Read Quechua Cuzco Bible 1988 DEUTERONOMIO 1 Bible Online

DEUTERONOMIO 1 - Quechua Cuzco Bible 1988 bible

DEUTERONOMIO 1

¹Kay qelqapiqa Moisespa llapan Israel runakunaman Jordán mayu inti lloqsimuy chimpa ch'inneqpi rimaykusqan simikunan kashan. Paykunaqa Suf qhaway Jordán wayq'opin kasharqanku, huk ladopi karqan Parán, hukkaq ladopitaq Tofel, Labán, Hazerot, Dizahabpiwan.

²(Seir orqo-orqonta purispaqa chunka hukniyoq p'unchay puriymi karqan Horeb orqomanta Kades-barneakama).

³Moisesmi atiparqan Amor runakunaq reynin Sehonta, paymi Hesbón llaqtapi tiyasqa, hinallataq Moisesqa atiparqan Basán suyu rey Ogta, paymi Astarot llaqtapipas Edrei llaqtapipas tiyasqa. Chay qhepatan Moisesqa llapan Israel runakunaman rimaykurqan Señor Diospa paykunapaq kamachisqan simikunata, Egiptomanta lloqsimusqanku tawa chunka wata kashaqtin chunka hukniyoq killa qallariy p'unchaypi.

⁵Jordán mayu inti lloqsimuy lado Moab suyupi kashaqtinkun, Moisesqa Diospa yachachikuy siminkunata sut'incharqan. Nirqantaq:

⁶—Apu Señor Diosninchismi Horeb orqopi kay hinata niwarqanchis: Sinchi unaytañan kay orqopi qaynankichis.

⁷Wakichikuychis, hinaspa riychis Amor runakunaq orqo-orqonman llapan qorpanpi muyuriq hap'iykunamanwan: Jordán wayq'oman, orqo-orqoman, Shefela nisqa moqo-moqoman, Neguev ch'inneqman Mama Qocha pataman, Canaán runakunaq hallp'anman, Libanomanwan, Eufrates hatun mayukama.

⁸Ñoqaqa chay suyuta qoykichisñan. Riychis hinaspa hap'ikamuychis Abraham, Isaac, Jacob machulaykichisman mirayninmanwan qonaypaq prometesqay suyuman, nispan, nispa.

⁹Haqay p'unchaymi qankunata nirqaykichis: Manan sapallayqa qankunata kamachiyta atiymanchu.

¹⁰Apu Señor Diosninchismi askha wawakunata qosunkichis, chayraykun hanaq pacha ch'askakuna hinaraq ancha askha kankichis,

¹¹Ñoqaqa munanin machulaykichispa Diosnin Señorpa prometesqasuykichisman hina saminchanasuykichista, hinallataq waranqa kutitaraq kunan kasqaykichista askhayachinasuykichistapas.

¹²Ichaqa, manan sapallayqa tukuy sasachakuyniykichista ch'aqwayniykichistapas chaninchayta atiymanchu.

¹³Chayrayku sapanka ayllumanta yachaysapakunata, yuyaysapakunata, yachaq qharikunatawan akllaychis, qankunaq umalliykichista churanaypaq, nispa.

¹⁴Qankunataq kutichiwarqankichis: Allinmi, nisqaykiman hina ruwasaqku, nispa.

¹⁵Hinan sapanka ayllumanta akllasqaykichis yachayniyoq allin yachaq umakunata chaskispay, qankunaq kamachiqniykichista t'aqa-t'aqaman churarqani, aylluman, waranqaman, pachakman, phisqa chunkaman, chunkaman ima.

¹⁶Chay kutipachataq juezniykichista kamachirqani: Uyariychis llaqta-masiykichispa ch'aqwayninkunata, chanin-kayman hina t'aqtaychis llaqtamasi puratapas, hinallataq llaqtayoqta wak llaqtayoqtawanpas.

¹⁷Chaninchaspaykichisqa aman huk runaman sayakunkichischu, qhapaqtapas wakchatapas kuskatan t'aqtankichis. Ama pitapas manchakuychischu, Diosmi qankunawan chaninchachiqqa. Huk sasachayta mana chaninchayta atinkichischu chayqa, ñoqaman pasachimuwankichis, ñoqataq chaninchasaq, nispa.

¹⁸Haqay p'unchaymi tukuy imaynatachus ruwanaykichista kamachirqaykichis.

¹⁹Apu Señor Diosninchispa kamachiwasqanchista kasuspanchismi, Horeb orqomanta lloqsirqanchis Amor runakunaq orqo-orqonman, qankunaqa yachankichismi haqay manchana hatun ch'inneqpi purisqanchista. Hinallataq Kades-barneaman chayaspa,

²⁰nirqaykichis: Chayamunchismi Apu Señor Diosninchispa qowananchis Amor runakunaq orqo-orqonman.

²¹¡Qhawariychis, Apu Señor Diosninchismi qosunkichis kay hallp'ata! Haykuychis, hinaspa machulanchispa Señor Diosninpa nisqanman hina hap'ikapuychis, amataq manchakuychispaschu pisi kallpayaychispaschu, nispa.

²²Qankunataq ichaqa niwarqankichis: Allinmi kanman ñawpaqtaqa kachasunmanraq wakinninchista chay suyuta qhamiyamunanpaq, paykunataq kutimuspanku willawasunchis mayqen ñantachus rinanchista mayqen llaqtamanchus chayananchistapas, nispa.

