Read Quechua Cuzco Bible 1988 LUCAS 9 Bible Online

LUCAS 9 - Quechua Cuzco Bible 1988 bible

LUCAS 9

¹Jesusqa chunka iskayniyoq yachachisqankunata waqyaspanmi, paykunaman atiyta qorqan llapa supaykunata qarqonankupaq onqosqakunatapas qhaliyachinankupaq.

²Hinaspan paykunata kacharqan Diospa kamachikuq kananmanta willamunankupaq, onqosqakunata qhaliyachimunankupaqwan.

³Nirqantaq: —Aman imatapas ñanpaqqa apakunkichischu, tawnatapas, qoqawatapas, t'antatapas, qolqetapas, iskay p'achatapas.

⁴May wasimanpas haykuspaykichisqa chayllapin samakunkichis chay llaqtamanta ripunaykichiskama.

⁵May llaqtapipas mana chaskiyta munasunkichischu chayqa, chaymanta lloqsispa, chakiykichispi kaq hallp'atapas chhaphchinkichis mana allin ruwasqankuta yachanankupaq, nispa.

⁶Hinan puririspa lliw huch'uy llaqtakunata purirqanku, Diosmanta allin willakuykunata willaspa, tukuy hinantinpi qhaliyachispankupiwan.

⁷Kamachikuq Herodesmi Jesuspa lliw ruwasqankunata uyarirqan. Wakinmi nirqanku: —Juanmi wañusqanmanta kawsarimpun, nispa. Wakintaq: —Eliasmi rikhurimpun, nirqanku. Hukkunataq: —Mayqen ñawpa profetacha*f** kawsarimpun, nirqanku. Chaymi Herodesqa iskayrayaspa nirqan:

⁸

⁹—Juanpa umantaqa qhoruchipurqanin riki. ¿Pitaq chayri kanman chaykunata uyarinaypaqqa? nispa. Paytataq rikuytapuni munarqan.

¹⁰Apostolkunataq*f** kutimuspa imaymana ruwamusqankuta Jesusman willarqanku. Paykunallata pusarikuspataq Jesusqa Betsaida nisqa llaqta qayllaman rirqan.

¹¹Runakunataq chayta yachaspa qhepanta rirqanku. Hinan Jesusqa paykunata chaskispa Diospa kamachikuq kananmanta paykunaman yachachirqan, onqosqakunatapas qhaliyachirqan.

¹²Ch'isiyaykushaqtintaq chunka iskayniyoq yachachisqankunaqa Jesusman asuykuspa nirqanku: —Kachapullayña runakunata muyuriqpi huch'uy llaqtakunaman estanciakunaman chaypi qorpachakamunankupaq, mikhunatapas maskhakamunankupaq, kaypiqa ch'inneqpin kashanchis, nispa.

¹³Jesustaq ichaqa paykunata nirqan: —Qankuna mikhuchiychis, nispa. Paykunataq nirqanku: —Phisqa t'anta iskay challwallaykun kashan, icha, ¿riykumanchu kay llapan runakunapaq mikhuna rantimuq? nispa.

¹⁴Yaqa phisqa waranqa qharikunan karqanku. Chaymi yachachisqankunata Jesusqa nirqan: —Phisqa chunkatakama t'aqaspa tiyachiychis, nispa.

¹⁵Chay hinata ruwaspankun llapankuta tiyachirqanku.

¹⁶Hinan Jesusqa phisqa t'antata iskay challwatawan hap'iykuspa hanaq pachata qhawarispa graciasta qorqan, phasmispataq yachachisqankunaman haywarqan runakunaman rakimunankupaq.

¹⁷Hinan llapanku mikhurqanku saksanankukama, puchuq p'akisqakunatataq chunka iskayniyoq canastata hoqarirqanku.

¹⁸Huk kuti Jesusqa sapallan mañakushaqtinmi yachachisqankunaqa paywan kasharqanku, hinan paykunata tapurqan: —Runakunari, ¿pi kasqaytataq ninku? nispa.

¹⁹Paykunataq kutichirqanku: —Wakinmi Bautizaq Juan kasqaykita ninku, wakintaq Elías kasqaykita ninku, wakinñataq profetakunamanta*f** huknin kasqaykita ninku, nispanku.

