Read Quechua Cuzco Bible 1988 LUCAS 6 Bible Online

LUCAS 6 - Quechua Cuzco Bible 1988 bible

LUCAS 6

¹Samana p'unchaypi chakra ukhunta Jesús rishaqtinmi, yachachisqankunaqa trigo umata k'aptaspa makinkupi qhaqospa mikhurqanku.

²Chaymi wakin fariseokunaqa*f** paykunata nirqanku: —¿Imanaqtinmi samana p'unchaypi Diospa kamachikuyninta p'akispa ruwankichis? nispa.

³Jesustaq paykunata nirqan: —¿Manachu leerqankichis Davidpa ruwasqanta? Payqa runankunapiwanmi yarqachikuspa Diospa wasinman haykurqan, hinaspan Diospa ñawpaqenpi churasqa t'antakunata mikhurqan, paywan kaqkunamanpas qoykullarqantaq. Chay t'antakunataqa sacerdotekunallan mikhuqku, nispa.

⁴

⁵Jesusqa nillarqantaqmi: —Ñoqaqa Diospa Kachamusqan Runa*f** kaspan samana p'unchaypi imatachus ruwanankuta kamachikunaypaq atiyniyoq kani, nispa.

⁶Hinallataqmi hukkaq samana p'unchaypipas Diosmanta yachachina wasiman haykuspa yachachirqan. Chaypin kasharqan huk runa paña makin ch'akisqa.

⁷Hinan kamachikuy simita yachachiqkunaqa fariseokunapiwan*f** Jesusta qhamiyarqanku, samana p'unchaypi qhaliyachiqtinqa, chayman tumpalla payta huchachanankupaq.

⁸Paytaq ichaqa yuyaykuyninkuta yachaspa ch'akisqa makiyoq runata nirqan: —Sayarimuspa, chawpipi sayaykuy, nispa. Paytaq hatarispa sayaykurqan.

⁹Hinaqtinmi Jesusqa paykunata nirqan: —Hukta tapusqaykichis: ¿Samana p'unchaypiqa allinkaqtachu ruwana, icha mana allinkaqtachu ruwana? ¿Kawsaytachu qespichina, icha hinallatachu wañuqta qhawana? nispa.

¹⁰Muyuriqninpi llapanta qhawarispataq chay runata nirqan: —Haywarimuy makiykita, nispa. Runataq haywarirqan, chaymi makinqa qhaliyarqapurqan.

¹¹Hinan paykunaqa k'arakta phiñakuspa, imatachus Jesusta ruwanankupaq rimanakurqanku.

¹²Chay p'unchaykunapin Jesusqa Diosmanta mañakunanpaq orqokunaman rirqan, hinan tutantin Diosmanta mañakurqan.

¹³Pacha illarimuqtintaq yachachisqankunata waqyaspan, paykunamanta chunka iskayniyoqta akllarqan, hinaspan paykunata apostolta*f** suticharqan.

¹⁴Paykunan karqan: Simón (paytan Pedrota suticharqan), wawqen Andrés, Jacobo, Juan, Felipe,

¹⁵Mateo, Tomás, Alfeoq churin Jacobo, Zelote*f** nisqa t'aqamanta Simón,

¹⁶Jacoboq churin Judas, Judas Iscariotepiwan, paymi Jesusta hap'ichiqqa karqan.

¹⁷Orqomanta paykunawan uraykuspataq Jesusqa huk pampapi sayaykurqan askha yachachisqankunapiwan, kallarqantaq lliw Judea hap'iymanta Jerusalén llaqtamanta, mama qocha patapi kaq Tiro llaqtamanta, Sidón llaqtamantawan askha runakuna. Paykunan Jesusta uyarinankupaq onqoyninkumanta qhaliyachisqa kanankupaqwan hamurqanku.

¹⁸Supaykunaq ñak'arichisqankunapas qhaliyachisqan karqanku.

¹⁹Jesusqa llapa runata atiyninwan qhaliyachiqtinmi, paytaqa llamiykuytapuni munarqanku.

²⁰Jesustaq yachachisqankunata qhawarispa nirqan: Kusisamiyoqmi kankichis wakchakunaqa, Diospuni kamachikuqniykichisqa kashasqanrayku.

²¹Kusisamiyoqmi kankichis kunan yarqasqakunaqa, saksachisqan kankichis. Kusisamiyoqmi kankichis kunan waqaqkunaqa, asikunkichismi.

²²Kusisamiyoqmi kankichis Diospa Kachamusqan Runarayku*f** runakuna cheqnisuqtiykichis, qarqosuqtiykichis, k'amisuqtiykichis, sutiykichistapas millayta hina pisichaqtinkuqa.

²³Chaykunata ruwasqasuykichis p'unchayqa q'ochukuychis, kusikuychis, hanaq pachapi premioykichisqa hatunmi, chay hinatapunin machulankupas profetakunata*f** ruwarqanku.

²⁴Ichaqa, ¡imaynaraqmi kankichis qhapaqkuna! ¡Qankunaqa qhapaq-kayniykichiswanmi kusikurqankichisña! ¡Chayllañan kanqa!

²⁵¡Imaynaraqmi kankichis kunan saksasqakuna! Yarqachikunkichismi.

