Read Quechua Cuzco Bible 1988 LUCAS 19 Bible Online

LUCAS 19 - Quechua Cuzco Bible 1988 bible

LUCAS 19

¹Jericó llaqtaman haykuspa, chayninta Jesús rishaqtinmi,

²huk qhapaq qhari, Zaqueo sutiyoq, chaypi kasharqan, paymi contribución cobraqkunaq huknin umallin karqan.

³Jesustan rikuytapuni munarqan pichus kasqanta reqsinanpaq. Taksalla kaspataq, Jesusta mana rikuyta atirqanchu askha runakuna kaqtin.

⁴Chaymi phawaylla ñawpaspa, Jesusta rikunanpaq sicómoro sach'aman wicharqan, chayninta Jesusqa rinan kaqtin.

⁵Jesustaq chayneqman chayaspa, sach'ata qhawarispa nirqan: —Zaqueo, usqhaylla uraykamuy, kunanmi wasiykipi qorpachakunaypuni, nispa.

⁶Chaymi Zaqueoqa usqhaylla uraykamuspa kusisqa payta chaskirqan.

⁷Chayta rikuspataq llapanku rimarqanku: —Huchasapa runaq wasinmanmi qorpachakuq haykun, nispanku.

⁸Zaqueotaq sayarispa Señor Jesusta nirqan: —Señorníy, kaqniykunaq kuskannintapas wakchakunaman qosaqmi, imapitaqchus pimantapas q'otuspa suwakurqani chayqa, tawatañan kutichipusaq, nispa.

⁹Chaymi Jesusqa payta nirqan: —Kunan p'unchaymi familiantinta Dios qespichisunki, qanpas Abrahampa miraynin kasqaykirayku.

¹⁰Diospa Kachamusqan Runaqa*f** hamurqani chinkasqa runata maskhaspay qespichiqmi, nispa.

¹¹Jerusalén llaqta qayllapi Jesús kashaqtinmi uyariqninkunaqa chaykunata uyarispa yuyaykusharqanku Diosqa runakunata kaq rato kamachiyta qallarinanta, chaymi Jesusqa kay rikch'anachiy simita nirqan:

¹²—Huk allin wiraqochan karu llaqtaman rirqan kamachikuq kananpaq nombramiento chaskiq, kutimuspataq kamachikunanpaq.

¹³Manaraq rishaspataq chunkantin kamachinkunata waqyaspa askha qolqeta sapankaman qoykarirqan: Kutimunaykama kaywan llank'ashaychis, nispa.

¹⁴Chay wiraqochaq llaqta-masinkunataq ichaqa payta cheqnispanku qhepanta willaqkunata kacharqanku: —Chay runaq kamachiqniyku kanantaqa manan munaykuchu, nispa nimunankupaq.

¹⁵Chaywanpas payqa chay suyuman kamachikuqpuni kutimuspanmi qolqe qosqan kamachikunata waqyachimurqan, sapankaq qolqe mirachisqanta yachananpaq.

¹⁶Chaymi hukkaq hamurqan: —Wiraqocháy, qowasqayki qolqetaqa chunka chhikatawanmi mirarqachimuni, nispa.

¹⁷Chaymi payta nirqan: —Allinmi, allin kamachi, pisillapi hunt'aq kasqaykiraykun, chunka llaqtakunata kamachinki, nispa.

¹⁸Hukpas hamuspa nirqan: —Wiraqocháy, qowasqayki qolqetaqa phisqa chhikatawanmi mirarqachimuni, nispa.

¹⁹Hinan paytapas nillarqantaq: —Qanpas phisqa llaqtakunatan kamachinki, nispa.

²⁰Hukpas hamuspa nillarqantaq: —Wiraqocháy, kayqa qowasqayki qolqeyki, khipunapin waqaycharqani,

²¹phiña runa kaqtiykin manchakurqayki, mana t'akasqaykimantan hoqarinki, mana tarpusqaykimantan cosechanki, nispa.

²²Chaymi payqa nirqan: —Mana allin kamachi, rimasqaykipin taripayki: Phiña runa kaspay, mana t'akasqaymanta hoqariq, mana tarpusqaymantapas cosechaq kasqayta yachashaspaykiqa,

²³¿imaraykun qolqeytaqa mana bancomanchu churamurqanki, kutimuspay uñantawan mañakapunaypaq? nispa.

