Read Quechua Cuzco Bible 1988 DEUTERONOMIO 24 Bible Online

DEUTERONOMIO 24 - Quechua Cuzco Bible 1988 bible

DEUTERONOMIO 24

¹Mayqen qharipas huk warmiwan casarakuspaña, chay warmiq mana allin ruwayninta yachaspa mana munapunmanchu chayqa, t'aqanakuy qelqata qelqaspa payman qonqa, hinaspan wasinmanta kachapunqa.

²Chay wikch'usqa warmitaq huk qhariwan casarakapunman,

³chay qosanpas manallataq munaspan t'aqanakuy qelqata payman qollanmantaq, hinaspataq wasinmanta kachapunman, otaq wañupunmanpas chay qhepakaq qosan chayqa,

⁴manan casarakuyta atinmanchu ñawpaqkaq qosanqa, chay warmi qhelliña kasqanrayku, Señor Diospas chay hina ruwaytaqa cheqnikunmi. Apu Señor Diosniykichis hap'ikapunaykichispaq qosunkichis chay suyutaqa aman qhellichankichischu.

⁵Pipas chayllaraq casarakuqqa manan awqa-tinkuyman rinqachu, manataq ima ruwanatapas ayllunpi chaskinqachu, aswanpas wasinpin huk wata libre kanqa, warmintin kusisqa tiyanankupaq.

⁶Aman piqpa tunawantapas marannintapas prendata apankichischu, kawsananpaq mikhunatapas qechuwaqchis hinachá kanman.

⁷Mayqen runapas huk Israel llaqtamasinta suwakunman kamachinpaqpas vendenanpaqpas, hinaspa hap'ichikunman chayqa, chay runa suwataqa wañuchinkichismi. Chay hinapin chay huchata qankuna ukhumanta ch'usaqyachinkichis.

⁸Aycha qarapi millay onqoy rikhuriqtinqa, allintapunin Leví ayllu sacerdotekuna yachachisunkichis, chaytataq hunt'ankichis. Qankunaqa lliwtan ruwankichis Leví ayllu sacerdotekunaman yachachisqayman hina.

⁹Yuyariychis Apu Diosniykichispa Egipto suyumanta lloqsimushaqtiykichis Mariata ruwasqanta.

¹⁰Runa-masiykichisman imatapas manuspaykichisqa, aman wasinta haykunkichischu prendata apanaykichispaq,

¹¹aswanpas hawallapi suyankichis manukuq runa prendata horqomuspa qonasuykichiskama.

¹²Chay runa wakcha kaqtinqa, aman chay prendata tutantin hap'ikunkichischu,

¹³aswanpas inti chinkaykuyta prenda qosqasuykichis ponchonta kutichipunkichis, chaywan p'istukuspa puñunanpaq, chaymi chay wakcha runaqa saminchasunkichis. Chay hinapin Apu Señor Diosniykichis chaninpaq qhawarisunkichis.

¹⁴Aman llank'apakuq wakcha runata yanqalla llank'achikunkichischu, llaqta-masiykichistapas llaqtaykichispi tiyaq wak llaqtayoqtapas.

¹⁵Sapa p'unchaymi llank'asqanmanta pagapunkichis manaraq inti chinkaykushaqtin, payqa necesitanmi chay qolqeta, wakcha kasqanrayku. Mana pagapuqtiykichisqa contraykichispin Señor Diosmanta mañakunqa, hinan qankuna huchachasqa kankichis.

¹⁶Manan taytaqa churinpa huchanmanta wañuchisqa kanmanchu, manallataqmi churipas taytanpa huchanmanta wañuchisqa kanmanchu, aswanpas kikin huchallikuqmi wañunqa.

¹⁷Aman chaninchayta waqllichinkichischu wak llaqtayoqkunapaqpas, mana tayta-mamayoqkunapaqpas, amallataq viudaq p'achantapas prendata apankichischu.

¹⁸Yuyariychis Egipto suyupi kamachi kasqaykichista, Apu Señor Diosniykichispa chaymanta horqomusqasuykichistapas, chayraykun kamachiykichis chay hinata ruwanaykichispaq.

¹⁹Chakraykichispi trigota ichhushaspa huk marq'ay trigota qonqaspaykichisqa, amañan hoqariq kutinkichischu, chaytaqa saqenkichis mana tayta-mamayoqkunapaq viudakunapaq llaqtaykichispi tiyaq wak llaqtayoqkunapaqwan, ahinapin tukuy llank'asqaykichispi Apu Señor Diosniykichis saminchasunkichis.

²⁰Olivos chakraykichis ruruta pallashaspaqa, aman k'allmankunamanta q'alatachu pallarqonkichis, puchuq ruruqa hinallan qhepanqa wak llaqtayoqkunapaq, mana tayta-mamayoqkunapaq, viudakunapaqwan.

²¹Chakraykichismanta uvasta pallashaspaqa, aman qhellankichischu, puchuqqa hinalla qhepanqa wak llaqtayoqkunapaq, mana tayta-mamayoqkunapaq, viudakunapaqwan.

²²Yuyariychis Egipto suyupi kamachi kasqaykichista, chayraykun kamachiykichis chayta ruwanaykichispaq.