Read Quechua Cuzco Bible 1988 DEUTERONOMIO 11 Bible Online

DEUTERONOMIO 11 - Quechua Cuzco Bible 1988 bible

DEUTERONOMIO 11

¹Chay hinaqa, Apu Señor Diosniykichista munakuychis, hinataq hunt'anaykichispaq kamachisqasuykichis unanchayninta, chaninchayninta, kamachikuyninkunatapas kasuychis.

²Yuyariychis Apu Señor Diosniykichispa yachachinasuykichista, chaytaqa manan wawaykichiskuna yachanchu manataq rikurqankupaschu. Yuyariychis paypa hatun-kayninta hatun atiynintapas,

³hinallataq Egipto rey Faraón contra suyun contra ima señalkunata musphanakunata ruwasqantapas.

⁴Egipto soldadokuna qatisuqtiykichismi, Señor Diosqa caballonkunantinta carretankunantinta Puka Qochawan millp'uchirqan. Ahinapin paykunata wañuchipurqan.

⁵Yuyarillaychistaq manaraq kayman chayamushaqtiykichis ch'inneqpi Señor Diospa qankunapaq tukuy ruwasqankunata,

⁶hinallataq Rubén ayllumanta Eliabpa churin Datanta Abiramtawan ruwasqantapas. Llapa Israel runakuna rikushaqtinmi, paykunata aylluntinta karpantinta tukuy kaqninkunantinta pampa kicharqokuspa millp'urqorqan.

⁷Cheqaqtapunin qankunaqa Señor Diospa chay hatun musphay ruwasqankunata rikurqankichis.

⁸Kunan kamachisqay tukuy kamachikuykunata hunt'aychis, ahinapin kallpayoq kankichis, chaskinaykichis suyuta hap'ikapunkichis,

⁹hinallataq chay hallp'api unayta kawsankichis. Chaytan Señor Diosqa machulaykichisman mirayninkumanpas qonanpaq prometesqa, chay hallp'aqa imaymanaq hunt'asqa wiñananmi.

¹⁰Hap'ikapunaykichis hallp'aqa manan lloqsimusqaykichis Egipto hallp'a hinachu, chaypiqa muhu tarpusqaykichista huertata hina makilla qarparqankichis.

¹¹Hap'ikapunaykichis hallp'an ichaqa wayq'okunayoq orqokunayoq, parapas chayashallanmi.

¹²Chay hallp'ataqa Apu Señor Diosniykichismi mana saqespa makilla waqaychashan wata qallariymanta wata tukukuykama.

¹³Kunan p'unchay kamachisqay simikunata hunt'ankichis, Apu Señor Diosniykichistapas munakunkichis, tukuy sonqo tukuy alma payta servinkichis chayqa,

¹⁴Apu Señor Diosniykichisqa tiemponpin parata chayachimunqa, tarpuy kinrayta hallmay kinraytapas. Ahinapin qankunapaq kanqa trigopas vinopas aceitepas.

¹⁵Hinallataq uywakunaq mikhunanpaq campopi q'achuta wiñachinqa, qankunaq mikhunaykichispas llasaqmi kanqa.

¹⁶Paqtataq qankuna kikiykichis q'otukuwaqchis. Ama Señor Diosmanta t'aqakuychischu, amataq wak dioskunatapas yupaychaspa serviychischu.

¹⁷Mana chayqa, qankuna contra phiñakuspanmi Señor Diosqa parata mana chayachimunqachu, hinan chakrapas rurusqanta mana poqochinqachu, hinallataq qankunapas pisi p'unchaykunallapi Señor Diospa qonasuykichis allin hallp'api wañunkichis.

¹⁸Chayrayku chay simikunata sonqoykichispi allinta waqaychaychis, hinallataq makiykichismanpas mat'iykichismanpas chay simikuna qelqasqata watakuychis yuyarinaykichispaq.

¹⁹Wawaykichiskunamantaq chay simikunata yachachiychis, chaykunamanta rimapayaychis wasipi kashaspapas, ñanta purishaspapas, puñuykushaspapas, hatarishaspapas.

²⁰Qelqakullaychistaq wasiykichis punku sayaq k'aspikunapipas, llaqtaykichis punkukunapipas.

²¹Ahinapin machulaykichisman qonanpaq Señor Diospa prometesqan hallp'api qankunapas wawaykichiskunapas unayta kawsankichis, kay pachapas hanaq pachapas kasqan tukuy p'unchaykuna.

²²Kunan kamachisqayman hinachus tukuy kay simikunata hunt'ankichis Apu Señor Diosniykichista munakunkichis, kamachikuyninkunatapas kasunkichis, hunt'aqllapuni kankichis chayqa,

²³tukuy suyukunatan ñawpaqeykichismanta Señor Diosqa wikch'unqa. Qankunamanta aswan askha aswan kallpayoq suyukunaña kaqtinpas, atipankichispunin.

²⁴Purinkichis chay tukuy hallp'akunan qankunaq kanqa. Chaymi hallp'aykichis kanqa uray lado ch'inneqmanta wichay lado Líbano orqokunakama, inti lloqsiy lado Eufrates mayumantataq inti haykuy lado Mama Qochakama.

²⁵Manan pipas tupapakusunkichischu. Apu Señor Diosniykichismi prometesqanman hina maypiña purinkichis chaypas chaypi tiyaq runakunata qankunawan manchachinqa llaksachinqa.

²⁶Kunanmi rikuchiykichis saminchayta ñakaytawan, mayqentapas akllakunaykichispaq.

²⁷Señor Diospa siminkunata kunan kamachishaykichis chaykunata kasunkichis chayqa, Señor Diosmi saminchasunkichis.

²⁸Manataqchus kay nisqay simikunata kasunkichis aswanpas waqllipunkichischus mana reqsisqa wak dioskunata yupaychaspa chayqa, ñakasunkichismi.

²⁹Hap'ikapunaykichis hallp'aman Apu Señor Diosniykichis pusaykusuqtiykichisqa, Gerizim orqomanta saminchayta rimamunkichis, Ebal orqomantataq ñakayta rimamunkichis.

³⁰Chay orqokunaqa Jordán mayu chimpapin kashan, Jordán wayq'opi tiyaq Canaán runakunaq hallp'anpi. Ñanpa inti haykuy ladonpi kashan, Morepi encina sach'a-sach'a qaylla Gilgal llaqta qhawaypi.

³¹Jordán mayu chimpanaykichis patapiñan kashankichis, Apu Señor Diosniykichispa qonasuykichis hallp'ata hap'ikapunaykichispaq. Hap'ikapuspaykichis chaypi tiyaspataq,

³²kunan kamachisqay unanchaykunatapas kamachikuykunatapas makilla hunt'aychis.