Read Quechua Cuzco Bible 1988 DEUTERONOMIO 22 Bible Online

DEUTERONOMIO 22 - Quechua Cuzco Bible 1988 bible

DEUTERONOMIO 22

¹Llaqta-masiykiq wakantapas ovejantapas chinkasqata tarispaykiqa, aman hinallata qhawankichu, aswanpas waqaychaspan llaqta-masiykiman kutichipunki.

²Chay chinkachikuq llaqta-masiykita mana reqsinkichu manataq qorpaykipaschu chayqa, chinkasqa uywanta wasiykipi waqaychanki pay maskhamunankama, tarimuqtintaq qopunki.

³Ahinallatataq asnonwanpas, p'achanwanpas, tukuy iman chinkaqwanpas ruwanki, amataq hinallata qhawankichu.

⁴Llaqta-masiykiq asnontapas wakantapas ñanpi urmasqata rikunki chayqa, aman hinallata qhawankichu, aswanpas sayarinanpaq yanapaykunki.

⁵Warmiqa aman qhari p'achawan churakunqachu, amallataq qharipas warmi p'achawan churakunqachu, Señor Diosqa cheqnikunmi chay hina ruwaqta.

⁶Purishaspayki sach'api otaq pampapi huk phalaq animalta q'esanpi tarinki chiwchiyoqtapas runtuyoqtapas chayqa, aman mamanta chiwchintawan apankichu.

⁷Aswanqa mamanta kacharipunki chiwchillanta apakunki, chaymi allillan kakunki, unaytataq kawsankipas.

⁸Mosoq wasita ruwakuspaykiqa wasi patata muyuriqta kanchachanki, ama pipas urmaykuspa wañunanpaq, runa wañusqamanta mana huchachasqa kanaykipaq.

⁹Uvas chakraykipiqa aman iskay t'aqa muhuta tarpunkichu, mana chayqa chay chakrayki llapan rurutan Diospaq t'aqanki.

¹⁰Aman torota asnotawan masachankichu yapunaykipaq.

¹¹Kuskan millma kuskan lino awasqa p'achataqa aman churakunkichu.

¹²P'istukunayki ponchoq tawantin ch'ullpanpi chhaqchata ruwakunki.

¹³Qharichus warmiwan casarakunman, hinaspataq paywan puñusqan qhepata cheqnikapunman,

¹⁴llullakuspataq ch'atanmanpas, mana chanin warmimanta hukkunaman reqsichispa, ninmantaq: Ñoqan kay warmiwan casarakurqani, hinan paywan puñuspay mana doncellatachu tarini, nispa, chayqa,

¹⁵sipaspa tayta-maman casarakusqanku tuta puñusqanku llamp'unata yawarkamata apanqa llaqta haykunapi t'aqtaq kurak runakunaman, ususin doncellapuni kasqan señalta qhawanankupaq.

¹⁶Chaymi sipaspa taytanqa kurak runakunata ninqa: Ñoqan kay qhariman ususiyta warminpaq qorqani, kunantaq ichaqa cheqnikapun.

¹⁷Llullakuspataq ch'atan, niwantaq: Manan doncellachu ususiykiqa kasqa, nispa. Qhawariychis, kaymi kashan ususiypa doncella kasqan señal, nispa. Chay llamp'unatataq kurak runakunaq ñawpaqenpi mast'arinqa.

¹⁸Hinan kurak runakuna chay qharita hap'ispa hasut'inqaku,

¹⁹pachak qolqetataq pagachinqaku, hinan chay qolqeta sipaspa taytanman qonqaku, Israelpi doncella sipasta mana chanin warmita hina hukkunaman reqsichisqanmanta. Chaymi chay qhariqa sipasta warminpaq chaskikapunqa wañunankama, manañataq wikch'uyta atinqachu.

²⁰Cheqaqtapunitaq chay sipas mana doncella kaqtinqa,

²¹taytanpa wasin punkuman sipasta horqomunqaku, hinaspa llaqta runakuna rumiwan ch'aqenqaku wañunankama, Israelpi chay mana chaninta ruwasqanmanta, taytanpa wasinpi qhellipi purisqanmantawan. Chay hinapin chay huchata qankuna ukhumanta ch'usaqyachinkichis.

²²Huk qharichus qosayoq warmiwan puñushaq hap'isqa kanqa chayqa, iskayninkun warmipas qharipas wañuchisqa kanqaku. Chay hinapin chay huchata qankuna ukhumanta ch'usaqyachinkichis.

²³Huk doncella sipas huk qhariwan casarakunanpaq rimaykusqa kashaqtin, llaqtapi wak qhari paywan tupaspa puñunman chayqa,

²⁴iskayninta llaqta haykunaman horqospa chaypi ch'aqespa wañuchinkichis. Sipasqa wañunqa llaqta runakunata hark'akunanpaq mana waqyakusqanmanta, qharitaq wañunqa runamasinpa warminta violasqanmanta. Chay hinapin chay huchata qankuna ukhumanta ch'usaqyachinkichis.

²⁵Ichaqa casarakunanpaq rimaykusqa sipasta huk qhari campopi tarinman, hinaspa payta violanman chayqa, qharillata wañuchinkichis.

²⁶Sipastaqa ama wañuchinkichischu, payqa manan wañuchinapaq hina huchayoqchu, chay violayqa campopi huk runa runamasinta phawaykuspa wañuchin chaymanmi rikch'akun.

²⁷Chay qhariqa sipasta campopi hap'ispa violarqan, qapariqtinpas manataq pipas hark'aykuqnin kanmanchu karqan.

²⁸Manaraq casarakunanpaq rimaykusqa huk doncella sipasta huk qhari hap'ispan violanman hinataq paykunata hap'inkichis chayqa,

²⁹chay violaq qharin sipaspa taytanman phisqa chunka qolqeta qonqa. Sipastaq paypa warmin wañunankama kapunqa violasqanmanta, manañataq wikch'uyta atinqachu.

³⁰Manan pipas taytanpa warminwanqa puñukunqachu, mana chayqa taytantan pisichanqa.