Read Quechua Cuzco Bible 1988 LUCAS 18 Bible Online

LUCAS 18 - Quechua Cuzco Bible 1988 bible

LUCAS 18

¹Mana chiriyaspa mañakunapuni kasqanta yachachispanmi Jesusqa huk rikch'anachiy simita paykunaman nirqan:

²—Huk llaqtapin karqan huk juez Diostapas mana manchakuq, runatapas mana manchakuq.

³Kallarqantaq chay llaqtapi huk viudapas. Paymi sapa kuti juezman riq awqanmanta qespichinanpaq chaninchayta mañakuspa.

⁴Chaymi juezqa unayña mana munashaspapas sonqonpi nirqan: —Diosta mana manchakushaspaypas, runata mana manchakushaspaypas,

⁵hinata kay viudapaq qatiykachawasqanrayku chaninchapusaq, amaña hamupayawaspa umayta nanachiwananpaq, nispa, nispan.

⁶Señor Jesusmi nillarqantaq: —Uyariychis chay mana chanin juezpa nisqanta.

⁷Diosqa akllakusqankunapaq chaninchapunqapunin, payta tuta p'unchay waqyakushaqtinku. Payqa manan unaytachu suyachikunqa.

⁸Arí, usqhayllan paykunapaq chaninchapunqa. Ichaqa Diospa Kachamusqan Runa*f** hamuspayqa, ¿Diospi iñiq runakunata kay pachapi tarisaqchu? nispa.

⁹Chanin kasqankuta yuyaspa hukkunata pisichaqkunamanmi kay rikch'anachiy simitapas Jesusqa nillarqantaq:

¹⁰—Iskay runan Dios yupaychana wasiman wicharqan mañakuq. Hukninmi karqan fariseo*f**, huknintaq contribución cobraq.

¹¹Fariseon*f** sayaykuspa payllapaq kay hinata mañakurqan: Diosníy, graciastan qoyki, manan wakin runakuna hinachu kani suwakuq, mana chanin, wasanchaq, manallataq kay contribución cobraq hinapaschu kani.

¹²Iskay kutitan semanapi ayunani, tukuy ima tarisqaymantan diezmota qoyki, nispa.

¹³Contribución cobraqtaq ichaqa karullapi sayaykuspa hanaq pachata qhawariyllatapas mana munarqanchu, aswanmi llakikuymanta qhasqonta takakuspa mañakurqan: Diosníy, ñoqa huchasapata khuyapayaykuway, nispa.

¹⁴Niykichismi, chay contribución cobraqmi wasinta Diospa chaninchasqan kutipurqan, manataq fariseoqa*f**. Pipas hatunchakuqqa k'umuykachisqan kanqa, k'umuykukuqtaqmi hatunchasqa kanqa, nispa.

¹⁵Jesusmanmi wawakunata pusamurqanku llamiykunanpaq, yachachisqankunataq chayta rikuspa paykunata phiñarirqan.

¹⁶Jesustaq paykunata nirqan: —Wawakunaqa hinalla ñoqaman hamuchunku, ama paykunata hark'aychischu, Diosqa kay wawakuna hina kaq runakunallatan kamachinqa.

¹⁷Cheqaqtan niykichis, wakin runakunaqa wawa hinan Diosta kamachiqninkupaq chaskinku, pipas Diosta mana chay hinata chaskiqqa manapunin Diospa kamachisqanchu kanqa, nispa.

¹⁸Huk uma runan Jesusta tapurqan: —Allin yachachikuq, ¿imatan ruwasaq wiñay kawsayniyoq kanaypaq? nispa.

¹⁹Hinan Jesusqa payta nirqan: —¿Imaraykun “allin” niwanki? Manan pipas kanchu “allinqa”, aswanpas sapan Diosllan.

²⁰Diospa kamachikuy siminkunataqa yachankin riki: Aman wasanchankichu. Aman pitapas wañuchinkichu. Aman suwakunkichu. Aman llullakuspa tumpankichu. Taytaykita mamaykita yupaychanki, nisqata, nispa.

