Read Quechua Cuzco Bible 1988 LUCAS 8 Bible Online

LUCAS 8 - Quechua Cuzco Bible 1988 bible

LUCAS 8

¹Chay qhepatataq Jesusqa purirqan llapa llaqtakunata huch'uy llaqtakunatawan, Diospa kamachikuq kananmanta allin willakuykunata willaspa, paywantaq chunka iskayniyoq yachachisqankunapas rirqanku.

²Rillarqankutaqmi supaykunamanta onqoykunamantawan qhaliyachisqa wakin warmikunapas, paykunan karqan Magdalá llaqtayoq María (paymantan Jesusqa qanchis supaykunata qarqosqa),

³Susana, Herodespa mayordomon Chuzaq warmin Juanapiwan. Hinallataq rirqanku askha warmikunapas, paykunan kaqninkuwan Jesusta yachachisqankunatawan yanaparqanku.

⁴Llaqta-llaqtamanta hamuspa askhallaña runa Jesusman huñukamuqtinkun rikch'anachiy simipi paykunata Jesusqa yachachirqan:

⁵—Huk runan chakranta rirqan muhu t'akaq. T'akashaqtinmi wakin muhuqa ñan pataman chayarqan, hinan puriqkuna sarurqanku, phalaq animalkunataq pallarqapurqan.

⁶Wakin muhutaq rumi-rumiman chayarqan, wiñarimuspataq ch'akipurqan ch'akipi kasqanrayku.

⁷Wakin muhutaq khiska-khiskaman chayarqan, hinan khiskakunaqa chaywan kuska wiñamuspa p'amparqapurqan.

⁸Wakin muhutaq allin hallp'aman chayaspa wiñamurqan, hinaspa huklla pachakta rururqan, nispa. Chaykunata yachachispataq kunkayoqta nirqan: —Uyarinanpaq ninriyoqqa uyarichun, nispa.

⁹Chaymi yachachisqankunaqa Jesusta tapurqanku: —¿Ima ninantan nin kay rikch'anachiy simi? nispa.

¹⁰Hinan payqa nirqan: —Imaynatachus runakunata Diospa kamachinanmi pakasqa karqan, chaytan kunan sut'ita yachachisqaykichis, wak runakunamantaq ichaqa rikch'anachiy simikunapi yachachini, qhawashaspa mana rikunankupaq, uyarishaspapas mana entiendenankupaq.

¹¹Kaymi chay rikch'anachiy simiq sut'inchayninqa: Muhuqa Diospa siminmi.

¹²Ñan pataman chayaqkunaqa Diospa siminta uyariqkunan kanku, saqrataq hamuspa sonqonkumanta simita aparqon, mana iñinankupaq, hinaspa mana qespichisqa kanankupaq.

¹³Rumi-rumiman chayaqkunaqa Diospa siminta uyarispa kusikuywan chaskiqkunan kanku, ichaqa kaykunaqa manan saphichasqachu pisi p'unchaykunallapaqmi iñinku, wateqay p'unchaykunapitaq t'aqarikapunku.

¹⁴Khiska-khiskaman chayaqkunaqa Diospa siminta uyariqkunan kanku, ichaqa, kay kawsaypi afanakuywan, qhapaq-kaykunawan, mana allin kusikuykunawan atipachikuspa rurusqanku mana poqopunchu.

¹⁵Allin hallp'aman chayaqkunataqmi uyarispa cheqaq allin sonqowan simi waqaychaqkuna kanku, hinaspa pacienciawan rurunku, nispa.

¹⁶Pipas lamparata hap'ichispaqa manan imawanpas pakarqonchu, manataqmi puñuna pata ukhumanpaschu churaykun, aswanmi k'anchana pataman churan, haykuqkunata k'anchananpaq.

¹⁷Lliw pakasqa kaqtapas pakapi kaqtapas Diosmi rikhurichispa sut'inchanqa.

¹⁸Chay hinaqa, allinta uyariychis. Pipas reparay yachaqtaqa Diosmi astawanraq reparachinqa, pipas mana reparaqmantataqmi reparay yuyasqantapas Diosqa qechupunqa, nispa.

