Read Quechua Cuzco Bible 1988 DEUTERONOMIO 17 Bible Online

DEUTERONOMIO 17 - Quechua Cuzco Bible 1988 bible

DEUTERONOMIO 17

¹Wakatapas ovejatapas mana allintaqa aman Apu Señor Diosniykichisman sacrificiopi haywankichischu, payqa chay hina haywasqataqa cheqnikunmi.

²Apu Señor Diosniykichispa qonasuykichis suyu mayqen llaqtapipas warmipas qharipas Señor Diospa rimanakuyninta p'akispa mana munasqanta ruwashan nisqata uyariwaqchis chayqa,

³chay runataq Señor Diospa hark'asqanta ruwaspa, wak dioskunatapas, intitapas, killatapas, qoyllurtapas, ch'askatapas yupaychanqa chayqa,

⁴allintapunin tapupakunkichis. Cheqaqtapunitaq Israel suyupi chay mana chanin ruwasqata tarinkichis chayqa,

⁵chay ruwaqta warmiña qhariña kaqtinpas llaqta punku qhepaman horqospaykichis ch'aqespa wañuchinkichis.

⁶Chaywanpas chay runataqa wañuchinkichis iskaypas askhapas ch'ataqnin kaqtillanpuni, huk runaq ch'atasqallanwanqa aman wañuchinkichischu.

⁷Chay huchachasqa runataqa ch'ataqninkunan ñawpaqta ch'aqenqa, chaymantaña llaqta runakunaqa ch'aqellanqataq. Chay hinapin chay mana allinta qankuna ukhumanta ch'usaqyachinkichis.

⁸Llaqtaykichiskunapi wañuchiymantapas, hallp'a qechunakuymantapas, k'irinakuymantapas, hukkunamantapas sinchi sasa t'aqtanaykichispaq kaqtinqa, Apu Señor Diosniykichis akllakunqa chay cheqasta rinkichis.

⁹Chayaspaykichistaq Leví runa sacerdotekunata tupaqninpi llank'ashaq jueztawan tapunkichis. Paykunataq chayta chaninchanqaku.

¹⁰Qankunataq chayta ruwankichis nisqasuykichista mana p'akispa.

¹¹Chay hinaqa, nisqasuykichisman hinan ruwankichis, chay kikin chaninchasqantan hunt'ankichis.

¹²Señor Diospa ñawpaqenpi chaninchaq sacerdotetapas jueztapas mana kasuspa anchaykachaq runata ichaqa wañuchinkichis, chay hinapin Israel runakuna ukhumanta chay mana allinta ch'usaqyachinkichis.

¹³Chaymi runakunaqa chayta uyarispanku manchakunqaku, manataq anchaykachaspa ruwanqakuñachu.

¹⁴Apu Señor Diosniykichis qosunkichis suyuta chayta hap'ikapuspa tiyaspañataq niwaqchis: Reyta churakusun kamachiwananchispaq, imaynan qorpanchis suyukunaqpas reynin kan hinata, nispa chayqa,

¹⁵Apu Señor Diosniykichis akllakunqa chay runata reyniykichispaq churankichis. Wak llaqtayoqtapas mana llaqta-masiykichistapas aman reyta churankichischu, aswanpas llaqta-masillaykichistapunin reytaqa churankichis.

¹⁶Chay churasqaykichis reyqa aman askha caballokunata huñunqachu, amataq Egiptomanpas runakunata kachanqachu caballokunata askhayachiyta munaspa. Señor Diosqa nirqasunkichismi: Aman hayk'aqpas Egiptoman riq ñanta kutinkichischu, nispa.

¹⁷Amataq askha warmiyoqpaschu kanqa, mana chayqa sonqontan waqllichinman. Amallataq qoritapas qolqetapas sinchi askhataqa huñukunqachu.

¹⁸Hinallataq chay reyqa kamachikuyta qallarishaspa, Leví runa sacerdotekunaq waqaychasqan kashaq kamachikuy simi mama qelqamanta pay qelqachikunqa, chay simikunata kikin rey leekunanpaq.

¹⁹Chay qelqachikusqan qelqataqa manan saqenqachu, aswanpas tukuy kawsasqan p'unchaymi leekunqa, chaymi Apu Señor Diosniykichista manchakuyta yachanqa, tukuy kamachikusqan simikunatapas makillataq kasunqa.

²⁰Manataq llaqta-masinkuna ukhupipas anchaykachanqachu, manallataq kay kamachikuy simikunata chhikantapas p'akinqachu. Chaymi Israel suyupi paypas mirayninkunapas unayta kamachinqaku.