Read Quechua Cuzco Bible 1988 DEUTERONOMIO 23 Bible Online

DEUTERONOMIO 23 - Quechua Cuzco Bible 1988 bible

DEUTERONOMIO 23

¹Kapasqapas qhari-kaynin wit'usqapas kaq qhariqa manan Señor Diospa llaqtanman yupasqachu kanqa.

²Q'aqa churiqa manan Señor Diospa llaqtanman yupasqachu kanqa, manapunin chunka miraykamapas.

³Amón runakunapas Moab runakunapas manapunin hayk'aqpas Señor Diospa llaqtanman yupasqachu kanqa, manapunin chunka miraykamapas.

⁴Paykunaqa manan unutapas mikhunatapas qorqasunkichischu Egipto suyumanta lloqsimushaspa hallp'ankuta purishaqtiykichis, aswanmi Mesopotamiapi Petormanta Beorpa churin Balaamta contraykichispi mink'akuspa pusamurqanku ñakachinasuykichispaq.

⁵Apu Señor Diosniykichismi ichaqa Balaamta mana uyarirqanchu, aswanmi ñakasqasuykichista saminchaman tukuchirqan, pay munakusqasuykichisrayku.

⁶Aman hayk'aqpas paykunata yanapankichischu, amapuni hayk'aqpas allin kanankutapas munankichischu.

⁷Edom runakunataqa aman cheqnikunkichischu, paykunaqa aylluykichismi, amallataq Egipto runakunatatapas cheqnikunkichischu, paykunaq suyunpi wak llaqtayoq hina tiyamusqaykichisrayku.

⁸Paykunaq nietonpa wawanqa Señor Diospa llaqtanman yupasqañan kanqa.

⁹Awqaykichis contra maqanakuq lloqsispaqa, karpa-karpapi tiyaspaykichismi tukuy qhelli kaqmanta t'aqakunkichis.

¹⁰Mayqenniykichispas qankunamanta muhun tuta phawasqan hawa mana limpiochu kanman chayqa, karpa-karpamanta lloqsispa hawapi qhepakunqa.

¹¹Inti orqo patatataq mayllikunqa, hinaspa inti chinkaykuyta karpa-karpaman kutispa haykupunqa.

¹²Karpa-karpamanta sapaqpin huk cheqas hisp'anaykichispaq kanqa.

¹³Armaykichiskunawan kuskatan apakunkichis huk t'oqona k'aspita, chaymi hisp'akuq lloqsispaykichis chaywan pampata t'oqonkichis, hinaspataq hatun hisp'ayniykichista chayman p'ampankichis.

¹⁴Apu Señor Diosniykichismi karpa-karpapi qankuna ukhupi purishan waqaychanasuykichispaq awqaykichiskunatapas atipachinasuykichispaq, chaymi karpa-karpaykichisqa limpio kanqa, chaypi qhellikaqkunata Señor Diospa mana rikunanpaq, mana chayqa qankunamantan t'aqarikapunqa.

¹⁵Huk kamachi uywaqenmanta ayqespa qankunaman hamusunkichis chayqa, aman uywaqenman kutichinkichischu,

¹⁶aswanpas qankunawanmi qhepanqa, mayqen llaqtaykichistachus tiyananpaq akllakunqa chaypi tiyanqa, amataq payta muchuchinkichischu.

¹⁷Israel llaqtayoq warmikunamantaqa aman pipas rabona kanqachu wak'a dios yupaychana wasipi, amallataq qharikunamantapas wak'a dios yupaychana wasipi qhari pura t'inkikuqkunapas kanqachu.

¹⁸Apu Señor Diosniykichis yupaychana wasimanqa aman rabonaq ganasqan qolqetapas qhari pura t'inkikuqpa ganasqan qolqetapas apankichischu, huk prometekusqaykichista hunt'aspa paganaykichispaqqa. Chay iskaynin ruwaykunataqa Señor Diosniykichismi sinchitapuni cheqnikun.

¹⁹Llaqta-masiykichisman qolqetaña mikhunataña imataña mañaspaykichispas, aman uñanta cobrankichischu.

²⁰Wak llaqtayoqmanta ichaqa uñanta cobrawaqchis, llaqta-masiykichismantaqa aman cobrankichischu, chay hinapin Apu Señor Diosniykichisqa hap'ikapunaykichis suyuman haykuqtiykichis tukuy llank'asqaykichista saminchanqa.

²¹Apu Señor Diosniykichisman prometekuspaykichisqa usqhayllan hunt'ankichis, mana chayqa Señor Diosmi watusunkichis, huchachasqataq rikukunkichis.

²²Mana prometekuspaykichisqa, manan huchachakunkichischu.

²³Makilla hunt'aychis rimasqaykichista, Apu Señor Diosniykichisman prometekusqaykichisqa huk sumaq sonqo ofrenda hinan.

²⁴Runa-masiykichispa uvas chakranman haykuspaykichisqa, mikhuwaqchismi saksanaykichiskama, ichaqa aman imapipas apankichischu.

²⁵Runa-masiykichispa trigo chakranman haykuspaykichisqa, k'aptawaqchismi trigo umata, ichhunawan ichaqa ama ichhunkichischu.