Read Quechua Cuzco Bible 1988 DEUTERONOMIO 12 Bible Online

DEUTERONOMIO 12 - Quechua Cuzco Bible 1988 bible

DEUTERONOMIO 12

¹Kay kamachikuykunatapas unanchaykunatapas qankunaqa tukuy kawsasqaykichis p'unchaykunan hunt'ankichis, machulaykichispa Señor Diosnin hap'ikapunaykichispaq qosunkichis chay hallp'api.

²Chaypi tiyaq wikch'unaykichis runakunaqa diosninkuta yupaychanku orqo patakunapi, moqokunapi, askha k'allmayoq sach'a chakikunapipas. Chay cheqaskunatan lliwta thuninkichis.

³Hinallataq altarninkuta, yupaychana saywa ruminkuta, Asera nisqa diosankuta, diosninkuq rikch'ayninkunatapas llapanta ñut'uta p'akinkichis, pipas manaña hayk'aqpas chaykunata yuyarinanpaq.

⁴Qankunaqa manan chay runakuna diosninkuta yupaychanku chay hinatachu Apu Señor Diosniykichista yupaychankichis.

⁵Señor Diosmi aylluykichis ukhupi huk cheqasllata akllanqa chaypi payta yupaychanaykichispaq, chaytan yupaychaq rinkichis.

⁶Apankichistaq ruphachina sacrificiokunatapas, sumaq kawsay sacrificiokunatapas, hinallataq diezmoykichista, ofrendaykichista, Señor Diosman qonaykichispaq prometekusqaykichis ofrendakunata, tukuy sonqo ofrendakunata, wakaykichispa ovejaykichispa ñawpaq wachay uñankunata ima.

⁷Chaymantataq Apu Señor Diosniykichispa ñawpaqenpi tayta-mama wawakunantin mikhunkichis, tukuy llank'asqaykichismanta kusikunkichis, Señor Diosniykichis saminchaqtin.

⁸Chaypiqa manan kaypi sapanka ima munasqanchista ruwanchis chay hinatachu ruwankichis.

⁹Manan chayankichisraqchu hap'ikapunaykichispaq Apu Señor Diosniykichispa qonasuykichis hallp'aman, chayllapiñan thak-kaypi kawsankichis.

¹⁰Jordanta chimpaspaykichis Apu Señor Diosniykichispa qonasuykichis hallp'ata hap'ikapuqtiykichismi, payqa tukuy awqaykichiskunamanta qespichisunkichis, hinan qankuna thak-kaypi kawsankichis.

¹¹Chaymantataq Apu Señor Diosniykichispa payta yupaychanapaq akllakusqan cheqasman tukuy kamachisqayta apankichis: ruphachina sacrificiokunata, sumaq kawsay sacrificiokunata, diezmokunata, ofrendakunata, Señor Diosman qonaykichispaq prometekusqaykichis llapan ofrendakunatawan.

¹²Hinan Apu Señor Diosniykichispa qayllanpi q'ochukunkichis, qankunapas, wawaykichispas, kamachiykichispas, llaqtaykichispi tiyaq Leví runakunapas, paykunaqa manan qankuna hinachu hallp'ata chaskinqaku.

¹³Paqtataq munasqaykichis cheqaskunapi Señor Diosman ruphachina sacrificiokunata haywawaqchis,

¹⁴mayqen ayllupichus Apu Señor Diosniykichis huk cheqasta akllakunqa chayllapin haywankichis, tukuy kamachisqaykunatapas hunt'ankichis.

¹⁵Chaywanpas llaqtaykichispiqa animalkunata nak'akuspaykichis hayk'an munasqaykichista aychanta mikhunkichis, may chhikatachus Señor Dios qosunkichis chayman hina. Chaytaqa pipas mikhullankichismi, ch'uya kaqpas mana ch'uya kaqpas, imaynan tarukata luychuta mikhunkichis hinata.

