Read Quechua Cuzco Bible 1988 LUCAS 24 Bible Online

LUCAS 24 - Quechua Cuzco Bible 1988 bible

LUCAS 24

¹Samana qallariy p'unchaytaq pacha illarimuyta warmikunaqa aya p'ampanaman kutimurqanku wakichisqanku q'apaq hawinakunata aparikamuspanku.

²Chayaspataq aya t'oqo wisq'ana rumi tanqaqasqataña tarirqanku.

³Hinaspan haykuspa Señor Jesuspa cuerponta mana tarirqankuchu.

⁴Chaymi mancharikuspa mana imanaytapas atishaqtinku lliphipishaq p'achayoq iskay qharikuna qayllankupi sayaykurqanku.

⁵Mancharikuspanku pampaman k'umuykuqtinkutaq, qharikunaqa nirqanku: —¿imaraykun kawsaqtaqa wañusqakunaq kananpi maskhashankichis?

⁶Manan kaypiñachu, kawsarimpunñan. Galileapi kashaspanraq nisqasuykichista yuyariychis,

⁷paymi nirqan: Diospa Kachamusqan Runataqa*f** huchasapa runakunaman hap'ichiwaqtinkun chakatawanqaku, kinsakaq p'unchaytaq kawsarimpusaq, nispa.

⁸Hinan warmikunaqa nisqankunata chayraq yuyarirqanku.

⁹Aya p'ampanamanta ripuspataq, tukuy chaykunata chunka hukniyoq apostolkunaman*f** wakinkunamanwan willarqanku.

¹⁰Apostolkunaman*f** chaykunata willaqkunan karqan Magdalá llaqtayoq María, Juana, Jacoboq maman María, wakin warmikunapiwan.

¹¹Warmikunaq willasqantaq apostolkunaman*f** yanqa rimasqaman rikch'akurqan, chaymi mana creerqankuchu.

¹²Chaywanpas, Pedroqa aya p'ampanamanmi phawarirqan, t'oqota qhawaykuspataq p'istusqa lino telakunallataña churarayashaqta rikurqan, hinaspan chay hina kasqanmanta musphaspa ripurqan.

¹³Chay kikin p'unchaymi Jesuspa iskay yachachisqankuna Emaús nisqa huch'uy llaqtata risharqanku. Chay llaqtaqa Jerusalenmanta iskay legua kurakpin karqan.

¹⁴Chaykuna sucedesqanmanta parlaspan risharqanku.

¹⁵Paykuna parlaspa tapunakuspa rishaqtinkun, kikin Jesusqa asuykuspa paykunawan kuska rirqan.

¹⁶Paykunaq ñawintaq ayphayasqa hina karqan Jesusta mana reqsinankupaq.

¹⁷Jesustaq paykunata tapuykurqan: —¿Imamanta tapunakuspan purishankichis? nispa. Chaymi paykunaqa llakisqa uyantin sayaykurqanku.

¹⁸Cleofas sutiyoq kaqtaq nirqan: —Jerusalén llaqtapi kay p'unchaykuna imachus sucedesqantaqa lliwmi yachan, ¿chaychu qanqa Jerusalenpi qorpachakushaspayki mana yachanki? nispa.

¹⁹Hinan Jesusqa nirqan: —¿Imataq sucederqan? nispa. Chaymi paykunaqa nirqanku: —Nazaret llaqtayoq profeta*f** Jesustan imaymanata ruwaykurqanku. Paymi Diospa qayllanpipas llapa runaq qayllanpipas atiywanpuni rimarqanpas ruwarqanpas.

²⁰Paytan sacerdote umallikuna, kamachikuqniykupiwan hap'ichirqanku huchachaspa wañuchinankupaq, hinan chakatarqanku.

²¹Ñoqaykuqa Israel suyuta kacharichinantan suyakusharqayku. Chaykuna sucedesqanqa kinsa p'unchayñan.

²²Chaywanpas, ñoqayku t'aqa warmikunan musphachiwanku. Paykunan tutallamanta aya p'ampanaman rirqanku,

²³manataq cuerponta tarimurqankuchu. Angelkunataqsi paykunaman rikhurispa nimusqa: Jesusqa kawsashanmi, nispa.

²⁴Chaymi wakinniyku aya p'ampanaman rispa warmikunaq nisqanta hinapuni tarimurqanku, Jesustan ichaqa mana rikumurqankuchu, nispa.

²⁵Hinan Jesusqa paykunata nirqan: —¡Mana yuyayniyoqmá qankunaqa kasqankichis! ¡Profetakunaq*f** nisqantapas ñak'ayllamá creesqankichis!

²⁶¿Manachu Diospa Akllasqan Cristoqa chaykunata ñak'arinanpuni karqan manaraq hanaq pachapi hatunchasqa kashaspa? nispa.

