Read Quechua Cuzco Bible 1988 DEUTERONOMIO 15 Bible Online

DEUTERONOMIO 15 - Quechua Cuzco Bible 1988 bible

DEUTERONOMIO 15

¹Sapa qanchiskaq watapin manuykichiskunata pampachapunkichis.

²Chaytaqa kay hinatan ruwankichis: Pipas llaqtamasinman imatapas manuqqa, chay manutan pampachapunqa. Manataq llaqta-masintapas wawqentapas: Pagapuway, ninqañachu, kikin Señor Dios chay manuta pampachasqanrayku.

³Wak llaqtayoqmantaqa manusqaykichista pagachikapuwaqchismi, llaqta-masiykichismantan ichaqa ama pagachikunkichischu.

⁴Apu Señor Diosniykichismi hap'ikapunaykichispaq qonasuykichis suyupi saminchasunkichis. Qankunachus Señor Diosta kasunkichis kunan kamachisqay paypa tukuy kamachikuyninkunatapas hunt'ankichis chayqa, manan qankuna ukhupi wakchakuna kanqachu.

⁶Prometesqasuykichisman hinan Apu Señor Diosniykichisqa saminchasunkichis. Askha llaqtakunamantaq mañankichis, qankunataq ichaqa mana pimantapas mañakunkichischu. Askha suyukunatan kamachinkichis, qankunatataq ichaqa mana pipas kamachisunkichischu.

⁷Apu Señor Diosniykichis qosunkichis chay suyu llaqtakunapi mayqen llaqta-masiykichispas wakcha kaqtinqa, aman maqllakunkichischu, amataq: Manan yanapaymanchu, ninkichischu.

⁸Aswanpas yanapankichismi mañankichismi necesitasqantaqa.

⁹Paqtataq mana allinta yuyaykuwaqchis: Qanchiskaq wataqa qayllamushanñan, manu pampachana wata, nispaykichis. Hinaspataq llaqta-masiykichis wakchakunata millay ñawiykichiswan qhawariwaqchis, manataq imatapas qoykuwaqchischu. Chaymi qankuna contra Señor Diosman waqyakuqtin, huchachasqa kawaqchis.

¹⁰Imatapas qoykuspaykichisqa tukuy sonqon qonkichis, chay hinata ruwaqtiykichismi Apu Señor Diosniykichisqa tukuy ruwasqaykichiskunapipas saminchasunkichis.

¹¹Chay suyupiqa kashallanqapunin wakchakuna, chayrayku kamachiykichis llaqta-masiykichista, wakchakunata, mana imayoqkunatapas ama mich'akuspa yanapanaykichispaq.

¹²Hebreo wawqeykichistapas panaykichistapas kamachiykichispaq rantikunkichis chayqa, soqta watallatan servichikunkichis, qanchiskaq watapitaq kacharipunkichis.

¹³Kacharipuspaykichisqa aman hinallatachu kacharparinkichis,

¹⁴aswanpas sonqopas-sonqo qoykunkichis uywaykichismanta, hinallataq trigota, vinota ima, Apu Señor Diosniykichispa saminchasqasuykichisman hina qonkichis.

¹⁵Yuyariychis qankunapas Egipto suyupi kamachi kasqaykichista, chaymanta Apu Señor Diosniykichis horqomusqasuykichistawan. Chayraykun chay hinata kamachiykichis.

¹⁶Ichaqa qankunatapas wawaykichistapas munakuspa, qankunawanpas allillantaq kashaspa, kamachiykichis nisunkichis: Manan ripuymanchu, nispa chayqa,

¹⁷huk t'oqonata hap'ispa punkuman k'iraykuchispa ninri ura puntanta t'oqonkichis. Hinan chaymanta kamachillaykichispuni kapunqa. Hinallatataq warmi kamachiykichistapas ruwankichis.

¹⁸Ama sinchita sasachaychu kamachiyki kacharipuytaqa, payqa soqta watantinmi servirqasunkichis huk llank'apakuq runaq ganasqan chhikallamanta. Ahinapin Apu Señor Diosniykichisqa tukuy ruwasqaykichiskunapi saminchasunkichis.

¹⁹Apu Señor Diosniykichispaq t'aqankichis wakaykichismanta ovejaykichismanta llapan ñawpaq wachay orqo uñata. Wakaykichispa ñawpaq wachay orqo uñantapas aman llank'achinkichischu, ovejaykichispa ñawpaq wachay orqo uñantapas aman rutunkichischu.

²⁰Chaykunatataq sapa wata Apu Señor Diosniykichispa ñawpaqenpi tayta-mama wawakunantin mikhunkichis pay akllakunqa chay cheqaspi.

²¹Ichaqa ñawsapas wist'upas imallanpas mana allin kanman chayqa, aman Apu Señor Diosniykichisman haywankichischu.

²²Aswanpas wasiykichispin mikhunkichis, ch'uya kaqpas mana ch'uya kaqpas llapaykichis, imaynan tarukatapas luychutapas mikhunkichis hinata.

²³Yawarninta ichaqa ama mikhunkichischu, aswanpas pampamanmi hich'apunkichis.