Read Quechua Cuzco Bible 1988 DEUTERONOMIO 19 Bible Online

DEUTERONOMIO 19 - Quechua Cuzco Bible 1988 bible

DEUTERONOMIO 19

¹Apu Señor Diosniykichis qonasuykichis suyupi tiyaq runakunata wañuchiqtinmi, qankuna llaqtankuta hap'ikapuspa wasinkupi tiyankichis.

²Chaymantataq chay suyuta kinsaman t'aqankichis, chay t'aqasqaykichis hap'iykunapitaq sapankapi huk llaqtata t'aqankichis. Chay llaqtakunaman riq ñankunatataq allichankichis, runa wañuchiq chay llaqtakunaman ayqespa pakakunanpaq.

⁴Pi runapas runamasinta wañuchinman mana yuyaypichu manataq awqantin kaspapaschu chayqa, pakakuna llaqtamanmi ayqekunqa mana wañuchisqa kananpaq.

⁵Kay hina kaqtin: Mayqenpas huk runamasinpiwan sach'a-sach'ata llant'a ch'eqtaq rinkuman, hinataq sach'ata wit'ushaqtin k'aspinmanta hacha qonqay phawarqospa llank'aqmasinta sinchita k'irirqospa wañurqochinman chayqa, chay runan huknin pakakuna llaqtaman ayqeyta atin qespikunanpaq.

⁶Mana chayqa, wañuqpa vengakuq ayllunmi sinchi phiñasqa qatipaspa tariparqonman, ñan karu kasqanrayku, hinaspa wañurqochinman mana wañuypaq huchachasqa kashaqtin, chay runaqa manan awqantin kaspachu wañuchisqa.

⁷Chayrayku kamachiykichis kinsa llaqtakunata t'aqanaykichispaq.

⁸Apu Señor Diosniykichispa kamachikusqan simikunata mana qonqaspa kasunkichis, payta munakunkichis, munaynintapas ruwankichis chayqa, machulaykichisman qonanpaq prometesqan suyutan qosunkichis. Pay chay suyuta hatunyachiqtinmi, qankunaqa pakakuna kinsa llaqtata yapankichis.

¹⁰Ahinapi Apu Señor Diosniykichis qosunkichis chay suyupiqa mana huchayoq runata mana wañuchinkichischu, manataq qankunaqa wañuchisqamanta huchachasqapaschu kankichis.

¹¹Pipas runamasinta cheqnikuspa qhamiyanman, hinaspataq hap'ispa payta wañurqochinman, chaymantataq hukkaqnin pakakuna llaqtaman ayqenman chayqa,

¹²llaqtanpi kurak runakuna kachanqa pakakusqanmanta aysachimunanpaq. Hinaspan kurak runakunaqa wañuqpa vengakuq ayllunman runa wañuchiqta hap'ichinqaku wañuchinanpaq.

¹³Aman chay runataqa khuyapayankichischu, chay hinapin Israelpi mana huchayoq runa wañuchiqta ch'usaqyachinkichis. Hinan allillan kankichis.

¹⁴Apu Señor Diosniykichis qosunkichis chay suyupi hallp'aykichis qorpataqa aman llaqta-masiykichispa hallp'anman ithiykuchinkichischu, chay qorpataqa machulaykichismi churarqan.

¹⁵Ima huchaña kaqtinpas, ch'ulla testigo rimariqtinqa manan pitapas huchachayta atiwaqchischu, aswanpas iskaypas askhapas testigokuna rimarillaqtinmi huchachayta atiwaqchis.

¹⁶Huk millay testigo piqpa contranpipas sayarispa ima huchamantapas ch'atanman chayqa,

¹⁷iskaynin churanakuqkunan Señor Diosman qayllaykunqaku, hinallataq tupaqninman hina chay kuti llank'ashaq sacerdotekunamanpas juezkunamanpas qayllaykunqaku,

¹⁸juezkunataq allinta tapupakunqaku. Testigoq llaqtamasin contra ch'atasqan llulla kaqtintaq,

¹⁹payta huchachankichis imaynatachus llaqtamasinta ruwayta munarqan chay hinata, chay hinapin qankuna ukhumanta chay mana allinta ch'usaqyachinkichis.

²⁰Chayta uyarispataq llapa runakuna manchakunqaku, manañataq chay millay mana chaninta ruwanqakuñachu.

²¹Aman chay hina ruwaqta khuyapayankichischu, aswanpas imaynatachus ruwanqa chay hinallatataqmi muchuchinkichis, kawsaymanta kawsayta, ñawimanta ñawita, kirumanta kiruta, makimanta makita, chakimantapas chakita.