Read Quechua Cuzco Bible 1988 DEUTERONOMIO 14 Bible Online

DEUTERONOMIO 14 - Quechua Cuzco Bible 1988 bible

DEUTERONOMIO 14

¹Qankunaqa Señor Diospa wawankunan kankichis, chayrayku pi runapas wañuqtinqa aman cuerpoykichista q'allakunkichischu, amallataq mat'i chukchaykichistapas rutukunkichischu.

²Qankunaqa Apu Señor Diosniykichispaq t'aqasqa ch'uya llaqtan kankichis, paymi akllakurqasunkichis kay pachapi tukuy llaqtakunamanta paypa llaqtan kanaykichispaq.

³Aman qhelli kaqtaqa mikhunkichischu.

⁴Kaykunan mikhunaykichispaq hina animalkunaqa: waka, oveja, cabra,

⁵tukuy t'aqa taruka, tukuy t'aqa antílope, purun cabra, purun oveja ima.

⁶Tukuy mikhusqanta kutirpakuq p'alqa phapatuyoq animalkunataqa mikhuwaqchismi.

⁷Mikhusqan kutirpakuqpas p'alqa phapatuyoqpas animalkunamantaqa aman mikhunkichischu kaykunata: camellota, wisk'achata, k'ita qowita ima. Chaykunaqa mikhusqan kutirpakuqmi ichaqa manan p'alqa phapatuyoqchu kanku.

⁸Amallataq khuchita mikhunkichischu, p'alqa phapatuyoqña chaypas manan kutirpakuqchu. Aman chay animalkunaq wañusqa cuerpontaqa llaminkichischu.

⁹Unupi kaq llapan pharpayoq sarphayoq animalkunataqa mikhuwaqchismi.

¹⁰Mana pharpayoqta mana sarphayoqta ichaqa ama mikhunkichischu, qankunapaqqa mana mikhunan kanqa.

¹¹Phalaq tukuy mikhuna animalkunataqa mikhuwaqchismi.

¹²Kaykunata ichaqa ama mikhunkichischu: ankata, kunturta, qocha ankata,

¹³k'illinchata, tukuy t'aqa ankata,

¹⁴tukuy t'aqa alqamarita,

¹⁵surita, ch'useqta, qellwaytuta, tukuy t'aqa wamanta,

¹⁶hukuta, pikpirita, pakpakata,

¹⁷pelicanota, suweq'arata, cormoranta,

¹⁸cigüeñata, waqarta, abubillata, masu huk'uchatawan.

¹⁹Tukuy phalaq kurukunata ama mikhunkichischu, qankunapaqqa mana mikhunan kanqa.

²⁰Tukuy mikhuna kurukunata ichaqa mikhuwaqchis.

²¹Wañusqa animalkunataqa aman mayqentapas mikhunkichischu, aswanpas chaykunataqa llaqtaykichispi tiyaq wak llaqtayoqkunaman mikhunankupaq qowaqchis, mana chayqa puriqkunamanpas vendewaqchis. Qankunaqa Diospaq t'aqasqa llaqtan kankichis. Cabra uñataqa aman mamanpa lechenpi t'impuchinkichischu.

²²Sapa wata ama alqaspa chakraykichiskunaq rurunmanta diezmoykichista t'aqankichis.

²³Chaymantataq Apu Señor Diosniykichispa sutinta yupaychanapaq akllakunqa chay cheqasta rinkichis, hinaspa chaypi Señor Diospa ñawpaqenpi mikhunkichis diezmoykichiskunata: trigomanta, vinomanta, aceitemanta, wakaykichispa ovejaykichispa ñawpaq wachay uñankunamantawan. Ahinapin yachankichis Apu Señor Diosniykichista manchakushanallaykichispaq.

²⁴Apu Señor Diosniykichis saminchasuqtiykichisqa, hinallataq Señor Dios akllakunqa chay cheqas karu kanman tiyasqaykichis llaqtamanta diezmoykichista apanaykichispaq chayqa,

²⁵vendenkichismi diezmo t'aqasqaykichista. Hinaspa chay qolqeta aparikuspa rinkichis Apu Señor Diosniykichis akllakunqa chay cheqasta.

²⁶Chayaspataq rantinkichis wakatapas, ovejatapas, vinotapas, cervezatapas, ima munasqaykichistapas. Hinaspa chaypi Apu Señor Diosniykichispa ñawpaqenpi tayta-mama wawakunantin mikhunkichis q'ochukunkichis.

²⁷Llaqtaykichispi tiyaq Leví runakunataqa aman qonqankichischu, paykunaqa manan qankuna hinachu hallp'ata chaskinqaku.

²⁸Sapa kinsakaq watapin diezmoykichista llaqtaykichispi waqaychankichis.

²⁹Hinan chaykunata mikhunqaku mana hallp'ayoq Leví runakuna, llaqtaykichispi tiyaq wak llaqtayoqkuna, mana tayta-mamayoqkuna, viudakunapas hayk'an munasqankuta. Ahinapin tukuy llank'asqaykichispi Apu Señor Diosniykichis saminchasunkichis.