Read Quechua Cuzco Bible 1988 LUCAS 2 Bible Online

LUCAS 2 - Quechua Cuzco Bible 1988 bible

LUCAS 2

¹Chay p'unchaykunapin hatun rey Augustoqa kamachikurqan llapa llaqtakunapi tiyaqkuna padronasqa kanankupaq.

²Kay runa yupayqa chayllaraqmi qallarirqan Siria suyupi sullk'a rey Kirenio kamachikushaqtin.

³Llapallataq padronasqa kanankupaq nacesqanku llaqtamankama rirqanku.

⁴Hinan Josepas Galilea provinciapi Nazaret llaqtamanta Judea hap'iyman wicharqan, Davidpa llaqtan Belenman, Davidpa mirayninmanta kasqanrayku.

⁵Chaymanqa rirqan paywan casarakunanpaq rimaykusqaña Mariawan yupasqa kananpaqmi, Mariaqa onqoqmi kasharqan.

⁶Paykuna chaypi kashaqtinkutaq wachakunan killaqa hunt'akurqan.

⁷Hinan phiwi qhari wawanta wachakurqan, walthanawan walthaykuspataq uywa qaranapi siriykachirqan, paykunapaq tampupi mana campo kasqanrayku.

⁸Belén llaqta qaylla campopitaq michiqkuna kasharqan uywankuta tutantin qhawaspanku.

⁹Chayllamanmi Señor Diospa angelninqa paykunaman rikhurirqan, Señorpa lliphlli-kaynintaq paykunaman k'anchaykurqan, hinan sinchitapuni mancharikurqanku.

¹⁰Chaymi angelqa paykunata nirqan: —Ama mancharikuychischu, ancha allin willakuytan willasqaykichis, chaywanmi llapa runa q'ochukunqa.

¹¹Kunanmi Davidpa llaqtanpi huk Qespichiq nacepusunkichis, payqa Diospa Akllasqan Criston, payqa Señormi.

¹²Chayta yachanaykichispaqqa kay hinatan tarinkichis: Huk wawan walthanawan walthaykusqa uywa qaranapi siriykusqa kashanqa, nispa.

¹³Chayllamanmi angelwan hanaq pachapi askha angelkuna rikhurimurqan Diosta yupaychaspanku:

¹⁴¡Diosqa hanaq pachapi yupaychasqa kachun! ¡Diospa khuyapayasqan runakunataq kay pachapi sumaqta kawsachun! nispa.

¹⁵Hanaq pachaman angelkuna kutipuqtinkutaq michiqkunaqa ninakurqanku: —Hakuchisyá Belén llaqtata, hinaspa rikumusun Señor Diospa willawasqanchis imachus kasqanta.

¹⁶Usqhaylla rispankutaq Mariata Josetawan, wawatapas uywa qaranapi siriykusqata tarirqanku.

¹⁷Chayta rikuspataq wawamanta angelpa paykunaman nisqanta willakurqanku.

¹⁸Chaymi llapan uyariqkuna muspharqanku michiqkunaq willakusqanmanta.

¹⁹Mariataq ichaqa chaykunata yuyaymanaspa sonqonpi allintapuni hap'irqan.

²⁰Michiqkunataq uyarisqankuman hina tukuy imapas sucedesqanmanta yachaspanku, rikusqankumantawan Diosta hatunchaspa yupaychaspa kutipurqanku.

²¹Pusaq p'unchayniyoq wawa kashaqtinmi qhari-kaynin qarachata señalarqanku, hinaspan wiksapi manaraq kamakushaqtin angelpa sutichasqan Jesús sutiwan suticharqanku.

²²Moisespa kamachikusqanman hina wachakuqpa ch'uyanchakuynin p'unchay chayamuqtintaq, Mariaqa Josepiwan Jerusalén llaqtaman wawata aparqanku Señor Diosman presentanankupaq,

²³ofrendatapas haywanankupaq. Señor Diospa kamachikuynin simipin nin: Llapa phiwi naceq qhari wawan Señor Diospaq t'aqasqa kanqa, nispa. Nillantaqmi: Iskay kullkuta otaq iskay malqo urpitapas haywanki, nispa.

²⁴

²⁵Jerusalén llaqtapin tiyarqan Simeón sutiyoq runa, paymi Dios yupaychaq chanin runa karqan, Israel runakunaq qespichisqa kanantataq suyasharqan. Santo Espiritun paypi karqan,

²⁶chay Santo Espiritun payman willasqaña: —Señor Diospa Akllasqan Cristota manaraq rikushaspaqa manapunin wañunkichu, nispa.