²⁰Chaymi Jesusqa paykunata tapurqan: —Qankunari, ¿pi kasqaytataq ninkichis? nispa. Chaymi Simón Pedroqa payta nirqan: —Diospa Akllasqan Criston kanki, nispa.

²¹Paytaq ichaqa allin-allinta kamachirqan chayta ama pimanpas rimarinankupaq.

²²Nirqantaq: —Ñoqaqa Diospa Kachamusqan Runan kani, anchatapunin ñak'arisaq. Ñoqataqa kurak runakunan, sacerdote umallikunan, kamachikuy simita yachachiqkunan qhawarpariwaspa wañuchiwanqaku, kinsakaq p'unchaypitaq kawsarimpusaq, nispa.

²³Llapa runakunamantaq nirqan: —Pipas qhepayta hamuyta munaqqa pay kikinta sapa p'unchay nikuchun: Manañan ñoqapaqchu kawsani, nispa, hinaspa ñoqarayku ñak'arispa wañunanpaq kaqtinpas qhepayta hamuchun.

²⁴Pipas pay kikillanta waqaychakuyta munaqqa wiñaypaqmi chinkapunqa, pipas ñoqarayku wañuqmi ichaqa wiñaypaq kawsanqa.

²⁵Huk runachus kay pachantinpi lliw kaqkunata hap'ikapuspa, wiñaypaq chinkapunqa chayqa, ¿ima allintaq paypaq kanqa?

²⁶Pipas ñoqamanta simiykunamantawan p'enqakunqa chayqa, Diospa Kachamusqan Runapas paymantaqa p'enqakullasaqtaqmi, Yayaqpas ch'uya angelkunaqpas hatunchasqan lliphlli-kayniypi hamuspay.

²⁷Cheqaqtan niykichis, Diosqa kamachikunanpaq hamuqtinmi, kaypi kaqkunamanta wakinniykichisqa kawsashankichisraq, nispa.

²⁸Pusaq p'unchay hinaña chay simikuna nisqanmantataqmi Pedrota, Juanta, Jacobotawan Jesusqa pusarikurqan, hinaspan orqota wicharqan Diosmanta mañakuq.

²⁹Mañakushaqtintaq uyan hukniraqman tukurqan, p'achanpas yuraq lliphipishaqman.

³⁰Chayllamanmi iskay qharikuna lliphlli-kaypi rikhurimurqanku, paykunan Moiseswan Eliaswan karqanku. Jesuswan parlashaspataq wañunanmanta rimarqanku. Jesusqa Jerusalén llaqtapin wañunanpuni karqan.

³¹

³²Pedrotaq paywan kaqkunapiwan puñuywan aysachikusharqanku, rikch'arispankutaq Jesuspa lliphlli-kayninta rikurqanku, chay iskaynin qharikunatapas paywan kashaqta.

³³Jesusmanta paykuna t'aqarikushaqtinkutaqmi Pedroqa payta nirqan: —Yachachikuq ¡may allinmi kaypi kayninchisqa! Kinsa ch'ukllata ruwasaqku, hukta qanpaq, hukta Moisespaq, huktataq Eliaspaq, nispa. Pedroqa mana reparaspan chay hinata rimarqan.

³⁴Chayta pay rimashaqtintaq huk phuyu hamuspa paykunata pakaykurqan. Chaymi phuyuq pakaykusqan kaspa mancharikurqanku.

³⁵Chay phuyumantan huk kunka nimurqan: —Kaymi Munasqay Churiy, payta uyariychis, nispa.

³⁶Chay kunka upallaqtintaq Jesús sapallanña kapusharqan, paykunataq chay p'unchaykunapi mana pimanpas imatapas rimarirqankuchu rikusqankuta.

³⁷Qhepantin p'unchaymi orqomanta uraykamushaqtinku, askha runakuna Jesusman tariparqanku.

³⁸Runakuna ukhumantataq huk qhari waqyakurqan: —Yachachikuq, ama hinachu kay, sapallan churiyta qhawaykampuway.

³⁹Paytan supay hap'in, hinan qonqaylla qaparkachan, wat'akichispan phosoqota aqtuchin, k'irispataq ñak'ayta paymanta t'aqarikun.

⁴⁰Yachachisqaykikunatan valekurqani chay supayta qarqonankupaq, manataqmi atirqankuchu, nispa.