¹⁶Yawarninta ichaqa ama mikhunkichischu, aswanpas pampaman hich'apunkichis.

¹⁷Aman llaqtaykichiskunapi Señor Diospaq t'aqasqaykichis kaqtaqa mikhunkichischu trigomanta vinomanta aceitemanta diezmoykichiskunata, ovejaykichispa wakaykichispa ñawpaq wachay uñankunata, tukuy sonqo ofrendakunata, Señor Diosman qonaykichispaq prometekusqaykichis ofrendakunata, wak ofrendakunatapas.

¹⁸Chaykunataqa llank'asqaykichismanta kusikuspan mikhunkichis Apu Señor Diosniykichispa ñawpaqenpi maytachá akllakunqa chay cheqasllapi, wawaykichiskunapiwan, kamachiykichiskunapiwan, llaqtaykichispi tiyaq Leví runakunapiwan.

¹⁹Paqtataq Leví runakunata tukuy kay pachapi kawsasqaykichis p'unchaykuna qonqawaqchis.

²⁰Apu Señor Diosniykichis prometesqanman hina hallp'aykichista hatunyachiqtinqa, aychata mikhuyta munaspaykichisqa mikhullaychis hayk'an munasqaykichista.

²¹Apu Señor Diosniykichispa payta yupaychanapaq akllakusqan cheqas tiyasqaykichismanta karu kaqtinqa, paypa qosqasuykichis ovejakunata wakakunata nak'akuspa hayk'an munasqaykichista tiyasqaykichispi mikhuyta atinkichismi, kamachisqayman hina.

²²Chaytaqa pipas mikhullankichismi ch'uya kaqpas mana ch'uya kaqpas, imaynan tarukata luychuta mikhunkichis hinata.

²³Yawartan ichaqa amapuni mikhunkichischu, yawarpiqa kawsaymi kashan, chayrayku ama kawsayta yawartawan mikhunkichischu.

²⁴Aman yawarta mikhunkichischu aswanpas pampamanmi hich'apunkichis.

²⁵Aman yawarta mikhunkichischu, ahinapin qankunapas mirayniykichispas allillan kankichis Señor Diospa munayninta ruwasqaykichismanta.

²⁶Ichaqa Señor Diospaq t'aqasqaykichis ofrendakunatapas, payman qonaykichispaq prometekusqaykichis ofrendakunatapas Señor Diospa akllakusqan cheqasmanmi apankichis,

²⁷chaypitaq Apu Señor Diosniykichispa altarninpi haywankichis ruphachina sacrificiokunata. Haywasqaykichis sacrificiokunaq yawarnintataq altarman hich'ankichis, aychantataq ichaqa mikhuyta atinkichis.

²⁸Tukuy kay kamachisqay simikunata makilla hunt'aychis, hinan qankunapas mirayniykichispas allillanpuni kankichis, Apu Señor Diosniykichispa munayninta chaninta ruwasqaykichismanta.

²⁹Hap'ikapunaykichis suyu runakunataqa Apu Señor Diosniykichismi wañuchinqa, hinan qankunaqa hap'ikapuspa chaypi tiyankichis.

³⁰Paqtataq Señor Diospa paykunata wañuchisqan qhepata kikiykichista q'otukuwaqchis, chayrayku ama diosninkuta yupaychayta yuyaykuspa tapukunkichischu: ¿Imaynatataq paykunari diosninkuta servirqan? nispaqa.

³¹Aman Apu Señor Diosniykichistaqa chay runakuna diosninkuta servinku chay hinataqa yupaychankichischu, paykunaqa diosninkuta servispankuqa Señor Diospa cheqnisqan tukuy qhellikaqtan ruwashanku, kikin wawankutapas diosninkuman sacrificiota haywaspa ruphachishanku.

³²Chayrayku tukuy kamachisqayman hina ruwaychis, ama chhikallantapas yapaykuspa nitaq pakaykuspa.