²¹Hinan payqa Jesusta nirqan: —Tukuy chaykunataqa waynacha kasqaymantapachan hunt'arqani, nispa.

²²Jesustaq chayta uyarispa payta nirqan: —Kanraqmi ruwanayki, llapan kaqniykita vendemuspa wakchakunaman qomuy, hinan hanaq pachapi qhapaq-kayniyki kanqa, kutimuspaykitaq qhepayta hamuy, nispa.

²³Hinaqtinmi chay runaqa chaykunata uyarispan anchata llakikurqan, sinchi qhapaq kasqanrayku.

²⁴Jesustaq ancha llakisqa kasqanta rikuspa nirqan: —May sasapunin qhapaqkunapaqqa Diosta kamachiqninkupaq chaskiyqa kanqa.

²⁵Camello nisqa animalraqmi yawriq ninrinta suchuyta atinman Diosta kamachiqninpaq qhapaqpa chaskinanmantaqa, nispa.

²⁶Hinan chayta uyariqkunaqa nirqanku: —Chhaynaqa, ¿pillañataq qespichisqaqa kanman? nispa.

²⁷Chaymi Jesusqa nirqan: —Runakunapaqqa mana atinan, Diospaqmi ichaqa atikun, nispa.

²⁸Hinaqtinmi Pedroqa nirqan: —Ñoqaykuqa lliw imaymanaykuta saqespan qhepaykita hamuyku, nispa.

²⁹Chaymi Jesusqa paykunata nirqan: —Cheqaqtan niykichis: Pipas wasinta, tayta-mamanta, wawqenkunata, warminta, wawankunata, Diospa kamachisqan kananrayku saqemuqqa,

³⁰kay tiempopin ancha askhata chaskinqa, qhepa tiempopitaq wiñay kawsayta chaskinqa, nispa.

³¹Jesusqa chunka iskayniyoq yachachisqankunata sapaqman pusaspan nirqan: —Kunanqa Jerusalén llaqtamanmi wicharishanchis, Diospa Kachamusqan Runamanta*f** profetakunaq*f** lliw qelqasqanmi hunt'akunqa.

³²Mana Judío runakunamanmi hap'ichisqa kasaq, paykunan asipayawanqaku, k'amiwanqaku, thoqaykuwanqaku ima.

³³Suq'aykuwasqanku qhepatataq wañuchiwanqaku, ichaqa kinsakaq p'unchaypitaq kawsarimpusaq, nispa.

³⁴Paykunataq mana chaykunata entienderqankuchu, manataq yacharqankuchu imamantachus rimasqantapas.

³⁵Jericó llaqtaman Jesusqa sispaykushaqtinmi, huk ñawsa ñan patapi limosnata mañakuspa tiyasharqan.

³⁶Askha runaq purisqanta uyarispataq imachus kasqanta tapukurqan.

³⁷Nazaret llaqtayoq Jesuspa purishasqanta willaqtinkutaq

³⁸ñawsaqa waqyakurqan: —¡Jesús! ¡Rey Davidpa miraynin! ¡Khuyapayaykuway! nispa.

³⁹Ñawpaqta riqkunataq phiñarikurqanku upallananpaq. Ñawsataq ichaqa aswantaraq waqyakurqan: —¡Rey Davidpa miraynin! ¡Khuyapayaykuway! nispa.

⁴⁰Chaymi Jesusqa sayaykuspa kamachikurqan pusamunankupaq. Asuykamuqtintaq payta tapurqan:

⁴¹—¿Ima ruwapunaytan munanki? nispa. Ñawsataq nirqan: —Señor, qhawarichiwanaykitan munani, nispa.

⁴²Jesustaq payta nirqan: —¡Qhawariy! Diospi iñiyniykin qhaliyachisunki, nispa.

⁴³Hinan kaq rato qhawarirqan, hinaspan Jesuspa qhepanta ripurqan Diosta hatunchaspa. Llapa runataq chayta rikuspa Diosta yupaycharqanku.