²⁷Hinan Simeonqa Espirituq tanqarisqan Dios yupaychana wasiman haykurqan. Chaymanmi tayta-mamanqa Jesús wawata apamurqanku Diospa kamachikuyninman hina ruwanankupaq.

²⁸Hinaqtinmi Simeonqa wawata marq'arikurqan, hinaspan Diosta yupaychaspa nirqan:

²⁹Kunanqa, Señor Diosníy, nisqaykiman hina kamachiykiqa sonqopas-sonqo wañukapusaq.

³⁰Ñan rikuniña kachamusqayki Qespichiqniykuta,

³¹llapa llaqtakunaq qayllanpi churasqaykita.

³²Paymi mana Judío runakunaman k'anchaspa munayniykita reqsichinqa, Israel llaqtaykipaqtaq hatun sami kanqa, nispa.

³³Hinan Josepas mamanpas muspharqanku Jesús wawamanta imaymanata nisqankuwan.

³⁴Simeontaq paykunata saminchaspan María mamanta nirqan: —Qhawariy, Diosmi kay wawata Israelpi churan, wakin urmananpaq, wakintaq Diosman kutirikunanpaq. Diospa munayninta rikuchiqtinmi pay contra rimanqaku.

³⁵Ahinapin paykunaq yuyaykusqan yachasqa kanqa. Llakikuymi espada hina t'urpuspa sonqoykita nanachinqa, nispa.

³⁶Chaypiqa kashallarqantaqmi Aser ayllumanta Fanuelpa ususin Ana, payqa karqan sinchi yuyaqña profeta*f** warmi. Paymi doncellallaraq casarakusqanmantapacha qanchis watallata qosanwan tiyasqa.

³⁷Pusaq chunka tawayoq watañan viuda karqan. Payqa Dios yupaychana wasimantan mana lloqsiqchu, tuta p'unchay ayunaspa rogakuspa Diosta yupaychaq.

³⁸Chay warmin chay kikin horatapuni hamuspa Diosman graciasta qorqan, Jerusalén llaqtata awqankunamanta kacharichiyta llapan suyaqkunamantaq Jesús wawamanta rimarirqan.

³⁹Señor Diospa kamachikuy siminman hina lliwta hunt'aspataq, Galileaman kutipurqanku, llaqtanku Nazaretman.

⁴⁰Wawataq wiñarqan, kallpachakurqan, yachaywan hunt'aykusqataq karqan, Diostaq payta allinpaq qhawarirqan.

⁴¹Tayta-mamantaq sapa wata Diospa Alqaspa Pasarparisqan Yuyarina Fiestapaq Jerusalén llaqtaman riqku.

⁴²Jesús chunka iskayniyoq watayoq kashaqtinmi chay fiestapaq Jerusalén llaqtaman wicharirqanku, imaynan rillaqkupuni hinata.

⁴³Chay fiesta tukukuyta kutimpushaqtinkun Jesusqa Jerusalén llaqtapi qhepakurqan, ichaqa Josepas mamanpas manan yacharqanchu.

⁴⁴Hinan puriqkuna ukhupi Jesuspa rishasqanta yuyaspa huk p'unchay puriytaña rirqanku, hinaspan ayllunku ukhupi reqsinakuqmasi purapipas Jesusta maskhaykurqanku.

⁴⁵Mana tarispataq qhepantin p'unchay Jerusalén llaqtaman kutirirqanku payta maskhaspa.

⁴⁶Kinsakaq p'unchaypitaq Jesustaqa Dios yupaychana wasipi tarirqanku Diospa kamachikuyninta yachachiqkuna chawpipi tiyashaqta, Jesusqa paykunatan uyarisharqan tapusharqantaq.

⁴⁷Llapan payta uyariqkunataq muspharqanku yachayninmanta kutichisqankunamantawan.

⁴⁸Tayta-mamantaq payta rikuspa muspharqan, hinan mamanqa nirqan: —Wawáy, ¿imaraykun kayta ruwawankiku? Qhawariy, taytaykipiwanmi khuyay llakisqa maskhaykamushaykiku, nispa.

⁴⁹Chaymi paykunata nirqan: —¿Imapaqtaq maskhamuwarqankichis? ¿Manachu yacharqankichis Yayaypa ruwanankunapi kanayta? nispa.

⁵⁰Tayta-mamantaq ichaqa mana entienderqankuchu chay nisqan simikunata.

⁵¹Paykunawan uraykuspataq Jesusqa Nazaret llaqtaman kutipuspa paykunaman kasukuspa tiyarqan. Mamanqa tukuy chaykunatan sonqollanpi waqaycharqan.

⁵²Jesusmi wiñasharqan yachaypipas sayayninpipas, Diospas runakunapas sumaqtataq qhawarirqan.