunamanta aswan huchasapa kaspanku wañuchisqa kasqankuta?

³Manapunin, aswanqa qankunapas manachus Diosman kutirikunkichis chayqa, llapallaykichismi wañunkichispuni.

⁴Chunka pusaqniyoq runakunatan Siloé qochana qayllapi torre thunikuspa wañuchirqan, ¿yuyankichischu chay runakunaqa Jerusalén llaqtapi llapallan tiyaqkunamanta aswan huchasapa kaspanku wañusqankuta?

⁵Manapunin, aswanqa qankunapas manachus Diosman kutirikunkichis chayqa, llapaykichismi wañunkichispuni, nispa.

⁶Kay rikch'anachiy simitan Jesusqa nirqan: —Huk runaq uvas chakranpin higos sach'a mallkisqa karqan. Chakrayoqqa higosta pallaq rispataq mana tarirqanchu,

⁷chaymi uvas chakra llank'aqta nirqan: —Qhawariy, kaywanqa kinsa watañan kay higos sach'aq rurun pallaq hamusqay, manataqmi tarinichu. Wit'upuy, ¿imapaqñataq hallp'atapas usuchinqa? nispa.

⁸Chaymi payqa nirqan: —Wiraqocháy, saqeykuyraq kay watatawan, muyuriqninta hasp'ispay wanuwan churasaq.

⁹Rurunqataqchus chayqa allinmi kanqa, mana ruruqtintaq wit'upunki, nispa.

¹⁰Diosmanta yachachina wasipin Jesusqa samana p'unchaypi yachachisharqan.

¹¹Chaypin kasharqan chunka pusaqniyoq wataña supaypa onqochisqan warmi, paymi k'umuykuspallaña puriq, manataq imaynamantapas cheqanyayta atiqchu.

¹²Hinan Jesusqa payta waqyaspa nirqan: —Warmi, onqoyniykin kacharipusunki, nispa.

¹³Hinaspan payta llamiykuqtin hina cheqanta sayarispa Diosta hatuncharqan.

¹⁴Diosmanta yachachina wasipi kamachikuqtaq samana p'unchaypi Jesuspa qhaliyachisqanmanta phiñakuspa runakunata nirqan: —Llank'anapaqqa soqta p'unchaymi, chay p'unchaykunapi qhaliyachisqa kanaykichispaqqa hamuychis, amataq samana p'unchaypichu, nispa.

¹⁵Chaymi Señor Jesusqa payta nirqan: —Iskay uyakuna, ¿manachu samana p'unchaypi sapankaykichis wakaykichistapas asnoykichistapas uywa kanchamanta kacharispa unu ukyaqta qatinkichis?

¹⁶¿Chaychu kay warmita, Abrahampa ususin kashaqtin, chunka pusaqniyoq wataña Satanaspa watasqanta samana p'unchaypi mana paskayman karqan? nispa.

¹⁷Chaykunata niqtinmi lliw awqankunaqa p'enqarikurqanku. Llapan runataq ichaqa paypa musphana ruwasqankunamanta kusikurqanku.

¹⁸Jesusmi nillarqantaq: —¿Imamanmi Diospa kamachikushasqanqa rikch'akun? ¿Imamantaq rikch'achisaq?

¹⁹Mostaza muhumanmi rikch'akun, chaytan huk runaqa huertanpi tarpurqan, wiñaspanmi hatun sach'a kapurqan, phalaq animalkunataq k'allmankunapi q'esachakurqan, nispa.

²⁰Jesusmi nillarqantaq: —¿Imamantaq Diospa kamachikushasqantaqa rikch'achisaq?

²¹Qonchumanmi rikch'akun, chaytan huk warmi kinsa tupu hak'upi piturqospa lliw poqonankama saqeykun, nispa.

²²Jesusmi Jerusalén llaqtaman rishaspa, llapa llaqtakunapi huch'uy llaqtakunapiwan yachachirqan.

²³Chay purisqanpin huk runa payta tapurqan: —Señor, ¿pisillachu qespikunqaku? nispa. Jesustaq paykunata nirqan:

²⁴—K'illku punkun haykuymanta wañukuychisraq. Niykichismi, askhan haykuyta munanqaku, manataq atinqakuchu.

²⁵Punkuta wasiyoq wisq'amuqtinmi hawamanta punku takayta qallarinkichis: ¡Wiraqocháy, kicharimuwayku! nispa. Paytaq nimusunkichis: Manan reqsiykichischu, manataqmi yachanichu maymantachus kasqaykichistapas, nispa.

²⁶Hinaqtinmi qankunaqa ninkichis: Kuskan mikhurqanchis ukyarqanchis, plazaykupitaqmi yachachirqankipas, nispa.

²⁷Hinan nimusunkichis: Manapunin reqsiykichischu, manataqmi yachanichu maymantachus kasqaykichistapas. Ñoqamanta anchhuriychis, llapa mana chanin ruwaqkuna, nispa.

²⁸Chaypachan Abrahamta, Isaacta, Jacobta, llapa profetakunatawan*f** Diospa kamachikushasqanpi rikunkichis, qankunataq ichaqa wikch'usqa kankichis, hinan waqaykunkichis k'achachachankichis.

²⁹Runakunan inti lloqsimuymanta, inti haykuymanta, wichaymanta, uraymanta hamuspanku Diospa kamachikushasqanpi hatun mikhuy mikhuq tiyaykunqaku.

³⁰Qhepa kaqkunan ñawpaq kanqaku, ñawpaq kaqkunataq qhepa kanqaku, nispa.

³¹Chay raton wakin fariseokuna*f** payman hamuspa nirqanku: —Herodesmi wañuchiyta munashasunki, kaymanta ripuy, nispanku.

³²Jesustaq paykunata nirqan: —Rispaykichis chay atoqta nimuychis: Pisi p'unchaykunallañan supaykunata qarqosaq, onqosqakunatapas qhaliyachisaq, chaymantataqmi ruwanayta tukusaq, nispa.

³³Chaywanpas kay p'unchaykunaqa Jerusalenman chayanaypuniraqmi. Manan profetaqa*f** wak llaqtapiqa wañunmanchu aswanpas Jerusalén llaqtallapipunin.

³⁴¡Jerusalén, Jerusalén! Qanmi kanki profetakunata*f** wañuchiq, qanman Diospa kachamusqankunatapas ch'aqeq. ¡Askha kutitan munarqani wawaykikuna huñuykuyta imaynan wallpapas raphran ukhupi chiwchinkunata oqllaykun hinata, manataq munarqankichu!

³⁵Chay hinaqa, wasiykichismi purunyapunqa. Niykichismi, manan rikuwankichisñachu: ¡Saminchasqa kachun Señor Diospa sutinpi hamuqqa! nispa, ninaykichis tiempo chayamunankama, nispa.