¹⁹Mamanmi wawqenkunapiwan Jesusman hamurqanku, ichaqa askha runakuna kaqtinmi payman mana asuykuyta atirqankuchu.

²⁰Hinan Jesusman willarqanku: —Mamaykin wawqeykikunapiwan hawapi kashanku, qanwan tupayta munaspa, nispa.

²¹Hinaqtinmi paykunata nirqan: —Mamaypas wawqeykunapas Diospa siminta uyarispa hunt'aqkunan, nispa.

²²Huk p'unchaymi Jesusqa yachachisqankunapiwan boteman haykuspa paykunata nirqan: —Qocha chimpaman risun, nispa. Hinan puririrqanku.

²³Ichaqa botepi rishaspankun payqa puñurqapurqan. Chayllamanmi sinchi wayra qochaman wayramurqan, boteman unu hunt'aykushaqtintaq yaqaña chinkaykusharqanku.

²⁴Hinan Jesusman asuykuspa rikch'achirqanku: —¡Yachachikuq, yachachikuq chinkaykushanchisñan! nispa. Pay rikch'arispataq wayrata unu hatariytawan phiñarikurqan, hinan wayraqa thanipurqan, qochapas t'ak-nisqa kapurqan.

²⁵Paykunatataq nirqan: —¿Maytaq iñiyniykichisri? nispa. Hinan mancharisqa musphaspa ninakurqanku: —¿Pitaq kayri? Wayratapas unutapas kamachin, paytaqa kasunkutaq, nispanku.

²⁶Galilea qocha chimpapi Gerasa runakunaq hallp'anmanmi botepi rirqanku.

²⁷Botemanta Jesús lloqsiqtinmi supaypa ñak'arichisqan runa paywan tuparqan. Payqa llaqta runa kashaspapas unayñan mana p'achayoq q'alallaña puriq, manañataq wasinpipas tiyaqchu, aswanpas panteonllapiña.

²⁸Paymi Jesusta rikuspa ñawpaqenpi qonqoriykukurqan, hinaspan kunkayoqta qaparispa nirqan: —¿Iman ñoqawan ruwanayki, Qollana Diospa Churin Jesús? Rogakuykin ama ñak'arichinawaykipaq, nispa.

²⁹Chay runamanta supay lloqsinanpaq Jesús kamachiqtinmi chay hinata qaparirqan. Paytaqa askha kutitan supayqa chhaphchirqan. Cadenakunawan thunkunakunawan wataqtinkupas p'itirqospan supaypa apasqan ch'inneqkunaman riq.

³⁰Jesustaq payta tapurqan: —¿Iman sutiyki? nispa. Chaymi kutichirqan: —“Waranqa-waranqan” sutiyqa, nispa. Chaytaqa nirqan askha supaykuna payman haykusqanraykun.

³¹Hinan supaykuna Jesusta rogakurqanku chinkay-chinkay ukhuman ama wikch'uykunanpaq.

³²Chay orqopitaq t'aqantin khuchikuna mikhusharqan, hinan Jesusta rogakurqan khuchikunaman haykunankupaq, chaymi kacharparirqan.

³³Runamanta lloqsirqospankutaq supaykunaqa khuchikunaman haykurqanku. Chaymi t'aqantin khuchikunaqa qochaman phawarispanku qaqapaykuspa heq'eparqanku.

³⁴Khuchi michiqkunataq chayta rikuspa ayqerirqanku, rispankutaq llaqtapipas campopipas willakamurqanku.

³⁵Chaymi runakunaqa imachus kasqanta qhawamunankupaq rispanku Jesusman chayarqanku, hinaspan supaykunamanta kacharichisqa runata rikurqanku. Paymi Jesuspa qayllanpi p'acharqosqa yuyayninpiña tiyasharqan, chaymi mancharikurqanku.

³⁶Jesuspa qhaliyachisqanta rikuqkunataq paykunaman willarqanku imaynatachus supaypa ñak'arichisqan runaq qhaliyachisqa kasqanta.