²³Chay yuyaykusqaykichismi allin rikch'akuwarqan, hinan chunka iskayniyoq qharikunata qankuna ukhumanta akllarqani, huk qharita sapanka ayllumanta.

²⁴Paykunataq orqo-orqoman rirqanku, hinaspan Eskol wayq'oman chayaspanku tukuy chay hallp'ata qhamiyarqanku.

²⁵Kutimuspankutaq chay hallp'amanta frutakunata apamuwarqanchis, hinaspa willawarqanchis: Apu Señor Diosninchispa qowananchis hallp'aqa ancha sumaqmi kasqa, nispa.

²⁶Qankunataq ichaqa mana riyta munarqankichischu, aswanpas Apu Señor Diosniykichispa kamachisqanta mana kasurqankichischu,

²⁷karpaykichispipas chhuchupakuspa nirqankichis: Señor Diosqa cheqniwanchismi, chaymi Egipto suyumanta horqomuwarqanchis Amor runakunaman hap'ichinawanchispaq, hinaspa llapanchista ch'usaqyachinawanchispaq.

²⁸¿Maymanñataq risunman? Qhamiyaq llaqta-masinchiskunapas pasaqta mancharichiwanchis: Chay suyupiqa kasqaku ñoqanchismanta aswan atiyniyoqmi, hinallataq aswan hatun sayayniyoq runakuna. Llaqtankunapas sinchi hatunmi kasqa, ancha alto perqawan muyuchisqataq. Rikumullaykutaq Anak[1] qharikunatapas, nispa, nispaykichis.

²⁹Chaymi ñoqaqa nirqani: Ama manchakuychischu, amataq paykunatapas manchapakuychischu.

³⁰Ñawpaqenchista puriq Apu Señor Diosninchismi qankunamanta sayarikunqa, imaynan Egipto suyupi ruwasqanta rikurqankichis hinata.

³¹Hinallataq ch'inneqpipas rikurqankichis Apu Señor Diosninchis tukuy purimusqanchispi kayman chayamunaykichiskama pusamusqasuykichista, imaynan huk tayta wawanta makinmanta hap'iykuspa pusan hinata, nispa.

³²Chaywanpas manan qankunaqa Apu Señor Diosninchisman hap'ipakurqankichischu.

³³Paymi ñawpaqeykichista rirqan maypichus qaynanaykichis cheqasta maskhaspa, hinaspa purinaykichis ñanta tutapi ninawan k'ancharqan, p'unchaypitaq phuyuwan ñanta rikuchirqan.

³⁴Chhuchupakusqaykichista uyarispanmi, Señor Diosqa sinchita phiñakurqan, chaymi jurarqan:

³⁵Kay waqllisqa miray runakunaqa manan ch'ullallapas machulaykichisman qonaypaq prometesqay sumaq hallp'ata rikunqachu,

³⁶aswanpas Jefoneq churin Calebllan rikunqa. Qhamiyaq rispa sarusqan hallp'atan paymanpas churinkunamanpas qosaq, tukuy sonqo ñoqata qatikuwasqanrayku, nispa.

³⁷Qankuna hawan Señor Diosqa ñoqapaqpas phiñakullarqantaq, chaymi niwarqan: Manan qanpas chay hallp'amanqa haykunkichu,

³⁸aswanpas yanapaqniyki Nunpa churin Josuellan haykunqa. Chay hinaqa kallpachayyá Josueta, paypa kamachisqanmi Israel runakunaqa chay hallp'ata hap'ikapunqaku, nispa.

³⁹Hinan Señor Diosqa niwarqanchis: Qankunaqa: Awqaykun qechuwanqaku wawaykuta, nispan yuyaykurqankichis, ichaqa chay wawakunan haykunqa. Paykunaqa allinkaqtapas mana allinkaqtapas manan reparayta yachankuraqchu, paykunamanmi chay suyuta qosaq hap'ikapunankupaq.

⁴⁰Qankunataq ichaqa ch'inneqman kutipuychis, Puka Qocha ladoman ripuspaykichis, nispa.

⁴¹Chaymi qankunaqa niwarqankichis: Señor Dios contran huchallikuyku, chhaynaqa kunan maqanakuq risaqku Apu Señor Diosninchispa kamachiwasqanchisman hina, nispa. Chaymi qankunaqa armaykichista hap'ispaykichis, orqo-orqoman seqayqa mana sasa kananta yuyaykurqankichis.

⁴²Señor Diosmi ichaqa niwarqan: Willay paykunaman: Ama maqanakuq riychischu. Manan qankunawanchu kani, paqtan awqaykichiskuna atipasunkichisman, nispayki, nispa.

⁴³Hinan chayta nirqaykichis, qankunataq ichaqa mana kasuwarqankichischu, aswanpas orqo-orqoman seqarqankichis, hatunchakuspaykichis Señor Diospa kamachisqanta mana kasuspa.

⁴⁴Hinan chay orqo-orqopi tiyaq Amor runakuna qankunawan maqanakuq lloqsimurqan, chaymi wanqoyro hinaraq qatirqasunkichis Hormakama, hinan Seir orqo-orqopi atiparqasunkichis.

⁴⁵Kutimuspataq Señor Diospa ñawpaqenpi waqarqankichis, paytaq ichaqa manapuni uyarirqasunkichischu.

⁴⁶Chayraykun ancha unayta Kades hap'iypi qhepakurqankichis.