Read Quechua Cuzco Bible 1988 LUCAS 22 Bible Online

LUCAS 22 - Quechua Cuzco Bible 1988 bible

LUCAS 22

¹Diospa Alqaspa Pasarparisqan Yuyarina Fiesta otaq Mana Qonchuyoq T'antata Mikhuna Fiestan sispaykamusharqanña.

²Sacerdote umallikunataq kamachikuy simita yachachiqkunapiwan runakunaq ch'aqwananta manchakuspa imaynatachus Jesusta wañuchinankuta yuyaykurqanku.

³Iscariote sutichasqa Judasmanmi Satanasqa haykurqan, paymi chunka iskayniyoq yachachisqakunamanta huknin karqan.

⁴Judasmi rispa sacerdote umallikunawan, Dios yupaychana wasi guardia umallikunawanpas rimanakamurqan, imaynatachus Jesusta paykunaman hap'iykachinapaq.

⁵Hinan umallikunaqa kusikuspa Judasman qolqeta qonankupaq rimanakurqanku.

⁶Judastaq: —Allinmi, nirqan. Hinaspan yuyaykurqan imaynatachus runakunata mana ch'aqwachispalla Jesusta umallikunaman hap'ichinanpaq.

⁷Mana qonchuyoq t'anta mikhuna p'unchaymi chayamurqan, chay p'unchaymi Diospa Alqaspa Pasarparisqan Yuyarina Fiesta borregota nak'aqku.

⁸Jesusmi Pedrota Juantawan kacharqan: —Riychis, Diospa Alqaspa Pasarparisqan Yuyarina Fiesta mikhunata wakichimuychis mikhunanchispaq, nispa.

⁹Chaymi paykunaqa: —¿Maypin wakichimunaykuta munanki? nirqanku.

¹⁰Hinaqtinmi payqa nirqan: —Llaqtaman haykuspaykichismi unuta p'uyñupi apashaq runawan tupaspa qhepanta rinkichis, may wasimanchus haykunankama.

¹¹Hinaspan wasiyoqta ninkichis: Yachachikuqmi nisunki: ¿Mayqen wasipin yachachisqaykunawan Diospa Alqaspa Pasarparisqan Yuyarina Fiesta borregota mikhusaq? nispa.

¹²Hinan payqa altospi allichasqataña hatun wasita rikuchisunkichis, chaypin wakichimunkichis, nispa.

¹³Rispankutaq Jesuspa nisqanman hina tarimuspa chay mikhunata wakichimurqanku.

¹⁴Mikhuna hora kaqtintaq Jesusqa mikhuq tiyaykurqan apostolninkunapiwan*f**.

¹⁵Hinaspan paykunata nirqan: —Maytapunin munarqani, manaraq ñak'arishaspay, qankunawan Diospa Alqaspa Pasarparisqan Yuyarina Fiesta borrego mikhuyta.

¹⁶Niykichismi kay hina mikhunataqa manañan mikhusaqchu, aswanpas Diosllaña kamachikushasqan p'unchayñan mikhusaq, chaypin kay mikhuna imachus kasqanqa hunt'akapunqa, nispa.

¹⁷Vinoyoq vasota hap'ispataq graciasta qospaña nirqan: —Kayta hap'iychis, hinaspa sapankaykichis ukyaychis.

¹⁸Niykichismi, uvas ch'irwasqataqa manañan ukyasaqchu, aswanpas Diosllaña kamachikushasqan punch'ayñan ukyasaq, nispa.

¹⁹T'antata hap'ispataq, graciasta qospaña phasmirqan, hinaspan paykunaman qorqan: —Kayqa qankunarayku qosqa cuerpoymi, kaytan ruwankichis yuyariwanaykichispaq, nispa.

²⁰Cenasqanmantañataqmi vinoyoq vasota hap'ispa nirqan: —Kay vinoyoq vasoqa yawarniywan cheqaqchasqa mosoq rimanakuymi, ñoqan yawarniyta qankunarayku hich'asaq, nispa.

²¹Chaywanpas awqaykunaman hap'iykachiwaqniyqa ñoqawanmi mesapi kashan.

²²Cheqaqtapunin Diospa Kachamusqan Runaqa*f** Diospa unanchasqanman hina wañusaq. Ichaqa, ¡ay chay hap'ichiqniy runamanta! nispa.

²³Chaymi paykunaqa tapunakurqanku mayqenninkuchus chay hap'ichiqqa kananmanta.

