Read Quechua Cuzco Bible 1988 LUCAS 4 Bible Online

LUCAS 4 - Quechua Cuzco Bible 1988 bible

LUCAS 4

¹Jesusmi Santo Espirituwan hunt'a, Jordán mayumanta kutimpurqan, hinan ch'inneqman Espirituqa pusarikurqan, chaypitaq tawa chunka p'unchay kamurqan saqraq wateqasqan.

²Chay p'unchaykunapiqa manan imatapas mikhurqanchu, chaymantañan yarqachikurqan.

³Hinaqtinmi saqraqa Jesusta nirqan: —Diospa Churinchus kanki chayqa, niy kay rumita t'antaman tukunanpaq, nispa.

⁴Jesustaq saqraman kutichirqan: —Diospa Simin Qelqan nin: Manan t'antallawanchu runaqa kawsanqa, nispan, nispa.

⁵Chaymantataq saqraqa huk alto orqoman pusaspa, huk qhawariyllapi llapallan kay pacha suyukunata payman qhawarichirqan.

⁶Hinaspan saqraqa payta nirqan: —Qanmanmi qosqayki tukuy kay kamachikuyta kay suyukunaq qhapaq-kaynintawan. Ñoqan kay atiytaqa chaskirqani, chaymi pipas munasqayman qosaq.

⁷Qanchus qonqoriykukuspa yupaychaykuwanki chayqa, llapallanmi qanpa kanqa, nispa.

⁸Jesustaq saqraman kutichirqan: —Diospa Simin Qelqan nin: Señor Diosniykitan yupaychanki, pay sapallantataqmi servinkipas, nispan, nispa.

⁹Chaymantataq saqraqa Jerusalén llaqtaman Jesusta pusarqan, hinaspan Dios yupaychana wasi pataman sayaykachispa payta nirqan: —Diospa Churinchus kanki chayqa, kay ukhuman saltaykuy.

¹⁰Diospa Simin Qelqan nin: Diosmi angelninkunata kamachinqa waqaychanasuykipaq, nispa.

¹¹Nillantaqmi: Makinkupin qanta chaskisunkiku chakiykita rumipi mana takakunaykipaq, nispan, nispa.

¹²Chaymi Jesusqa saqraman kutichirqan: —Diospa Simin Qelqan nin: Aman Señor Diosniykita wateqankichu, nispan, nispa.

¹³Manapuni wateqayta atispataq saqraqa Jesusmanta anchhuripurqan huk kutikama.

¹⁴Jesusmi Santo Espirituq kallpachasqan Galilea provinciaman kutipurqan, chay muyuriq campokunapitaq paymanta rimarqanku.

¹⁵Diosmanta yachachinanku wasikunapin yachachirqan, lliw runakunataq payta hatuncharqan.

¹⁶Wiñasqan Nazaret llaqtaman rispataq, haykullaqpuni hinata samana p'unchaypi Diosmanta yachachinanku wasiman haykurqan, hinaspan Diospa Simin Qelqa leeq sayarirqan.

¹⁷Profeta*f** Isaiaspa qelqasqanta payman haywaqtinkutaq k'uyuraspa kay qelqasqata tarirqan:

¹⁸Señor Diospa Espiritunmi ñoqapi kashan, wakchakunaman allin willakuykunata willanaypaqmi akllawarqan. Payqa kachamuwarqan presokunaman kacharisqa kanankuta willanaypaq, ñawsakunaman qhawarinankuta willanaypaq. Payqa kachamuwarqan sarunchasqakunata kacharinaypaq,

¹⁹Señor Diospa llaqtanta sumaq qhawarinan p'unchay chayamusqanta willanaypaq, nispa niqta.

²⁰Qelqata k'uyuykuspataq waqaychaqman haywapuspa tiyaykurqan, llapa chaypi kaqkunataq payta makilla qhawasharqanku.

²¹Hinan Jesusqa paykunata nirqan: —Kunanmi uyarishaqtiykichis kay Qelqa hunt'akun.

²²Sumaq simikunata rimaqta uyarispan musphaspa Jesusmanta llapallanku allinta rimarqanku, hinaspan nirqanku: —¿Manachu payqa Josepa churin? nispa.

