Read Quechua Cuzco Bible 1988 DEUTERONOMIO 16 Bible Online

DEUTERONOMIO 16 - Quechua Cuzco Bible 1988 bible

DEUTERONOMIO 16

¹Abib killapi Señor Diosniykichispaq Alqaspa Pasarpariy Fiestata ruwankichis, chay killapin huk tuta Apu Señor Diosniykichisqa Egipto suyumanta horqomurqasunkichis.

²Apu Señor Diosniykichis sutinta yupaychanapaq akllakunqa chay cheqastan rinkichis, hinaspa wakatapas ovejatapas nak'aspa Alqaspa Pasarpariy sacrificiota Señor Diosman haywankichis.

³Chay haywasqa animaltaqa mana qonchuyoq t'antatawanmi mikhunkichis. Qanchis p'unchaymi mana qonchuyoq t'antata mikhunkichis. Chay t'antaqa Llakikuy T'antan sutin, chaytan mikhurqankichis Egipto suyumanta usqhaylla lloqsimushaspaykichis. Chay hinapin lloqsimusqaykichis p'unchayta yuyashallankichispuni.

⁴Chay qanchis p'unchay ukhupiqa aman llapa suyuykichispi qonchu kanqachu. Fiesta Qallariy p'unchay tardepi haywasqaykichis animal aychatataq ama qhepantin p'unchaypaq puchuchinkichischu.

⁵Alqaspa Pasarpariy sacrificiotaqa aman Apu Señor Diosniykichispa qonasuykichis suyupi mayqen llaqtapipas haywankichischu,

⁶aswanpas sutinta yupaychanapaq Señor Dios akllakunqa chay cheqasllapin chaytaqa haywankichis inti chinkaykuy horasta, chay horastan Egiptomanta lloqsimpurqankichis.

⁷Señor Dios akllakunqa chay cheqaspin haywasqa aychata kankaspa mikhunkichis. Qhepantin paqartataq wasiykichisman kutipunkichis.

⁸Soqta p'unchaymi mana qonchuyoq t'antata mikhunkichis, qanchiskaq p'unchaytaqmi Apu Señor Diosniykichispaq hatun p'unchay kanqa. Chay p'unchaypiqa manan imatapas llank'ankichischu.

⁹Trigo ichhuy qallariy p'unchaymantapacha qanchis semana tukuyta,

¹⁰Apu Señor Diosniykichispa sutinpi Semanakuna nisqa Fiestata ruwankichis, Apu Señor Diosniykichispa saminchasqasuykichisman hinataq tukuy sonqo ofrendaykichiskunata payman haywankichis.

¹¹Hinallataq Apu Señor Diosniykichis payta yupaychanapaq akllakunqa chay cheqaspi paypa ñawpaqenpi q'ochukunkichis wawaykichiskunapiwan, kamachiykichiskunapiwan, llaqtaykichispi tiyaq Leví runakunapiwan, wak llaqtayoqkunapiwan, mana tayta-mamayoqkunapiwan, viudakunapiwan.

¹²Yuyarinkichistaq Egipto suyupi kamachi kasqaykichista, chayrayku tukuy kay kamachikuyta mana qonqaspa hunt'ankichis.

¹³Trigo cosechayta lliwta tukuspa uvasniykichistapas ch'irwayta tukuspa, qanchis p'unchayta Ch'uklla Ruway Fiestata ruwankichis.

¹⁴Chay fiestapin q'ochukunkichis wawaykichiskunapiwan, kamachiykichiskunapiwan, llaqtaykichispi tiyaq Leví runakunapiwan, wak llaqtayoqkunapiwan, mana tayta-mamayoqkunapiwan, viudakunapiwan.

¹⁵Señor Diosniykichis akllakunqa chay cheqaspi paypa sutinpi qanchis p'unchayta fiestata ruwankichis, tukuy cosechaykichiskunapipas llank'asqaykichiskunapipas Apu Señor Diosniykichis saminchasunkichis chay hawa. Ahinapin qankuna ancha kusisqa kankichis.

¹⁶Señor Dios akllakunqa chay cheqastan sapa wata llapa qharikuna kinsa kutita Señor Diospa ñawpaqenman rinqa Mana Qonchuyoq T'anta Fiestapi, Semanakuna nisqa Fiestapi, Ch'uklla Ruway Fiestapi ima. Chay fiestakunapiqa aman pipas hinalla Señor Diosman rinqachu,

¹⁷aswanpas sapankan ofrendakunata apanqa, Apu Señor Diosniykichispa saminchasqanman hina.

¹⁸Apu Señor Diosniykichis qosunkichis chay suyu llaqtakunapin aylluykichisman hina juezkunata oficialkunata churankichis, runakunata chanin-kayman hina t'aqtanankupaq.

¹⁹Ama chaninchayta waqllichiychischu, aman mayqen runamanpas sayakunkichischu, amataq lluk'iykusqatapas chaskikunkichischu, lluk'iykuyqa manan reparachinchu yachayniyoqkunata, chaninkunaq rimasqantapas waqllichinmi.

²⁰Chanin-kaytaqa ruwashallankichispunin, chay hinapin Apu Señor Diosniykichispa qonasuykichis suyuta hap'ikapunkichis hinaspa kawsankichis.

²¹Apu Señor Diosniykichispa altarnin qayllapiqa aman ima sach'atapas mallkinkichischu Asera nisqa diosa hina yupaychasqa kananpaq.

²²Aman yupaychana saywa rumita sayarichinkichischu. Tukuy chaykunataqa cheqnikunmi Apu Señor Diosniykichisqa.