⁴¹Chaymi Jesusqa yachachisqankunata nirqan: —¡Ay! ¡Mana iñiyniyoq waqllisqa runakuna! ¿Hayk'aqkamataq qankunawan kasaq? ¿Hayk'aqkamataq muchusqaykichis? nispa. Taytatataq nirqan: —Churiykita pusamuy, nispa.

⁴²Chaymi wayna asuykushallaqtinraq, supayqa urmachispa wat'akichirqan. Jesustaq supayta phiñarikuspa waynata qhaliyachirqan, hinaspan taytanman kutichipurqan.

⁴³Llapankutaq Diospa hatun atiyninmanta muspharqanku. Imaymana ruwasqanmanta llapa musphashaqtinkutaq Jesusqa yachachisqankunata nirqan:

⁴⁴—Kay simikunata allinta uyariychis, Diospa Kachamusqan Runaqa*f** runakunamanmi hap'ichisqa kasaq, nispa.

⁴⁵Paykunataq chay rimasqanta mana entienderqankuchu, mana entiendenankupaq pakasqaraq kaqtin, imachus chay simi kasqanta tapuykuytapas manchakurqankutaq.

⁴⁶Yachachisqakunaqa mayqenninkuchus qollana kanankumantan churanakurqanku.

⁴⁷Hinan Jesusqa sonqokuq yuyaykusqanta yachaspa, huk wawata hap'iykurqan, hinaspan ladonpi sayaykachispa

⁴⁸paykunata nirqan: —Pipas ñoqaq sutiypi kay wawata chaskiqqa, ñoqatan chaskiwan, pipas ñoqata chaskiwaqtaqmi kachamuwaqniy Diosta chaskin, qankuna ukhupi aswan huch'uykaqmi qollanaqa, nispa.

⁴⁹Juantaq Jesusta nirqan: —Yachachikuq, huk runatan sutiykipi supaykunata qarqoshaqta rikumuyku, payqa manan ñoqanchiswan puriqchu, chaymi hark'amurqayku, nispa.

⁵⁰Jesustaq Juanta nirqan: —Ama payta hark'aychischu, mana contranchispi kaqqa ñoqanchiswanmi kashan, nispa.

⁵¹Hanaq pachaman ripunan tiempo qayllaykamuqtinmi Jesusqa Jerusalén llaqtaman riytapuni yuyaykukurqan.

⁵²Hinaspan willaqkunata ñawpachirqan, paykunan rispanku Samaria runakunaq huk llaqtanman haykurqanku qorpachanata maskhamunankupaq.

⁵³Samaria runakunataq mana payta chaskiyta munarqankuchu Jerusalén llaqtamanpuni riqta reparaspa.

⁵⁴Hinan yachachisqankunaqa Jacobowan Juanwan chayta yachaspa nirqanku: —Señorniyku, munanki chayqa hanaq pacha ninata uraykachimusun paykunata rupharqonanpaq profeta*f** Eliaspa ruwasqanta hina, nispa.

⁵⁵Chaymi Jesusqa kutirispa paykunata anyarqan.

⁵⁶Chaymantataq huk llaqtachaman ripurqanku.

⁵⁷Ñanta rishaqtinkun huk runa Jesusta nirqan: —Qanwanmi risaq mayta riqtiykipas, nispa.

⁵⁸Jesustaq payta nirqan: —Atoqkunapas t'oqoyoqmi, phalaq animalkunapas q'esayoqmi, Diospa kachamusqan Runaqmi*f** ichaqa mana kanchu maypi puñuykunallaypaqpas, nispa.

⁵⁹Chaymantataq huk runata nirqan: —Qhepayta hamuy, nispa. Paytaq nirqan: —Señorníy, simiykimanta risaq taytayta p'ampaykamuq, chaymantaqa risaqmi, nispa.

⁶⁰Jesustaq payta nirqan: —Hina wañusqakunaqa ayankuta p'ampamuchunku. Qanqa riy, Diospa kamachikuq kananmanta willamuy, nispa.

⁶¹Huk runapas Jesustaqa nillarqantaqmi: —Señorníy, ñoqapas qanwanqa risaqmi, ichaqa simiykimanta wasiypi kaqkunawanraq kacharparinakamusaq, nispa.

⁶²Hinan Jesusqa payta nirqan: —Pipas yapunata hap'iykuspaña qhepaman qhawariqqa, manan Diospa kamachikushasqanpi llank'ananpaq hinachu, nispa.