Read Quechua Cuzco Bible 1988 DEUTERONOMIO 10 Bible Online

DEUTERONOMIO 10 - Quechua Cuzco Bible 1988 bible

DEUTERONOMIO 10

¹Haqay p'unchaymi Señor Diosqa niwarqan: Iskay p'alta rumikunata ch'eqokamuy ñawpaqkaqta hina, k'ullumanta huk cajatawan ruwakamuy, hinaspa kay orqoman wichamuy.

²Ñoqan chay p'alta rumikunapi qelqasaq ñawpaq p'akisqayki rumikunapi qelqarqani chay kikin simikunata, hinaspa chaykunata cajaman churanki, nispa.

³Chaymi acacia kurkumanta huk cajata ruwarqani, iskay p'alta rumikunatawan ch'eqorqani ñawpaqkaqta hina. Hinaspa chay rumikunata aparikuspay orqoman wicharqani.

⁴Señor Diostaq p'alta rumikunapi qelqarqan ñawpaqkaqta hina, orqopi nina ukhumanta huñukuy p'unchay rimasqan chunka kamachikuy simikunata, hinaspa chaykunata qomuwarqan.

⁵Orqomanta kutiykamuspataq, chay rumikunata ruwasqay cajaman churarqani, chaypin kashan Señor Diospa kamachiwasqanman hina.

⁶(Israel runakunaqa Jaakanpa churinkunaq p'uytunkunamantan puririrqanku Moserakama. Chaypin Aarón wañukapurqan, hinan p'ampapurqanku. Churin Eleazartaq rantinpi sacerdote kapurqan.

⁷Chaymantataq Gudgodaman rirqanku, Gudgodamantataq Jotbataman rirqanku, chaypiqa askhan unu karqan.

⁸Hinan Señor Diosqa Leví aylluta akllakurqan rimanakuy cajanta apanankupaq, payta qayllanpi servinankupaq, sutinpi saminchanankupaqwan, chay hinatan kunankama ruwashanku.

⁹Chaymi Leví ayllu runakunaqa mana ayllumasin runakuna hinachu hallp'ata chaskirqanku, paykunaqa Señor Diospa sacerdoten-kaynillankutan chaskirqanku, Señor Diospa nisqanman hina).

¹⁰Ñoqaqa tawa chunka p'unchay tawa chunka tutan orqopi kasharqani ñawpaq kuti hina, chaymi Señor Diosqa mañakusqayta uyariwaspa mana wañuchiyta munarqasunkichischu.

¹¹Aswanpas niwarqan: Phaway kay llaqtata pusaykuy machulaykichisman juraspa prometesqay hallp'aman, chaytan paykuna hap'ikapunqaku, nispa.

¹²Chay hinaqa, Israel runakuna, ¿imatataq ruwanaykichista munan Apu Señor Diosniykichisqa? Kaykunallatan munan: payta manchakunaykichista, tukuy kamachikuyninta kasunaykichista, munakunaykichista, tukuy sonqo tukuy alma servinaykichista,

¹³hinallataq kunan kamachisqay unanchayninkunata kamachikuyninkunatapas hunt'anaykichistawan, ahinapin allillan kankichis.

¹⁴Qhawariychis, Señor Diospa kaqninmi lliw hanaq pachapas, kay pachapas, tukuy chaypi kaqkunapas.

¹⁵Chaywanpas Señor Diosqa machulaykichistan anchatapuni munakurqan, chaymi tukuy llaqtakunamanta aswantaqa qankunata akllakurqasunkichis, chay hinapin qankuna akllasqa llaqtaña kankichis.

¹⁶Chay hinaqa sonqoykichiswan kasukuqpuni kaychis, ama rumi sonqo kaspa k'ulluchakuychischu.

¹⁷Apu Señor Diosniykichisqa dioskunaq Diosninmi, apukunaq Apunmi. Payqa qollananmi, atiyniyoqmi, manchanataqmi. Payqa manan pimanpas sayapakunchu, manataq lluk'iykusqatapas chaskikunchu.

¹⁸Makillan qhawan mana sarunchasqa kanankupaq viudakunatapas mana tayta-mamayoqkunatapas, hinallataq wak llaqtayoqkunatapas munakuspa p'achachin mikhuchin.

¹⁹Qankunapas munakullaychistaq wak llaqtayoqkunataqa, Egipto suyupi wak llaqtayoq kasqaykichisrayku.

²⁰Apu Señor Diosniykichistan manchakunkichis, pay sapallantataq servinkichis, paypaq hunt'aqllapuni kaychis, juraspaykichisqa paypa sutinpi juraychis.

²¹Payqa yupaychanaykichismi, payqa Diosniykichismi, paymi qankunapaq rikushaqtiykichis manchay hatun musphanakunata ruwarqan.

²²Egiptoman uraykuq machulaykichiskunaqa qanchis chunka runakunallan kasqaku, kunanmi ichaqa Apu Señor Diosniykichis hatun llaqtata mirachisunkichis ch'askakunata hinaraq.