Read Quechua Cuzco Bible 1988 DEUTERONOMIO 30 Bible Online

DEUTERONOMIO 30 - Quechua Cuzco Bible 1988 bible

DEUTERONOMIO 30

¹Willarqaykichisñan saminchaykunamantapas ñakaykunamantapas, tukuy chaykuna taripasuqtiykichistaq Señor Dios ch'eqechisunkichis chay suyukunapi willasqayta yuyarinkichis.

²Chaypitaq qankunapas wawaykichiskunapas Señor Diosman kutirikunkichis, tukuy sonqo tukuy almataq payta kasunkichis kunan kamachiykichis chayman hina chayqa,

³Apu Señor Diosniykichismi wakmanta allinyachisunkichispas khuyapayasunkichispas, hinaspan ch'eqechisqasuykichis tukuy suyukunamanta huñumusunkichis.

⁴Kay pachapi sinchi karu llaqtakunamanña ch'eqechisqa kankichis chaypas, Apu Señor Diosniykichisqa maskhamusunkichismi, hinaspan wakmanta kutichimusunkichis.

⁵Machulaykichispa hap'ikapusqan suyuman wakmanta kutichimusunkichis, hinan qankuna chay suyuta hap'ikapunkichis, Señor Diostaq allinyachisunkichispas mirachisunkichispas machulaykichismantapas astawanraq.

⁶Apu Señor Diosniykichismi qankunamanpas mirayniykichismanpas kasukuq sonqota qosunkichis payta tukuy sonqo tukuy alma munakunaykichispaq, ahinapitaq kawsankichis.

⁷Paymi awqaykichista sarunchaqniykichistapas chay ñakaykunawan muchuchinqa.

⁸Qankunataq Señor Diosta wakmanta kasunkichis, kunan kamachisqayman hinataq tukuy kamachikuyninkunata hunt'ankichis.

⁹Apu Señor Diosniykichista kasuspa kay qelqapi qelqasqa kamachikuyninkunata unanchayninkunatapas hunt'ankichis, payman tukuy sonqo tukuy alma kutirikunkichis chayqa, Señor Diosmi tukuy ruwayniykichispi allinyachisunkichis, hinan askha wawayoq askha uywayoq kapunkichis, askhatataq cosechankichispas. Apu Señor Diosniykichisqa wakmantan anchata kusikunqa allinyachisqasuykichismanta, imaynan machulaykichista allinyachispa kusikurqan hinata.

¹¹Kay kamachikuy simiqa manan sinchi sasachu hunt'anaykichispaq, manataq karupipaschu kashan.

¹²Manan hanaq pachapichu kashan, chaychu niwaqchis: ¿Pitaq hanaq pachata wichapuwasun kamachikuy simita apamuspa willawaqtinchis hunt'ananchispaq? nispa.

¹³Manallataq mama qocha chimpapipaschu kashan, chaychu niwaqchis: ¿Pitaq mama qochata chimpapuwasun kamachikuy simita apamuspa willawaqtinchis hunt'ananchispaq? nispa.

¹⁴Manan chay hinachu, aswanpas Diospa siminqa sinchi qayllallaykichispin kashan, yuyayniykichispin simiykichispin kashan, chhaynaqa hunt'ayta atinkichismi.

¹⁵Willaykichisñan kawsaymantapas wañuymantapas, hinallataq allinmantapas mana allinmantapas, chhaynaqa qankuna akllakuychis.

¹⁶Kunan kamachisqayta kasunkichis, Apu Señor Diosniykichistapas munakunkichis, paypa munaynintataq ruwankichis, kamachikuyninkunata unanchayninkunata chaninchayninkunatapas kasunkichis chayqa, kawsankichismi, askha wawayoqtaq kankichis, Señor Diosniykichistaq saminchasunkichis hap'ikapunkichis chay suyupi.

¹⁷Qankunataq ichaqa mana uyariyta munaspa mana kasukunkichischu, aswanpas wak dioskunata servispa yupaychankichis chayqa,

¹⁸cheqaqtapuni niykichis wañunaykichista, manataq Jordán mayuta chimpaspa hap'ikapunkichis chay hallp'apipas unaytachu kawsankichis.

¹⁹Kunanmi hanaq pachatapas kay pachatapas chay nisqaykunamanta testigo kananpaq waqyani. Willaykichismi wañuymantapas kawsaymantapas, hinallataq saminchaymantapas ñakaymantapas, akllakuychisyari kawsayta, qankunapas mirayniykichispas kawsanaykichispaq.

²⁰Apu Señor Diosniykichista munakuychis, payta kasuychis, k'askakuychistaq, chay hinapin qankunapas mirayniykichispas unayta kawsankichis Apu Señor Diosniykichispa machulaykichis Abrahamman, Isaacman, Jacobman qonanpaq prometesqan suyupi, nispa.