Read Quechua Cuzco Bible 1988 DEUTERONOMIO 29 Bible Online

DEUTERONOMIO 29 - Quechua Cuzco Bible 1988 bible

DEUTERONOMIO 29

¹Horeb orqopin Israel runakunawan Señor Diosqa rimanakurqan, Moisestan kamachirqan Moab suyupi wakmanta paykunawan rimanakunanpaq.

²Chaymi Moisesqa llapa Israel runakunata huñuykuspa nirqan: — Qankuna kikiykichismi rikurqankichis Egipto suyupi imaynatachus rey Faraonta, oficialninkunata, llapan suyuntapas Señor Diospa ruwasqanta.

³Qankuna kikiykichismi rikurqankichis manchay musphaykunata, señalkunata, hatun milagrokunatawan.

⁴Chaywanpas Señor Diosqa manaraqmi sut'inta entiendenaykichista munarqanchu, manataq tukuy chaykuna imachus kasqanta yachanaykichistapas munarqanchu.

⁵Señor Diosmi nin: Tawa chunka watan ch'inneqninta pusamurqaykichis, manan p'achaykichispas usut'aykichispas thantakurqanchu.

⁶Manan t'antata mikhurqankichischu, manataq vinotapas cervezatapas ukyarqankichischu, ñoqa Apu Señor Diosniykichis kasqayta yachanaykichispaq, nispa.

⁷Kay cheqasman chayamuqtinchistaq, Hesbón llaqta rey Sehón, Basán suyu rey Ogpiwan sayarimurqanku ñoqanchis contra maqanakuq, ichaqa atiparqanchismi.

⁸Hinaspan hallp'ankuta qechuspa Rubén aylluman, Gad aylluman, Manasés kuskan ayllumanwan hap'ikapunankupaq qorqanchis.

⁹Chhaynaqa tukuy kay rimanakuy simikunata makilla hunt'aychis, tukuy ruwayniykichiskunapi allillan kanaykichispaq.

¹⁰Llapanchismi kunan Apu Señor Diosninchispa ñawpaqenpi kashanchis: ayllukuna, umallikuna, kurak runakuna, kamachikuqkuna, llapan Israel runakuna,

¹¹warmintin wawakunantinkama, hinallataq qankuna ukhupi tiyaq wak llaqtayoqkunapas, paykunan llant'a ch'eqtaqkuna unu aysaqkuna kanku.

¹²Llapaykichismi Señor Diospa ñawpaqenpi kashankichis Apu Señor Diosniykichisman juraspa rimanakunaykichispaq.

¹³Ahinapin qankunaqa Señor Diospa llaqtan kapunkichis, paytaq Diosniykichis kanqa, prometesqasuykichisman hina, machulaykichis Abrahamman, Isaacman, Jacobman jurasqanman hina.

¹⁴Manan qankunallawanchu Señor Diosqa juramentowan rimanakun,

¹⁵aswanpas imaynan ñoqanchiswan rimanakun ahinallataqmi mirayninchiswanpas kunan rimanakun.

¹⁶Qankunaqa allintan yachankichis imaynatachus Egipto suyupi kawsasqanchista, hinallataq imaynatachus wak suyukunaq chawpinta purimusqanchistapas.

¹⁷Purimusqanchispin rikurqankichis millay wak'a diosninkuta, qorimanta, k'ullumanta, rumimanta, qolqemanta ruwasqa idolokunatapas.

¹⁸Paqtataq qankuna ukhupi kanman qharipas, warmipas, familiapas, ayllupas Apu Señor Diosniykichista kunan qonqaspa chay suyukunaq diosninkunata yupaychaq. Chhayna kaspaykichisqa haya qora otaq wañuna qora hinachá kawaqchis.

¹⁹Paqtataq pipas kay juramentowan rimanakuy simikunata uyarishaspa hatunchakunman, hinaspa sonqonpi ninman: Ima munasqayta ruwaspa kawsasaq chaypas, allillanpunin kashasaq, nispa. Chay hina runaqa llapa llaqtaq wañunantan mink'an.

²⁰Señor Diosqa chay hina runataqa manan pampachanqachu, aswanpas phiñakuyninmi pay contra sinchita q'oñirinqa, hinan kay qelqapi qelqasqa llapan ñakaykuna payman chayanqa, paytataq ch'usaqyachipunqa manaña pipas yuyarinanpaq.

²¹Hinallataq Señor Diosqa llapan Israel ayllukunamanta payta t'aqanqa ñak'arichinanpaq, kay kamachikuy simi qelqapi qelqasqa kashaq rimanakuy llapan ñakaykunawanmi muchuchinqa.

²²Hamuq miraypi wawaykichiskuna, karu llaqtamanta hamuq wak llaqtayoqkunapas rikunqaku chay suyuman Señor Dios kachamunqa chay ñak'ariykunata onqoykunata ima.

²³Llapa suyun ruphasqa hina kanqa, azufrewan qollpawan p'ampasqa. Chay hallp'aqa purun-purunmi kanqa, manataq ch'ulla q'achupas wiñanqachu. Imaynan Sodoma llaqtata, Gomorra llaqtata, Adma llaqtata, Zeboim llaqtatawan k'arakta phiñakuspa Señor Dios purunyachirqan, chay hinatan hallp'aykichistapas purunyachinqa.

²⁴Llapan suyukunataq tapukunqakupuni: ¿Imanaqtintaq Señor Diosqa kay hallp'ata kay hinata ruwarqan? ¿Imanaqtintaq sinchi k'arakta phiñakurqan? nispa.

²⁵Hinan kutichinqaku: Machulankuq Señor Diosninmi Egipto suyumanta horqomuspan, paykunawan rimanakusqa, paykunataq ichaqa mana hunt'asqakuchu, aswanpas qonqapusqaku.

²⁶Mana reqsisqanku wak dioskunatataq servispa yupaychasqaku, chhayna ruwasqankuta Señor Diospas hark'ashaqtin.

²⁷Chayraykun Señor Diosqa kay suyu contra sinchita phiñakusqa, hinan kay qelqapi qelqasqa ñakaykunawan paykunata muchuchisqa.

²⁸Sinchi k'arakta phiñakuspataq kay suyumanta wikch'usqa wak suyukunaman. Chaypin kunankama kashallankupuni, nispa.

²⁹Wakin kaqkunata Apu Señor Diosninchisqa manan sut'inchawarqanchischu, aswanpas ch'inllan karqan, ichaqa ñoqanchisman sut'inchawarqanchis kamachikuyninta, ñoqanchispas mirayninchiskunapas wiñaypaq hunt'ananchispaq.