²⁷Hinaspan Moisespa qelqasqankunamanta llapallan profetakunaq*f** qelqasqankama paymanta lliw qelqasqata sut'incharqan.

²⁸Emaús llaqtachaman chayashaqtinkutaq Jesusqa aswan karuman puriq hina karqan.

²⁹Chaymi paykunaqa hark'arqanku: —Ch'isiñamá, tutayashanñataq kanpas, ñoqallaykuwanña qhepakuy, nispa. Hinan Jesusqa paykunawan samakuq haykurqan.

³⁰Paykunawan mikhuq tiyaykuspataq t'antata hap'ispa Diosman graciasta qorqan, phasmispataq paykunaman haywarqan.

³¹Chay raton ñawinku kicharikuqtin Jesusta reqsirqorqanku, paytaq qhawashaqtinku chinkarqapurqan.

³²Chaymi paykuna ninakurqanku: —¿Manachu ñanpi rimapayawaspanchis Diospa Simin Qelqaq nisqanta willashawaqtinchisqa sonqonchis kawsarirqan? nispa.

³³Kaq ratopachan Jerusalén llaqtaman kutirqanku, hinaspan chunka hukniyoq apostolkunata*f** paykunawan kashaqkunatapas huñunasqata tarirqanku. Hinan nirqanku:

³⁴—Cheqaqtapunin Señor Jesusqa kawsarimpun, Simonmanpas rikhurinñan, nispa.

³⁵Emausmanta kutimuqkunapas willakullarqantaq imaynatachus ñanpi paykunaman rikhurisqanta, mikhunapaq t'antata phasmishaqtin Jesusta reqsirqosqankutawan.

³⁶Chaykunamanta rimashaqtinkun Jesusqa chawpinkupi sayaykuspa paykunata napaykurqan: —Sonqoykichis “thak” nichun, nispa.

³⁷Paykunataq ichaqa llaksasqa mancharikuspanku espirituta rikushasqankupaq yuyarqanku.

³⁸Jesustaq ichaqa nirqan: —¿Imanaqtintaq mancharikunkichis? ¿Imanaqtintaq sonqoykichispi iskayrayashankichis?

³⁹Qhawariychis makiykunata chakiykunata, ñoqa kikiypunin kani. Llamiykuwaychis qhawaykuwaychis, espirituqa manan aychayoqchu manan tulluyoqchu, rikusqaykichis hinapas ñoqaqqa kanmi cuerpoy, nispa.

⁴⁰Chayta nispataq makinkunata chakinkunata paykunaman qhawaykachirqan.

⁴¹Kusikuymanta musphaspa manaraq creeshaqtinkutaq Jesusqa nirqan: —¿Imallaykichispas mikhuykunaypaq kashanchu? nispa.

⁴²Paykunataq phasmi challwa kankata haywarqanku.

⁴³Hinan Jesusqa ñawpaqenkupi mikhurqan.

⁴⁴Hinaspan paykunata nirqan: —Kaykunan hunt'akun Moisespa kamachikuy qelqanpi, profetakunaq*f** qelqanpi, Salmo qelqasqakunapipas ñoqamanta llapan qelqasqakuna. Chaykunamantan qankunawan kashaspayraq willarqaykichis, nispa.

⁴⁵Chay raton yuyayninkuta kicharirqan Diospa Simin Qelqata entiendenankupaq.

⁴⁶Hinaspan paykunata nirqan: —Qelqasqa kasqanman hinapunin Diospa Akllasqan Cristoqa ñak'arinay karqan, wañuspataq kinsakaq p'unchaypi kawsarimpunay karqan.

⁴⁷Chay hinapi Jerusalén llaqtamanta qallarispa hinantin suyukunapi ñoqaq sutiypi Diosman kutirikuypas huchakuna pampachaypas willasqa kanan karqan.

⁴⁸Qankunan chaykuna sucedesqanmanta rikuq yachaq kankichis.

⁴⁹Qhawariychis, ñoqan Yayaypa prometesqan Santo Espirituta kachamusqaykichis. Chaykamataq qankunaqa Jerusalén llaqtapi suyashaychis hanaq pachamanta hamuq atiyta chaskinaykichiskama, nispa.

⁵⁰Chaymantataq Jesusqa paykunata llaqta hawaman pusarqan Betania llaqtakama. Chaypin makinta mast'arispa paykunata samincharqan.

⁵¹Saminchashaspanmi qayllankumanta t'aqarikurqan, hinaspan hanaq pachaman hoqarisqa karqan.

⁵²Paykunataq Jesusta yupaycharqanku, hinaspan ancha kusisqa Jerusalén llaqtaman kutimpurqanku.

⁵³Dios yupaychana wasipiqa kashallaqkupunin, Diosta yupaychaspanku saminchaspanku.