Read Quechua Cuzco Bible 1988 DEUTERONOMIO 26 Bible Online

DEUTERONOMIO 26 - Quechua Cuzco Bible 1988 bible

DEUTERONOMIO 26

¹Apu Señor Diosniykichis qosunkichis chay suyuman haykuspaykichis, hap'ikapuspa tiyaspaykichisqa,

²cosechaykichismanta sapanka t'aqamanta ñawpaqkaq ruruta huk canastaman churaspa apankichis Apu Señor Diosniykichis payta yupaychanapaq akllakunqa chay cheqasman.

³Hinan tupaqninpi llank'ashaq sacerdoteman qayllaykuspa ninkichis: Kunanmi Apu Señor Diosninchispa ñawpaqenpi rimarinchis qowananchispaq machulanchisman prometesqan suyuman haykumusqanchista, nispa.

⁴Chaymi sacerdoteqa canastata chaskispa, Apu Señor Diosniykichispa altarninpa ñawpaqenman churanqa.

⁵Qankunataq Señor Diospa ñawpaqenpi ninkichis: Machulanchisqa huk purikuq Aram miray runan karqan, paymi Egipto suyuman rirqan pisi runakunallapiwan. Hinaspan chaypi tiyarqan, askhataq mirarqan, chaymi huk hatun kallpayoq suyu kapurqan.

⁶Egipto runakunataq ichaqa sinchita muchuchiwarqanchis, sarunchawarqanchis, sinchi sasatataq llank'achiwarqanchis.

⁷Hinan machulanchiskunaq Señor Diosninta waqyakurqanchis, chaymi pay waqyakusqanchista uyariwarqanchis, rikurqantaq ñak'arisqanchista, llank'asqanchista, sarunchawasqanchistapas.

⁸Chaymi Señor Diosqa Egipto suyumanta horqomuwarqanchis hatun atiyninwan kallpanwan, hinallataq milagrokunata señalkunata ruwaspa chaypi tiyaq runakunata q'aqcharqan.

⁹Hinaspan kay suyuman pusamuwaspanchis, kay imaymanaq hunt'asqa wiñanan hallp'ata qowarqanchis.

¹⁰Chaymi Apu Señor Diosninchisman kunan apamunchis qowasqanchis hallp'aq ñawpaqkaq rurunta, nispa. Hinan Apu Señor Diosniykichispa ñawpaqenman canastaykichista churaykunkichis, qonqoriykukuspataq payta yupaychankichis.

¹¹Chaymantataq Apu Señor Diosniykichispa tukuy allinkunata qankunamanpas aylluykichismanpas qosqasuykichismanta q'ochukunkichis, hinallataq qankunawan kuska tiyaq Leví runakunapas, wak llaqtayoqkunapas q'ochukunqaku.

¹²Kinsakaq wataqa diezmo qonaykichis watan, chay watapin tukuy cosechaykichis rurumanta diezmota qonkichis Leví runakunaman, wak llaqtayoqkunaman, mana tayta-mamayoqkunaman, viudakunamanwan, chaymi paykunaqa llaqtaykichispi tukuy munasqankuta mikhunqaku. Diezmo qoyta tukuspaykichistaq,

¹³Apu Señor Diosniykichista ninkichis: Qanpaq diezmo t'aqasqaykuta wasiykumanta horqomuspayku, qopuykuñan Leví runakunaman, wak llaqtayoqkunaman, mana tayta-mamayoqkunaman, viudakunamanwan. Hunt'aykun tukuy kamachiwasqaykikuta, mana chhikanta qonqaspa mana p'akispa ima.

¹⁴Chay diezmomantaqa manan wañuchikuspayku mikhurqaykuchu, qhelli kashaspaykupas manan horqorqaykuchu, manallataq wañusqakunapaqpas haywarqaykuchu, aswanpas qantan kasurqaykiku, tukuy kamachiwasqaykikutataq hunt'arqaykupas.

¹⁵Hanaq pachapi kaq ch'uya wasiykimanta qhawarimuspayki Israel llaqtaykita saminchay, imaymanaq hunt'asqa wiñanan qowasqaykiku hallp'atapas, imaynan machulaykuman prometerqanki hinata, nispa.

¹⁶Apu Señor Diosniykichismi kunan kamachisunkichis tukuy chay kamachikuyninkunata unanchayninkunata ruwanaykichispaq, hunt'aychispuni tukuy sonqoykichiswan ch'ulla yuyaylla.

¹⁷Kunanmi qankuna rimarinkichis: Señor Diosmi Diosninchisqa, munayninta ruwasunchis, hunt'asunchistaq kamachikuyninta, unanchayninta, chaninchaynintawan, paytaqa kasukullasunpunin, nispa.

¹⁸Hinallataq Señor Diospas qankunamanta kunan rimarin: Qanmi, Israel, ñoqa kikiypa llaqtay kanki, prometesqayman hina, chhaynaqa tukuy kamachikuyniykunata hunt'anaykipaqmi kamachiyki.

¹⁹Ñoqan qanta llapa kamasqay suyukunamanta aswan hatunta ruwasqayki, hinan qan hawa wakin suyu runakuna yupaychawanqaku, hatunchawanqaku, qhapaqchawanqaku ima, qantaq ñoqapaq t'aqasqa llaqtay kanki, nispa, nispan.