³⁷Hinaqtinmi Gerasa hap'iypi tiyaq lliw runakunaqa Jesusta rogakurqanku llaqtankumanta ripunanpaq, sinchita manchakusqankurayku. Chaymi Jesusqa boteman haykuspa kutipurqan.

³⁸Supaykunamanta kacharichisqa qharitaq kuskalla kananpaq rogakurqan, Jesustaq ichaqa kachapurqan:

³⁹—Wasiykita kutipuy, hinaspa willakamuy Diospa imaymana ruwapusqasuykita, nispa. Runataq ripurqan Jesuspa paypaq imaymana ruwasqanta tukuy llaqtantinpi willakuspan.

⁴⁰Qocha chimpaman Jesús kutimpuqtintaq askha runakunaqa kusisqa payta chaskirqanku, llapankun paytaqa suyasharqanku.

⁴¹Diosmanta yachachina wasipi uma runa Jairo sutiyoq qharitaq hamuspa, Jesuspa ñawpaqenpi qonqoriykukuspa rogakurqan wasinta rinanpaq.

⁴²Paypa ch'ulla ususinmi wañunayasharqanña, chay ususinmi chunka iskayniyoq watayoq hinaña karqan. Rishaqtintaq askha runakunaqa Jesusta k'iskiykurqanku.

⁴³Chaypin huk warmi kasharqan. Paymi chunka iskayniyoq wataña yawar apaywan onqosharqan, paymi tukuy kaqninkunatapas hampiqkunapi tukusqa, manataq pipas qhaliyachiyta atisqañachu.

⁴⁴Jesuspa qhepanman asuykuspanmi p'achanpa ch'ullpanta llamiykurqan, hinan yawar apayninqa kaq rato thanirqapurqan.

⁴⁵Chaymi Jesusqa nirqan: —¿Pin llamiykamuwan? nispa. Llapanku mananchakuqtinkutaq, Pedroqa paywan kaqkunapiwan nirqan: —Yachachikuq, runakunan tanqapakuspa k'iskipakamushasunkiku, nispa.

⁴⁶Jesustaq nirqan: —Pipunichá llamiykamuwan, reparanin atiyniywan qhaliyachisqayta, nispa.

⁴⁷Chaymi warmiqa mana pakakuyta atispa, khatatataspan hamurqan, Jesuspa ñawpaqenpi qonqoriykukuspataq llapa runaq qayllanpi payman willakurqan imaraykuchus llamiykusqanta, imaynatachus qhaliyarqapusqantawan.

⁴⁸Hinan Jesusqa warmita nirqan: —Ususíy, iñiyniykin qhaliyachisunki, sumaqllaña ripuy, nispa.

⁴⁹Jesús rimashallaqtinraqmi huñukuna wasipi uma runaq kamachin hamurqan: —Ususiykiqa wañukapunñan, amaña yachachikuqta pusaychu, nispa.

⁵⁰Jesustaq chayta uyarispa nirqan: —Ama mancharikuychu, iñillay, kawsallanqan, nispa.

⁵¹Hinaspan wasita haykuspa, mana pitapas paywan haykunankuta munarqanchu, aswanpas Pedrota, Jacobota, Juanta sipaspa tayta-mamallantawan.

⁵²Lliwmi sipasmanta sinchita llakikuspa waqarasharqanku. Chaymi Jesusqa nirqan: —Ama waqaychischu, manan wañusqachu kashan, puñushallanmi, nispa.

⁵³Hinan wañusqa kasqanta yachaspanku Jesusta asipayarqanku.

⁵⁴Paytaq ichaqa makinmanta hap'iykuspa kunkayoqta nirqan: —¡Sipas, hatarikuy! nispa.

⁵⁵Hinan kawsarimpuspa sayarirqanpacha, Jesustaq kamachirqan sipasman mikhunata qonankupaq.

⁵⁶Tayta-mamantaq muspharqan. Jesustaq paykunata kamachirqan chay ruwasqanta ama pimanpas willanankupaq.