Read Quechua Cuzco Bible 1988 LUCAS 16 Bible Online

LUCAS 16 - Quechua Cuzco Bible 1988 bible

LUCAS 16

¹Jesusqa yachachisqankunata nillarqantaqmi: —Huk qhapaq runaqmi mayordomon karqan, paymi patronninpa kaqninkunata tukushasqanmanta huchachasqa karqan.

²Chaymi payta waqyaspa nirqan: —Mana allin rimaykunatan qanmanta uyarishani. Mayordomo-kayniykimanta cuentata qoway, manañan mayordomoyqa kawaqchu, nispa.

³Hinan mayordomoqa sonqonpi nirqan: —¿Imanaykusaqtaq patronniy mayordomo-kayniymanta wikch'upuwaqtinqa? Chakrapi llank'aytapas manan atiymanchu, mañapakuytapas p'enqakullanitaqmi.

⁴Mayordomo-kayniymanta wikch'uwaqtinqa, ¿imanasaqtaq wasinkupi runakuna chaskiwanankupaq? Yachanin ima ruwaytapas, nispa.

⁵Chaymi patronninpa sapanka manunkunata waqyaspa ñawpaqkaqta nirqan: —¿Hayk'a manun patronniyman kanki? nispa.

⁶Manutaq nirqan: —Pachak barril olivo aceiten, nispa. Paytaq nirqan: —Manukusqayki qelqata hap'iy, hinaspa usqhaylla phisqa chunkallamantaña qelqay, nispa.

⁷Hukkaqtapas nillarqantaq: —Qanrí, ¿hayk'a manun kanki? nispa. Hinan manuqa nirqan: —Pachak carga trigon, nispa. Paytataq nirqan: —Manukusqayki qelqata hap'iy, hinaspa pusaq chunkallamantaña qelqay, nispa.

⁸Chaymi patronninqa chay mana allin mayordomota yuyaywan ruwasqanmanta “allinmi” nirqan. Niykichismi: Kay pacha kaqkunallapi yuyaq runakunaqa runamasinku ukhupin aswan yuyaysapa kanku Diospa wawankunamantaqa.

⁹Chayrayku kay pacha qhapaq-kayniykichiskunawan amigokunata tariychis, ahinapin qhapaq kaykuna pisisuqtiykichis Diosqa wiñaypaq wasinpi chaskisunkichis, nispa.

¹⁰Pisillapi hunt'aqqa askhapipas hunt'aqllataqmi, pisillapipas mana chaninkunaqa askhapipas mana chanillantaqmi.

¹¹Kay pacha qhapaq kaykunapichus mana hunt'aq kankichis chayqa, ¿piñan confiasunkichisman hanaq pacha cheqaq qhapaq-kayta?

¹²Hukpa kaqninpichus mana hunt'aq kankichis chayqa, Diosri, ¿herenciaykichista qosunkichismanchu?

¹³Manan pi kamachipas iskay patrontaqa serviyta atinmanchu, huknintan munakunman, huknintataq cheqnikunman, otaq hukninman k'askakunman, huknintataq pisichanman. Manan Diostawan qhapaq-kaytawanqa serviyta atiwaqchischu, nispa.

¹⁴Qolqe sonqo fariseokunan*f** tukuy chaykunata uyarispa Jesusta asipayarqanku.

¹⁵Hinaqtinmi Jesusqa paykunata nirqan: —Qankunan kankichis runakunaq ñawpaqenpi kikiykichista chaninchakuq, ichaqa Diosmi sonqoykichista reqsin, runakunaq ancha allinpaq rikusqanqa Diospa ñawpaqenpin ancha millay, nispa.

¹⁶Jesusmi nillarqantaq: —Diospa kamachikuynin simipas profetakunaq*f** qelqasqanpas Bautizaq Juanpa willakuyta qallarisqankamallan karqan, chaymantapachan Diospa kamachikushasqanqa willasqa, llapataq chaymanqa haykuytapuni munanku.

¹⁷Cielopas kay pachapas chinkapuy atiqllan, Diospa kamachikuynin simiqmi ichaqa mana huk seq'ellanpas chinkanqachu.

¹⁸Pipas warminta wikch'upuspa huk warmiwan casarakunman chayqa wasanchanmi, pipas qosanpa wikch'upusqan warmiwan casarakunman chayqa wasanchanmi, nispa.

¹⁹Jesusqa nillarqantaqmi: —Huk qhapaq runan karqan sani-puka ancha chaniyoq p'achallawan p'achakuq, sapa p'unchaytaq sumaq mikhunawan q'ochukuq.

²⁰Kallarqantaqmi Lázaro sutiyoq wakcha runa lleq-nisqa cuerpoyoq, paymi qhapaqpa wasin punkupi wikch'usqa kashaq.

²¹Qhapaqpa mesanmanta ususqakunawanmi saksaykuyta munaq. Alqokunallañan asuykuspa lleq-nisqa cuerpontapas llaqwaq.

²²Chay hina kashaspan wakchaqa wañukapurqan, hinan Abrahampa kasqanman angelkuna pusarqan. Hinallataq qhapaqpas wañukapurqan, hinan p'ampapurqanku.

²³Ukhu-pachapitaq qhapaqqa manchay ñak'ariypi kashaspa, karumanta qhawarispa Abrahamtawan Lazarotawan rikurqan.

²⁴Hinaspan payqa waqyakurqan: —Taytáy Abraham, khuyapayawaspayki Lazarota kachamuway, dedo puntallanpipas unuta apamuwaspa qalluyta thasnuykunanpaq, kay rawraypin manchayta ñak'arishani, nispa.

²⁵Abrahamtaq payta nirqan: —Churíy, yuyariy allinkunallapi kawsasqaykita, Lazarotaq mana allinkunapi kawsasqanta, kunanqa paymi kaypi sonqochasqa kashan, qantaq manchayta ñak'arishanki.

²⁶Chaywanpas, ñoqaykutawan qankunatawanqa huk sinchi hatun ukhu wayq'on t'aqashawanchis, kaymanta qankunaman chimpayta munaqkunaqa manan atinkuchu, manallataq chaymanta kayman chimpamuytapas atinkuchu, nispa.

²⁷Hinan nirqan: —Chhaynaqa, taytáy, valekuykin Lazarota taytaypa wasinman kachanaykipaq.

²⁸Phisqa wawqeyoqmi kani, paykunaman willamuchun, chay hinapi paykunapas kay manchay ñak'ariy pachaman ama hamunankupaq, nispa.

²⁹Abrahamtaq nirqan: —Moisespa qelqasqankunata profetakunaqtapas*f** hap'ishankun, chaykunata kasukuchunku, nispa.

³⁰Hinaqtinmi qhapaqqa nirqan: —Manan, taytáy Abraham, pipas wañusqamanta kawsarispa paykunaman riqtinmi ichaqa, Diosman kutirikunqaku, nispa.

³¹Abrahamtaq payta nirqan: —Manachus Moisestapas profetakunatapas*f** uyarinqaku chayqa, wañusqamantaña huknin kawsarimuspa riqtinpas manan kasukunqakuchu, nispa.