²³Hinan paykunata nirqan: —Imaynan rimaypi ninku: Hampikuq, kikiykita hampikuy, nispa, chay hinapaschá niwankichis. Capernaum llaqtapi imaymana ruwasqaykitan uyariyku, chay hinallataq kay llaqtaykipipas ruway, nispa.

²⁴Jesusqa nillarqantaqmi: —Cheqaqtan niykichis, manan mayqen profetapas*f** llaqtanpiqa allin chaskisqachu.

²⁵Cheqaqtapunin niykichis, profeta*f** Eliaspa tiemponpin askha viudakuna Israelpi karqan, kinsa wata soqta killayoqta para mana chayaqtintaq hinantin llaqtakunapi hatun yarqay karqan.

²⁶Chay hinaña kashaqtinpas Diosqa manan Eliasta mayqenninkumanpas kacharqanchu, aswanpas Sidonpi Sarepta llaqtapi viuda warmillamanmi kacharqan.

²⁷Profeta*f** Eliseoq tiemponpipas askhan aycha qarapi millay onqoyniyoqkuna Israelpi karqan, chaywanpas manan mayqenninkutapas Diosqa alliyachirqanchu, aswanpas Siria suyumanta Naamanllatan alliyachirqan, nispa.

²⁸Chayta uyarispan Diosmanta yachachina wasipi kaqkuna sinchita phiñakurqanku.

²⁹Hinaspan sayarispa llaqtamanta qarqorqanku. Chay llaqtatan ruwasqaku orqo patapi, chaymanmi qaqapachinankupaq aparqanku.

³⁰Jesustaq ichaqa chawpinkuta lloqsispa ripurqan.

³¹Galilea provinciapi Capernaum llaqtaman uraykuspanmi Jesusqa samana p'unchaykunapi paykunata yachachirqan.

³²Hinan atiywanpuni yachachisqanmanta muspharqanku.

³³Diosmanta yachachina wasipin supaypa ñak'arichisqan runa kasharqan, paymi kunkayoqta qaparirqan:

³⁴—¡Waw! Nazaret llaqtayoq Jesús, ¿imataq ñoqaykuwan ruwanayki? ¿Tukuwaqniykuchu hamunki? Reqsiykin pichus kasqaykita, qanqa Diospa Kachamusqan mana huchayoqmi kanki, nispa.

³⁵Jesustaq payta phiñarikurqan: —¡Upallay, lloqsiy paymanta! nispa. Chaymi supayqa runakuna chawpiman wikch'urparispan, mana imanaspalla paymanta lloqsirqorqan.

³⁶Hinan llapa musphaspa ninakurqanku: —¿Ima simitaq kayri? Chaytaq supaykunata atiywan kallpawan kamachin, paykunaqa runakunamanta lloqsinkutaq, nispa.

³⁷Chaymi tukuy muyuriq llaqtakunapi Jesusmanta rimarqanku.

³⁸Diosmanta yachachina wasimanta lloqsispataq Jesusqa Simonpa wasinman haykurqan, hinan Simonpa suegranqa sinchi fiebrewan onqosharqan, chaymi onqosqapaq valekurqanku.

³⁹Jesustaq onqosqaman k'umuykuspa fiebreta phiñarikurqan, hinan fiebreqa thanipurqan. Hatarispan hinataq warmiqa paykunata servirqan.

⁴⁰Inti haykuytañan llapa onqosqayoq imaymana niraq onqoyniyoqkunata Jesusman pusamurqanku, chaymi payqa sapankaman makinta churaykuspa qhaliyachirqan.

⁴¹Askha runakunamantataqmi supaykunapas qaparikuspa lloqsirqan: —Qanqa Diospa Churinmi kanki, nispa. Jesustaq ichaqa phiñarikuspa supaykunata mana rimarichirqanchu, Diospa Akllasqan Cristo payqa kasqanta yachasqanku hawa.

⁴²Pacha illarimuqtinmi Jesusqa huk ch'inneqman lloqsirqan. Runakunataq maskhaspa payta tarirqanku, hinaspan hark'arqanku paykunamanta ama ripunanpaq.

⁴³Jesustaq ichaqa paykunata nirqan: —Huk llaqtakunamanpas Diospa kamachikuq kananmanta allin willakuykunata willamunaymi, chaypaqmi Diosqa kachamuwarqan, nispa.

⁴⁴Ahinatan Jesusqa Judío runakunaq Diosmanta yachachinan wasikunapi willaspa purirqan.