²⁴Hinaspan chaypi kaqkunata nirqan: —Qosqay qolqetaqa qechuychis, hinaspa chunka chhika qolqe mirachiqman qoychis, nispa.

²⁵Paykunataq nirqanku: —Wiraqochayku, payqa chunka chhika qolqeyoqñatáq, nispanku.

²⁶Kamachikuqtaq nirqan: —Pipas kaqniyoqmanqa astawanraqmi qosaq, mana kaqniyoqmantataqmi pisilla kaqnintapas qechusaq.

²⁷Paykunaq kamachiqnin kanayta mana munaq awqaykunatapas kayman apamuychis, hinaspa ñawpaqeypi wañuchiychis, nispa.

²⁸Chay rimayta tukuspataq Jerusalén llaqtaman rishaspa ñawparirqan.

²⁹Olivos orqo chakipi kashaq Betfagé llaqtawan Betania llaqtawan tupayman chayaspan, iskay yachachisqankunata nirqan:

³⁰—Haqay chimpa llaqtachaman riychis, chayman haykuspan mana hayk'aq sillakusqa malta asno watasqata tarimunkichis, hinaspan paskaspa chayta aysamunkichis.

³¹Pipas: ¿Imapaqmi paskashankichis? nisunkichis chayqa, ninkichis: Señorninchismi kayta necesitan, nispa.

³²Kachasqakunataq rispa nisqanta hina tarimurqanku.

³³Malta asnota paskashaqtinkutaq asnoyoqkunaqa paykunata nirqanku: —¿Imapaqmi asnoykuta paskashankichis? nispa.

³⁴Chaymi paykunaqa nirqanku: —Señorninchismi kayta necesitan, nispanku.

³⁵Hinan Jesusman aysamuspanku, p'achankuwan asnota caronaykuspa Jesusta sillaykachirqanku.

³⁶Pay rishaqtintaq, runakunaqa p'achankuta ñanpi mast'arqanku.

³⁷Jerusalén llaqtaman qayllaykushaspa Olivos orqota uraykushaqtinkun, llapa yachachisqankunaqa tukuy milagrokunata rikusqankumanta q'ochukuspanku qaparispa Diosta yupaycharqanku:

³⁸—¡Yupaychasqa kachun Señor Diospa sutinpi hamuq Reyqa! ¡Hanaq pachapi thak-kay kachun, Diostaq yupaychasqa kachun! nispanku.

³⁹Hinan runakuna ukhupi kaq wakin fariseokunaqa*f** nirqanku: —Yachachikuq, upallachiy yachachisqaykikunata, nispa.

⁴⁰Jesustaq paykunata nirqan: —Niykichismi, paykunachus upallanman chayqa, rumikunan qaparinman, nispa.

⁴¹Jerusalén llaqtaman qayllaykuspa qhawarispataq chay llaqtamanta Jesusqa waqarqan:

⁴²—¡Maytan munayman qanllapas kunan p'unchay imaynatachus sumaqpi kawsanaykimanta yachanaykita! ¡Ichaqa kunanqa manan reparashankichu!

⁴³P'unchaykunan chayamusunki, awqaykikunan muyuriqniykipi perqata sayarichispa muyuykuspasuyki tukuyneqmanta phawaykusunki.

⁴⁴Hinaspan pampaman thunisunki, hinallataq qan ukhupi tiyaq wawaykikunatapas, manataq huk rumillapas rumi patapi saqesqachu kanqa, qespichinasuykipaq hamuq Diosta mana reqsisqaykirayku, nispa.

⁴⁵Dios yupaychana wasiman haykuspan Jesusqa lliw chaypi vendeqkunata hawaman qarqospa nirqan:

⁴⁶—Diospa Simin Qelqan nin: Wasiyqa mañakuna wasin, nispa. Qankunataq ichaqa suwakunaq tiyanan qaqa wasiman hina tukuchipusqankichis, nispan.

⁴⁷Dios yupaychana wasipitaq sapa p'unchay yachachirqan, sacerdote umallikunan ichaqa kamachikuy simita yachachiqkunawan llaqtapi kurak runakunapiwan Jesusta wañuchiyta munarqanku.

⁴⁸Ichaqa manan imanaytapas atirqankuchu, llapan runakuna musphaspa payta uyarisqankurayku.