²⁶¡Imaynaraqmi kankichis lliw runakuna qankunata alabaqtinku! Chay hinatapunin machulankupas llulla profetakunamanta*f** allinta rimarqanku.

²⁷Uyariwaqniykunamanmi niykichis: —Munakuychis awqaykichiskunata, allinta ruwaychis cheqniqniykichiskunapaq,

²⁸sumaq simiwan kutichiychis ñakaqniykichiskunaman, yanqamanta tumpaqniykichiskunapaqpas Diosmanta mañapuychis.

²⁹Huk lado uyaykipi saqmaqniykimanqa, huknin ladotawanpas kutirichiy, capaykita qechuqniykimanqa camisaykitapas ama hark'akuychu.

³⁰Pipas mañakuqniykimanqa qoy, imaykitapas hap'ikapuqmantaqa amaña mañakapuychu.

³¹Imaynan qankunapaq runakunaq ruwananta munankichis, chay hinallatataq qankunapas paykunapaq ruwaychis.

³²Munakuqnillaykichistachus munakunkichis chayqa, ¿ima allintan ruwankichis? Huchasapakunapas chay hinataqa ruwankun.

³³Allin ruwapuqnillaykichispaqchu allinta ruwapunkichis chayqa, ¿ima allintan ruwankichis? Huchasapakunapas chay hinataqa ruwankun.

³⁴Kutichipunasuykichispaq suyaspalla manunkichis chayqa, ¿ima allintan ruwankichis? Huchasapakunapas huchasapa-masinkumanqa manunkun kaqllatataq chaskinankuraykuqa.

³⁵Munakuychis awqaykichiskunata, allinta ruwapuychis, manuychistaq ama imatapas chaskikuyta yuyaspalla, chaymi premioykichisqa hatun kanqa, hinaspan Qollana Diospa wawankuna kankichis. Payqa mana reqsikuqninkunapaq, mana allinkunapaqpas sumaq sonqon.

³⁶Ahinaqa khuyapayakuq kaychis, imaynan Yayaykichispas khuyapayakuq hina.

³⁷Ama runa-masiykichista huchachaychischu, ahinapin Diosqa mana huchachasunkichischu. Ama huk runakunata huchachaychischu, ahinapin Diosqa mana huchachasunkichischu. Hukkunata pampachaychis, ahinapin Diosqa pampachasunkichis.

³⁸Qoychis runa-masiykichisman, ahinapin Diosqa qosunkichis. Payqa qosunkichis allin tupusqata, ñit'isqata, chhaphchisqata, unkhuyniykichispi llimp'arishaqta. Kikin tupusqaykichis tupuwanmi Diosqa tupusunkichis, nispa.

³⁹Jesusqa huk rikch'anachiy simitapas paykunaman nillarqantaqmi: —¿Huk ñawsa runa ñawsamasinta pusanmanchu? ¿Manachu iskayninku t'oqoman urmaykunkuman?

⁴⁰Yachachisqaqa manan yachachiqninmantaqa aswan yachayniyoqchu, chaypas astawan yachaspaqa yachachiqnin hinan kanqa.

⁴¹¿Imaraykun wawqeykiq ñawinpi qhellita qhawanki, manataq ñawiykipi kaq kurkutaqa rikukunkichu?

⁴²Chayri, ¿imaynatan wawqeykita niwaq: Wawqéy, ñawiykipi kaq qhellita horqosqayki, nispa, ñawiykipi kaq kurkuta mana rikukushaspaykiqa? Iskay uya, ñawiykimantaraq kurkuta horqoy, hinaspaña allinta qhawanki wawqeykiq ñawinpi qhelli horqonaykipaq.

⁴³Allin sach'aqa manan mana allintaqa rurunchu, manallataq mana allin sach'apas allintaqa rurunchu.

⁴⁴Sapanka sach'aqa rurunpin reqsisqa. Manan higostaqa khiskamantachu pallanku, manallataqmi uvastapas t'ankarmantachu pallanku.

⁴⁵Allin runaqa allin sonqoyoq kaspanmi allinta riman, mana allin runataq millay sonqoyoq kaspa millayta riman. Imachus sonqonpi hunt'a kashan chaytan simiqa riman.

⁴⁶Señorníy, Señorníy, nishawaspaykichisqa, ¿imaraykutaq kamachisqaykunataqa mana ruwankichischu?

⁴⁷Pipas ñoqaman hamun, hinaspa simiykunata uyarispa hunt'an, chay runamantan yachachisqaykichis pimanchus rikch'akusqanta:

⁴⁸Rikch'akunmi wasi sayarichiq runaman, paymi qaqa patapi ukhutapuni t'oqospa teqsita churarqan. Lloqlla chayamuqtintaq mayuqa wasapaspa chay wasiman kallpawanpuni waqtakurqan, manataq kuyurichillarqanpaschu allin teqsichasqa kasqanrayku.

⁴⁹Ichaqa pipas uyarishaspa mana hunt'anchu chayqa, rikch'akunmi hallp'a pampapi mana teqsiyoq wasita sayarichiq runaman. Mayutaq chay wasiman kallpawanpuni waqtakuqtin thunikurqan, hinaspan pasaqta purunyapurqan, nispa.