²⁴Yachachisqakunaqa mayqenninkuchus kurakqa kanankumantan tapunakurqanku.

²⁵Jesustaq paykunata nirqan: —Hatun suyukunaq reyninkunaqa paykunatan kamachinku, paykunata kamachiqkunataq “allin ruwaq” nisqa kanku.

²⁶Qankunan ichaqa mana chay hinachu kanaykichis, aswanpas qankuna ukhupi kurak kaqqa sullk'a hina kachun, qollana kaqtaq kamachi ruwaq hina kachun.

²⁷¿Mayqentaq kurakqa, mikhunanpaq tiyaykuqchu, icha, serviqchu? Mikhunanpaq tiyaykuqkaqmi riki. Chaypas ñoqan kamachi ruwaq hina qankuna ukhupi kashani.

²⁸Qankunaqa wateqasqa kasqaykunapin ñoqallawanpuni kasharqankichis.

²⁹Chaymi ñoqapas kamachikuqta churaykichis, imaynan Yayaypas ñoqata churawarqan hinata.

³⁰Ñoqa kamachikuqtiymi mesaypi mikhunaykichispaq ukyanaykichispaq tiyaykunkichis, hinaspan Israelpa chunka iskayniyoq ayllunta juzgaspa kamachinaykichispaq tiyaykunkichis, nispa.

³¹Jesusqa nillarqantaqmi: —Simón, Simón, Satanasmi trigota hina suysunasuykichispaq qankunata maskhan.

³²Ichaqa ñoqan qanpaq mañakuniña iñiyniyki mana chinkarinanpaq. Ñoqaman kutirikampuspaykitaqmi wawqeykikunata kallpachanki, nispa.

³³Chaymi Simonqa nirqan— Señorníy, liston kashani carcelmanpas, wañuymanpas qanwan kuska rinaypaq, nispa.

³⁴Hinan Jesusqa nirqan— Pedro, ñoqan niyki, kunan tutan manaraq gallo waqashaqtin reqsiwasqaykita kinsa kutita mananchakunki, nispa.

³⁵Hinan Jesusqa paykunata tapurqan— Mana qolqeyoqta, mana qoqawayoqta, mana usut'ayoqta qankunata kachashaqtiyqa, ¿imallapas pisirqasunkichischu? nispa. Chaymi paykunaqa nirqanku: —Manan imapas, nispa.

³⁶Jesusqa nillarqantaqmi: —Kunan ichaqa kaqtinqa qolqetapas qoqawatapas apakuchun, mana espadayoqtaq p'achanta vendespa espadata rantikuchun.

³⁷Niykichismi Diospa Simin Qelqan nin: Huchasapakuna hinan wañurqan, nispa. Chaymi ñoqawan hunt'akunanpuniraq. Ñoqamanta qelqasqaqa hunt'akushanmi, nispa.

³⁸Hinaqtinmi paykunaqa nirqanku: —Señor, kayqa iskay espada, nispa. Chaymi Jesusqa: —Chayllataña, nirqan.

³⁹Wasimanta lloqsispataq, Olivos orqoman rirqan imaynan rillaqpuni hinata, yachachisqankunataq qhepanta rirqanku.

⁴⁰Chay orqoman chayaspataq paykunata nirqan: —Mañakuychis ama wateqasqa kanaykichispaq, nispa.

⁴¹Hinaspan Jesusqa rumi chanqayman hina paykunamanta t'aqarikurqan, qonqoriykukuspataq Diosmanta mañakurqan:

⁴²Yayáy, munanki chayqa kay ñak'arinata ñoqamanta anchhurichiy, ichaqa ama ñoqaq munasqaychu kachun, aswanpas qanpa munasqayki, nispa.

⁴³Hinaqtinmi hanaq pachamanta huk ángel rikhurimurqan payta kallpachananpaq.

⁴⁴Sinchitapuni llakikuspataq aswan tukuy sonqowan mañakurqan, hump'inpas hatuchachaq yawar sut'uy hinaraq pampaman sut'urqan.

⁴⁵Mañakusqanmanta sayarispataq yachachisqankunaman kutispa, llakisqa puñushaqta tarirqan.

⁴⁶Hinaspan paykunata nirqan: —¿Imanaqtinmi puñushankichis? Sayariychis, Diosmanta mañakuychis ama wateqayman urmanaykichispaq, nispa.

⁴⁷Jesús rimashallaqtinraqmi askha runakuna rikhurimurqan, ñawpaqenkutataq hamurqan chunka iskayniyoq yachachisqakunamanta huknin, Judas sutiyoq, paymi Jesusman asuykurqan much'aykunanpaq.

