Read Quechua Cuzco Bible 1988 DEUTERONOMIO 13 Bible Online

DEUTERONOMIO 13 - Quechua Cuzco Bible 1988 bible

DEUTERONOMIO 13

¹Profetapas otaq mosqoypi rikuqpas qankuna ukhupi señalmantapas milagromantapas willasunkichis chayqa,

²hinataq chay willasqasuykichis hunt'akunqa chayqa, nisunkichistaq: Mana yupaychasqaykichis wak dioskunata servispa yupaychasunchis, nispa chayqa,

³ama chayta kasunkichischu. Apu Señor Diosniykichismi chaywanqa probasunkichis tukuy sonqochus tukuy almachus payta munakunkichis chayta yachananpaq.

⁴Apu Señor Diosnillaykichistapunin servinkichis manchakunkichis, kamachikuyninkunatapas hunt'ankichis, paytan kasunkichispas yupaychankichispas, payman k'askasqataq kawsankichispas.

⁵Chay profetatapas mosqoypi rikuqtapas wañuchinkichismi, Egiptopi kamachi-kaymanta horqomuqniykichis Apu Señor Diosniykichis contra sayarichiyta munasqasuykichismanta, hinallataq Señor Diosniykichismanta t'aqayta munasqasuykichismantawan. Ahinapin chay mana allinta qankuna ukhumanta wikch'unkichis.

⁶Kay suyuntinpi runakunaqa karupi tiyaqkunapas qayllapi tiyaqkunapas wak dioskunatan yupaychanku, chay dioskunataqa manan machulaykichispas qankunapas yupaycharqankichischu. Ichaqa ancha munasqa amigoykipas, wawqeykipas, churiykipas, ususiykipas, munasqa warmiykipas pakallapi tanqasunki: Wak dioskunata yupaychasun, nispa chayqa,

⁸aman kasunkichu, amataq uyarinkipaschu, amataq payta khuyapayankichu, amataq hinallata qhawankichu, amallataq payta pakaykunkichu,

⁹aswanpas wañuchinkin. Qanmi ñawpaqta rumiwanqa ch'aqenki, chaymantataq llaqtallantin ch'aqenqa.

¹⁰Wañunankaman ch'aqenki, Egiptopi kamachi-kaymanta horqomuqniyki Apu Señor Diosniykimanta t'aqayta munasqasuykirayku.

¹¹Ahinapin llapa Israel runakuna chayta uyarispanku manchakunqaku, manataq hayk'aqpas chay millay mana chaninta ruwanqakuñachu.

¹²Apu Señor Diosniykichispa tiyanaykichispaq qosqasuykichis llaqtakunapi kashaspaykichis, wakin llaqta-masiykichis millay runakuna huk llaqta runakunata tanqaykusqankuta uyariwaqchis: Wak dioskunata yupaychasun, nispa niqta chayqa,

¹⁴allintapuni qankunaqa tapupakunkichis. Cheqaqtapunitaq chay rimay uyarisqaykichisman hina llaqtaykichiskunapi chay millay mana chanin ruwasqa kanman chayqa,

¹⁵wañuchinkichispuni chay llaqtapi llapan tiyaqkunata, hinallataq llapan uywakunatapas, llapantapuni hayk'an chaypi kaqta wañuchinkichis.

¹⁶Qechusqaykichis tukuy kawsayninkutataq plaza pampaman montoykuspaykichis, llapa llaqtantinta ninawan kanaykunkichis Apu Señor Diosniykichispaq ruphachina ofrendata hina. Hinan chay llaqta wiñaypaq purunyachisqa kapunqa, manataq hayk'aqpas wakmanta sayarichisqachu kanqa.

¹⁷Chay ñakasqa llaqtamanta aman imatapas qankunapaq waqaychakunkichischu, Señor Diospa phiñakuynin thaninanpaq. Hinan payqa allinta qhawarisunkichispas khuyapayasunkichispas, hinallataq askhayachisunkichispas machulaykichisman prometesqanman hina,

¹⁸ichaqa Apu Señor Diosnillaykichistan kasunaykichis, kunan kamachisqay Señor Diospa tukuy kamachikuyninkunatataq hunt'anaykichis, paypa munayninta ruwaspaykichis.