Read Quechua Cuzco Bible 1988 LUCAS 21 Bible Online

LUCAS 21 - Quechua Cuzco Bible 1988 bible

LUCAS 21

¹Jesusmi qhapaqkunata Dios yupaychana wasipi alcanciaman qolqeta churaykushaqta rikusharqan.

²Huk wakcha viudatapas rikullarqantaq, chayman iskay qolqechata churaykushaqta.

³Chaymi Jesusqa nirqan: —Cheqaqtan niykichis, kay wakcha viudan llapankumanta astawanqa churaykun.

⁴Llapanmi qhapaq kashaspa mana munasqallanta Diospaq ofrendata churaykunku, viudataq ichaqa wakcha kayninpi tukuy kawsananpaq kaqta llapanta churaykun, nispa.

⁵Dios yupaychana wasiq sumaq ruminkunamanta qokuykunawan sumaqchasqa kasqanmantawan wakinkuna rimashaqtintaq Jesusqa nirqan:

⁶—P'unchaykunan chayamunqa, kay qhawasqaykichiskunaqa lliwmi thunisqa kanqa, rumi patapi huk rumillapas manan qhepanqachu, nispa.

⁷Paytataq tapurqanku: —Yachachikuq, ¿hayk'aqmi kay nisqaykiqa kanqa? ¿Ima señaltaq kanqa llapan kaykuna hunt'akunan kashaqtinri? nispanku.

⁸Chaymi Jesusqa nirqan: —Cuidakuychis, paqtataq pantachisqa kawaqchis, askhan sutiywan sutichakuspa hamunqaku: Ñoqan Diospa Akllasqan Cristoqa kani, p'uchukay tiempopas sispaykamushanñan, nispanku. Chay hinaqa, aman paykunaq qhepanta rinkichischu.

⁹Awqa-tinkuykunamanta, ch'aqwaykunamanta rimayta uyarispaykichisqa aman mancharikunkichischu, chaykunaraqmi ñawpaqtaqa kanan, ichaqa manan p'uchukayraqchu kanqa, nispa.

¹⁰Jesusqa nillarqantaqmi: —Llaqtakunan huk llaqtakunawan maqanakunqaku, huk suyun hukkaq suyuwan maqanakunqa,

¹¹kanqataqmi sinchita pacha chhaphchiykuna, kayneqpi chayneqpi yarqaykuna, onqoykuna ima, hanaq pachapipas mancharikuy hatun señalkunan kanqa.

¹²Ichaqa tukuy chaykuna ñawpaqtaraqmi runakunaqa hap'isunkichis qatiykachasunkichis, Diosmanta yachachina wasikunaman, carcelkunaman aysasunkichis. Ñoqaraykun reykunaq, kamachikuqkunaq ñawpaqenman apasqa kankichis.

¹³Ahinapin ñoqamanta paykunaman willankichis.

¹⁴Chay hinaqa, ama sonqoykichispi ñawpaqmanta yuyaykunkichischu imatachus kutichikunaykichista,

¹⁵ñoqan yachachisqaykichis yachaywan rimanaykichispaq, chaymi llapa awqaykichiskunaqa mana atipaytapas kutichiytapas atisunkichischu.

¹⁶Ichaqa tayta-mamaykichis, wawqeykichiskuna, aylluykichiskuna, reqsinakuq-masiykichiskuna kamachikuqkunaman hap'iykachisunkichis, wakinniykichistataqmi wañuchisunkichis.

¹⁷Ñoqaraykun tukuypa cheqnisqan kankichis.

¹⁸Ichaqa chukchaykichispas manan hukllapas chinkanqachu.

¹⁹Qaqata sayasqaykichiswanmi kawsankichis.

²⁰Jerusalén llaqtata askha soldadokunaq muyuykusqanta rikuspaykichisqa thunikuynin chayamusqanta yachaychis.

²¹Chaypacha Judea provinciapi kashaqkunaqa orqokunaman ayqechunku, Jerusalén ukhupi kashaqkunataq hawaman lloqsichunku, chakrakunapi kashaqkunapas amaña llaqtamanqa haykuchunkuchu.

²²Chay p'unchaykunapin Diosqa llaqtanta muchuchinqa, paypa nisqan qelqasqakuna lliw hunt'akunanpaq.

²³¡Ay, chay p'unchaykunapi wiksallikuqkunamanta! ¡Ay wawata ñuñuqkunamantapas! Kay pachapin manchay ñak'ariy kanqa, kay llaqtapaqpas manchay phiñakuy kanqa.

²⁴Wakintan soldadokuna espadawan wañuchinqaku, wakintataq llapa suyukunaman presota apanqaku, Jerusalén llaqtatapas wak suyu runakunan munaychakunqaku, wak suyu runakunaq kamachikunan tiempon hunt'akunankama, nispa.

²⁵Jesusqa nillarqantaqmi: —Señalkunan intipi, killapi, ch'askakunapipas kanqa, kay pachapitaq suyukuna manchay llakikuypi rikukunqaku, mancharikunqakutaqmi mama qochaq qaparisqanwan phoqchiqesqanwan.

²⁶Kay teqsimuyuntinman hamunan kaqkunata yuyaspan runakunaqa mancharisqa musphanqaku. Cielopi kaq ch'askakunaqa chhaphchisqan kanqa.

²⁷Chaypachan Diospa Kachamusqan Runata*f** rikuwanqaku, hatun atiywan lliphlli-kaywan phuyupi hamushaqta.

²⁸Chaykuna sucedeqtinqa makillaña qhawapakushaychis, Diospa kacharichinasuykichis tiempon chayamushanña, nispa.

²⁹Huk rikch'anachiy simitapas Jesusqa nillarqantaqmi: —Qhawariychis higos sach'ata, mayqen sach'atapas.

³⁰Raphichakushaqtaña rikuspaykichismi poqoy tiempo sispaykamusqanta reparankichis.

³¹Ahinallataq qankunapas, kaykuna hunt'akusqanta rikuspaykichisqa Diospa kamachikunan qayllaykamushasqanta yachankichis.

³²Cheqaqtan niykichis, manan kay mirayqa tukukunqachu lliw chaykuna hunt'akunankama.

³³Hanaq pachapas kay pachapas tukukunqan, simiykunan ichaqa mana tukukunqachu.

³⁴Cuidakuychis qankuna kikiykichista, paqtataq sonqoykichis rumiyanman viciokunawan, machaywan, kay kawsaypa llakichikuyninwan, chaytaq Diospa Kachamusqan Runaq*f** kutimunay p'unchay qonqaylla hap'isunkichisman seq'ona waskha hina.

³⁵Kay pachantinpi lliw tiyaqkunamanmi hamusaq.

³⁶Chay hinaqa, tuta p'unchay Diosmanta mañakuspa rikch'ashaychis, tukuy chay hamuqkunamanta ayqenaykichispaq, hinaspa Diospa Kachamusqan Runaq*f** qayllaypi rikhurinaykichispaq, nispa.

³⁷Jesusqa Dios yupaychana wasipin p'unchay yachachiq, tutataq Olivos nisqa orqoman rispa qorpachakamuq.

³⁸Llapa runakunataq tutallamanta Dios yupaychana wasiman hamuqku Jesusta uyarinankupaq.