⁴⁸Chaymi Jesusqa payta nirqan— Judas, ¿much'awanchu Diospa Kachamusqan Runata*f** awqaykunaman hap'iykachiwanki? nispa.

⁴⁹Jesuswan kaqkunataq imachus kananta yachaspa nirqanku: —Señor, ¿espadawanchu maqapakusaqku? nispa.

⁵⁰Hukninkutaq uma sacerdoteq kamachinta espadawan waqtaspa paña ninrinta qhorurqorqan.

⁵¹Hinan Jesusqa nirqan: —Ama hinaychischu, nispa. Ninrinta llamiykuspataq kaq rato alliyarqachirqan.

⁵²Jesustaq pay contra hamuq sacerdote umallikunata, Dios yupaychana wasi guardiakunaq umallinkunata, kurak runakunatawan nirqan: —¿Suwa hap'iq hinachu espadakunantin, k'aspikunantin hamunkichis?

⁵³Sapa p'unchaymi Dios yupaychana wasipi qankunawan kasharqani, manataq hap'iwarqankichischu, ichaqa ruwanaykichis horasñan laqhayaqpi kamachikuq saqraq munaychakunan horaspiwanmi, nispa.

⁵⁴Jesusta hap'irqospataq uma sacerdoteq wasinman apaykurqanku. Pedrotaq karu qhepallanta rirqan.

⁵⁵Patio chawpipi ninata hap'ichispa, muyuriqninpi tiyaykuqtinkutaq, Pedropas paykunawan tiyaykullarqantaq.

⁵⁶Payta nina qayllapi tiyashaqta rikuspataq huk warmi kamachi allinta qhawaykuspa nirqan: —Kay runapas Jesuswanmi kasharqan, nispa.

⁵⁷Hinan Pedroqa mananchakurqan: —Yaw warmi, manan paytaqa reqsinichu, nispa.

⁵⁸Manaraq unaymantataq, hukpas payta rikurqospan nirqan: —Qanpas paykunamantan kanki riki, nispa. Hinan Pedroqa: —Yaw runa, manan paykunamantachu kani, nirqan.

⁵⁹Huk horamanta hinataq, hukpas kaqllatataq nirqan: —Cheqaqtapunin kay runapas Jesuswan kasharqan, Galilea provinciamantataqmi kanpas, nispa.

⁶⁰Chaymi Pedroqa nirqan: —Yaw runa, manan yachanichu imatachus nisqaykita, nispa. Pay rimashallaqtinraqtaq galloqa waqarqan.

⁶¹Chay raton, Señor Jesusqa kutirispa Pedrota qhawarirqan. Hinan Pedroqa yuyarirqan, Señor Jesuspa: Manaraq gallo waqashaqtinmi kinsa kutita mananchakuwanki, nispa nisqanta.

⁶²Chaymi Pedroqa hawaman lloqsispa, khuyayta waqaykurqan.

⁶³Jesusta cuidaq runakunataq asipayarqanku waqtarqanku.

⁶⁴Ñawinta wataspataq uyanpi ch'aqlaspa tapurqanku: —Watuy, ¿pin ch'aqlashasunki? nispanku.

⁶⁵Hinallataq payta k'amispa imaymanatawanraq nirqanku.

⁶⁶P'unchayña kaqtintaq, llaqtapi kurak runakuna, sacerdote umallikuna, kamachikuy simita yachachiqkunapiwan huñunakuspanku, Jesusta huñunakuyninkuman apaspa nirqanku:

⁶⁷—¿Qanchu Diospa Akllasqan Cristo kanki? Willawayku, nispanku. Chaymi paykunata nirqan: —Niykichismanña chaypas manan iñiwankichismanchu,

⁶⁸tapuykichisman chaypas manan kutichiwankichismanchu.

⁶⁹Kunanmantan ichaqa Diospa Kachamusqan Runaqa*f**, Tukuy-atiyniyoq Diospa pañaneqenpi tiyaykusaq, nispa.

⁷⁰Hinan llapanku nirqanku: —Chhaynaqa, ¿qanchu Diospa Churin kanki? nispa. Jesustaq nirqan: —Arí, ñoqan kani qankunaq nisqaykichisman hina, nispa.

⁷¹Chaymi paykunaqa ninakurqanku: —Siminmanta ñoqanchis uyarishaspaqa, ¿imapaqñataq testigotaqa munasunchis? nispa.