Read Quechua Cuzco Bible 1988 DEUTERONOMIO 25 Bible Online

DEUTERONOMIO 25 - Quechua Cuzco Bible 1988 bible

DEUTERONOMIO 25

¹Iskay runakuna pleitopi kanman chayqa, juezkunaman rispa uyarichikunqaku, hinan juezkuna chaninchaspanku mana huchayoqta mana huchachanqakuchu, huchayoq kaqtataq huchachanqaku.

²Hinataq chay huchayoq runa soq'anapaq hina kanqa chayqa, juezmi kamachinqa pampaman thallananpaq, hinaspan rikushasqan hayk'a kutitachus huchanmanta chaskinan chayman hina soq'achinqa.

³Chay runataqa tawa chunka kutikamallan soq'ankichis, paqtan llaqta-masiykichis sinchita soq'aqtiykichis ñawpaqeykichispi k'umuykachisqa kapunman.

⁴Aman era saruq torotaqa senq'apankichischu.

⁵Iskay wawqentin kuska tiyankuman, hinataq hukkaq wawqen mana churiyoq kashaspa wañukapunman chayqa, wañuqpa viudanqa manan wak ayllu qhariwan casarakunqachu, aswanpas cuñadonmi payta chaskispa casarakunqa.

⁶Phiwi churinta cuñadonpaq wachakuspaqa, wañuq qosanpa sutinwanmi sutichanqa, chaymi chay wañuqpa sutinqa mana Israelpi chinkanqachu.

⁷Cuñadon mana paywan casarakuyta munaqtinqa, kurak runakunaman llaqta haykunata rispa viudaqa ninqa: Manan cuñadoy ñoqawan casarakuyta munanchu, manan Israel llaqtapi wawqenpa sutin sutiyoq miray kananta munanchu, nispa.

⁸Hinan chay llaqta kurak runakuna chay runata waqyachinqaku tapuykunankupaq, paytaq kaqllatapuni ninqa: Manan casarakuymanchu, nispa chayqa,

⁹viudan payman qayllaykunqa kurak runakunaq qayllanpi, hinaspan cuñadonpa usut'anta ch'utispa uyanpi thoqaykunqa, ninqataq: Chay hinatan ruwana wawqenpa sutin sutiyoq miray kananta mana munaq runataqa, nispa.

¹⁰Chaymi Israelpi chay ayllu Q'ala Chaki Ayllu nisqa kapunqa.

¹¹Iskay runa maqanakushaqtin, hukkaqpa warmin qosanta atipananmanta amachakuq qayllaykuspan, maqanakuq-masin runata qhari-kayninmanta makinwan hap'inman chayqa,

¹²ama khuyapayaspan warmiq makinta wit'unkichis.

¹³Aman rantinaykichispaq suwana pesata apankichischu, vendenaykichispaqpas q'otuna pesata apankichischu.

¹⁴Amallataq wasiykichispi rantinaykichispaq suwana tupunatapas churakunkichischu, vendenaykichispaqpas q'otuna tupunata churakunkichischu.

¹⁵Pesanaykichispas tupunaykichispas chanintaq hunt'asqataqmi kanqa, Apu Señor Diosniykichis qosunkichis chay suyupi unayta kawsanaykichispaq.

¹⁶Apu Señor Diosniykichisqa chay hina ruwaqtapas mana chanin ruwaqtapas cheqnikunmi.

¹⁷Yuyariychis Egiptomanta lloqsimushaspa purimushaqtiykichis Amalek runakunaq ruwasqasuykichista.

¹⁸Paykunaqa Diostapas mana manchakuspan ñanpi contraykichis sayarispa, qhepa puntapi kaq pisi kallpa llaqta-masiykichiskunaman phawaykurqan, qankuna sayk'usqa peqtusqa kashaqtiykichis.

¹⁹Chayraykun Apu Señor Diosniykichis llapan awqaykichiskunamanta qespichispa, hap'ikapunaykichis suyuta qosuqtiykichis, llapan Amalek runakunata mana ch'ullayoqta wañuchinkichis, manaña pipas paykunata yuyarinanpaq. ¡Aman chay ruwayta qonqankichischu!