Read Quechua Cuzco Bible 1988 DEUTERONOMIO 20 Bible Online

DEUTERONOMIO 20 - Quechua Cuzco Bible 1988 bible

DEUTERONOMIO 20

¹Awqaykichiswan maqanakuq lloqsishaspa rikunkichis awqaykichispa caballonkunata carretankunata soldadonkunatapas qankunamanta aswan askhata chayqa, aman mancharikunkichischu, Egiptomanta horqomuq Apu Señor Diosniykichismi qankunawan kashanqa.

²Awqa-tinkuyta qallarinaykichispaqtaq soldadokunata sacerdote ninqa: Uyariychis, Israel runakuna, kunanmi awqaykichiswan maqanakuq rinkichis, ama pisi kallpayaychischu, ama manchakuychischu, ama khatatataychischu, amataq paykunata manchapakuychispaschu.

⁴Apu Señor Diosniykichismi qankunawan kashan, paymi qankunamanta sayarikunqa hinaspa awqaykichista atipachisunkichis, nispa.

⁵Oficialkunapas rimaykullanqataqmi: ¿Pitaq qankuna ukhupi kashan mosoq wasita chayllaraq tukuspa manaraq chaypi tiyaq? Ripuchun, wasinta kutipuchun. Paqtan awqa-tinkuypi wañunman, hinataq wasinpi wak runa tiyanman.

⁶¿Pitaq qankuna ukhupi kashan uvas chakrata tarpuspa manaraq chay chakra ruruta mikhuq? Ripuchun, wasinta kutipuchun, paqtan awqa-tinkuypi wañunman, hinataq chakran ruruta wak runa mikhunman.

⁷¿Pitaq qankuna ukhupi kashan casarakunanpaq rimanasqa? Ripuchun, wasinta kutipuchun, paqtan awqa-tinkuypi wañunman, hinataq munakusqanwan wak runa casarakunman, nispa.

⁸Chaymantapas tapuykullanqakutaq: ¿Pitaq qankunamanta pisi kallpayaspa manchakushan? Ripuchun, wasinta kutipuchun, paqtan manchakuspa wawqenkunaq sonqonta iskayrayachinman, nispa.

⁹Oficialkuna rimayta tukuspataq, kamachiqkunata churanqaku t'aqa-t'aqa soldadokunata umallinanpaq.

¹⁰Mayqen llaqtamanpas phawaykunaykichispaq qayllaykuspaqa, manaraq maqanakushaspan chaypi tiyaq runakunata: Sumaqpi rimanakusun, ninkichis.

¹¹Allinmi, rimanakusun, nispataq llaqta punkuta kicharisunkichis chayqa, llapan chaypi kaqkunan kamachiykichis kanqa, mit'anipitaq llank'anqaku.

¹²Maqanakuyta munaspa qankunawan mana rimanakuyta munaqtinkun ichaqa, llaqtata muyuykunkichis phawaykunaykichispaq.

¹³Apu Señor Diosniykichis paykunata hap'ichisuqtiykichistaq, llapa chaypi tiyaq qharikunata wañuchinkichis,

¹⁴ichaqa warmikuna, wawakuna, uywakuna, chay llaqtapi tukuy imaymana kaqkunapiwantaq qankunapaq kanqa. Ahinapi Apu Señor Diosniykichispa qosqan chay runakunaq kaqninkunawan kusikunkichis.

¹⁵Chaytaqa ruwankichis hap'ikapunkichis chay suyumanta aswan karupi kaq tukuy llaqtakunata.

¹⁶Apu Señor Diosniykichis hap'ikapunaykichispaq qosunkichis chay suyu llaqtakunapi runakunataqa aman ch'ullallatapas kawsachinkichischu.

¹⁷Aswanpas Apu Señor Diosniykichispaq sacrificiota hina llapanta wañuchinkichis Het runakunata, Amor runakunata, Canaán runakunata, Fares runakunata, Hiv runakunata, Jebus runakunatawan, Señor Diospa kamachisqanman hina.

¹⁸Chay hinapin mana qankunata yachachisunkichischu diosninkuq sutinpi chay millay mana chanin ruwasqankuta, manataq Apu Señor Diosniykichis contrapas huchallichisunkichischu.

¹⁹Mayqen llaqtatapas awqa-tinkuypi askha p'unchayña hap'ikapunaykichispaq muyuykunkichis chayqa, aman sach'ankunata kumpankichischu, chaykunaq rurunta mikhunaykichisrayku. Chay sach'akunaqa manan runachu, qankunawan maqanakunanpaq.

²⁰Mana ruruq sach'akunata ichaqa kumpawaqchis, muyuykuspaykichis llaqta perqaman seqanata ruwanaykichispaq, chay hinapin atipankichis.