Read Quechua Cuzco Bible 1988 LUCAS 17 Bible Online

LUCAS 17 - Quechua Cuzco Bible 1988 bible

LUCAS 17

¹Jesusmi yachachisqankunata nirqan: —Runakunata misk'achiqkunaqa kanqapunin, ichaqa, ¡ay chay misk'achiq runamanta!

²Paypaqqa aswan allinmi kanman karqan molino rumita kunkanman warkuykuspa mama qochaman wikch'uykunanku kay huch'uykunamanta hukninta huchaman urmachinanmantaqa.

³Chhaynaqa, kikiykichista qhawakuychis. Wawqeyki qan contra huchallikuqtinqa payta anyaykuy, huchanta reqsikuqtintaq pampachaykuy.

⁴Huk p'unchaypi qanchis kuti qan contra huchallikuspa. qanchis kutillatataq chay p'unchaypi asuykamusunkiman: —Huchallikunin, nispa, chayqa, pampachankin payta, nispa.

⁵Apostolkunataq*f** Señor Jesusta nirqanku— Astawan iñinaykupaq yanapaykuwayku, nispa.

⁶Hinan Señor Jesusqa nirqan:— Huk mostaza ruru sayayllapas iñiyniykichis kanman chayqa, kay sicómoro sach'ata niwaqchismi: T'irakuspa mama qochapi mallkikamuy, nispa, hinan kasusunkichis.

⁷Kamachiykichista yapumusqanmantapas uywa michimusqanmantapas kutimuqtinqa, ¿mayqenniykichistaq niwaqchis: Asuykamuy, mikhunaykipaq tiyaykuy, nispa?

⁸Manan mayqenniykichispas niwaqchischu, aswanqa niwaqchismi: Cenayta wayk'umuy, p'achaykita allichakuspataq haywamuway mikhunay ukyanaykama, chaymantaña qanqa mikhunkipas ukyankipas, nispa.

⁹Chay kamachitaqa manan “gracias” nillanpaschu kamachisqanta ruwasqanmantaqa.

¹⁰Chay hinallataq qankunapas tukuy kamachisqakunata ruwaspaykichisqa, ninkichis: —Kay hina kamachiykikunallan kayku, ima ruwanallaykutan ruwapuykiku, nispa.

¹¹Jerusalén llaqtata Jesús rishaspataqmi, Galilea provinciawan Samaria provinciawan tupay qorpanta pasarqan.

¹²Hinan huk huch'uy llaqtaman haykushaqtin, chunka runa aycha qarapi millay onqoyniyoq payman hamurqanku. Karullapi sayaykuspataq

¹³kunkayoqta waqyakurqanku: —Wiraqochayku Jesús, khuyapayaykuwayku, nispa.

¹⁴Jesustaq paykunata qhawarispa nirqan: —Riychis, sacerdotekunawan qhawachikamuychis, nispa. Rishaqtinkutaqmi alliyasqa karqanku.

¹⁵Chaymi hukninku alliyasqa kasqanta rikukuspa kutirqamurqan alto kunkawan Diosta yupaychaspa.

¹⁶Hinaspa Jesuspa ñawpaqenpi pampakama k'umuykuspa graciasta qorqan. Payqa Samaria runan karqan.

¹⁷Jesustaq nirqan: —¿Manachu alliyasqakunaqa chunka karqanku? ¿Maypitaq isqonri?

¹⁸¿Kay wak llaqtayoq runallachu Diosta hatunchaqqa kutimun? nispa.

¹⁹Chay runatataq nirqan: —Sayarispa ripuy, Diospi iñiyniykin qhaliyachisunki, nispa.

²⁰Hayk'aqchus Diospa kamachikunan qallarinanmanta fariseokuna*f** tapuqtinkutaq Jesusqa nirqan: —Diospa kamachikunan qallarisqantaqa manan señalkunawanraqchu yachawaqchis,

²¹manataqmi ninkumanchu: —¡Kaypin kashan! ¡Haqaypin kashan! nispapas. Diosqa qankuna ukhupin kamachikushanña, nispa.

²²Yachachisqankunatataq nirqan: —Tiempon chayamunqa, Diospa Kachamusqan Runaq*f** kay pachaman kutimunay punch'ayta rikuyta munanaykichis, manataqmi rikuyta atinkichischu.

²³Hinan runakunaqa nisunkichis: ¡Kaypin kashan! ¡Haqaypin kashan! nispa. Ichaqa aman kasunkichischu, amataqmi qhepankutapas rinkichischu.

²⁴Imaynan rayoqa tukuy hinantinman lliphllikispa k'ancharin, chay hinallataqmi Diospa Kachamusqan Runaq*f** kutimuyniypas kanqa.

²⁵Ichaqa ñawpaqtaraqmi sinchita ñak'arinay, hinaspataq kay tiempo runakunaq qhawarparisqan kanay.

²⁶Imaynan Noepa p'unchayninkunapi karqan, chay hinallataqmi Diospa Kachamusqan Runaq*f** kutimunaypaqpas kanqa.

²⁷Tuyuq wasiman Noepa haykusqan p'unchaykaman mikhusharqanku, ukyasharqanku, casarakusharqanku, casarakunapaq rimanakusharqanku, millp'uq unu chayamuspataq llapallanta millp'urqan.

²⁸Kaqllataqmi Lotpa p'unchayninkunapipas karqan, mikhusharqanku, ukyasharqanku, rantisharqanku, vendesharqanku, tarpusharqanku, wasita sayarichisharqanku.

²⁹Lotpa Sodoma llaqtamanta lloqsimusqan p'unchaymi ichaqa, cielomanta azufreyoq nina para chayamurqan, hinaspan llapallanta p'uchukarqan.

³⁰Chay hinallataqmi kanqa Diospa Kachamusqan Runaq*f** rikhurimusqay p'unchaypipas.

³¹Chay p'unchaypiqa wasi patapi kaqqa amaña uraykuchunchu wasipi kaqninkunata horqonanpaq, chhaynallataq chakrapi kaqpas wasinman ama kutimuchunñachu.

³²Lotpa warminta imachus sucedesqanta yuyariychis.

³³Pipas pay kikillanta waqaychakuyta munaqqa chinkapunqan, pipas wañuqmi ichaqa wiñaypaq kawsanqa.

³⁴Niykichismi, chay tutapin huk puñunapi iskay puñushanqaku. Hukninmi apasqa kanqa, huknintaq saqesqa.

³⁵Iskay warmin kuska kutashanqaku. Hukninmi apasqa kanqa, huknintaq saqesqa. [

³⁶Iskay runan chakrapi kashanqaku. Hukninmi apasqa kanqa, huknintaq saqesqa,] nispa.

³⁷Chaymi uyariqkunaqa payta tapurqanku: —Señor, ¿maypitaq chaykunaqa sucedenqa? nispa. Hinan paykunata nirqan: —Maypichus wañusqa kashanqa chaymanmi kunturkunapas huñukunqa, nispa.