Read Quechua Cuzco Bible 1988 DEUTERONOMIO 32 Bible Online

DEUTERONOMIO 32 - Quechua Cuzco Bible 1988 bible

DEUTERONOMIO 32

¹—Hanaq pacha, rimasqayta uyariy, kay pacha, simiykunata uyariy.

²Yachachikuyniyqa para hinan chayanqa, simiykunaqa sulla hinan kanqa, q'achupi iphu para hinan kanqa, pastopi unu sut'uy hinan kanqa.

³Señor Diospa sutintan hatunchasaq, ¡Diosninchisqa hatunmi! niychis.

⁴¡Hatun Qaqa hinan Señor Diosqa! hunt'asqan ruwasqankunaqa, chaninmi ruwasqankunaqa, hunt'aq Diosmi payqa, mana waqlliqmi payqa, chanintaq cheqaqtaqmi payqa.

⁵Qankunaqa waqllinkichismi, manan: Wawáy, ninapaq hinachu kankichis, q'otukuq millay runakunan kankichis.

⁶¿Chaywanchu Señor Diosta kutichinkichis, mana yuyayniyoq asno runakuna? Payqa taytaykichismi, kamaqniykichismi, paymi suyuman tukuchirqasunkichis.

⁷Ñawpa watakunata yuyariychis, ñawpa tiempokunata qhawariychis, taytaykichista tapukuychis willanasuykichispaq, kurak runakunata tapukuychis sut'inchanasuykichispaq.

⁸Qollana Dios llaqtakunaman herenciata qospan, runakunaman tiyanata rakispan, llaqtakunaq qorpanta sut'ita churarqan hayk'achus Diospa churinkuna kasqanman hina.

⁹Señor Diospa tupaqninqa llaqtanmi, chayaqenqa Jacobmi.

¹⁰Señor Diosmi llaqtanta tarirqan ch'inneqpi, wayraq waqtasqan ch'aki hallp'api, paykunata hark'aspa waqaycharqan, aswan munasqa wawanta hinan waqaycharqan.

¹¹Ankaqa qesanta t'aqpin chiwchinkunata phalayta yachachinanpaq, raphranta mast'arispataq chiwchinkunata chaskin, wichaymantaq hoqarin. Chay hinatan Señor Diosqa llaqtanta ruwan.

¹²Sapan Señor Diosllan llaqtanta pusarqan, manan wak dioskunaqa yanaparqanchu.

¹³Suyuq orqo-orqonkunata atipachirqan, campo rurukunata mikhuchirqan, qaqakunapi misk'ita tarirqanku, olivos sach'ankutaq rumi-rumipi wiñarqan.

¹⁴Wakankumanta lluklluta mikhurqanku, ovejankumanta lecheta ukyarqanku. Allinnin borregokunata, orqo cabrakunata mikhurqanku, Basanmanta wiray-wira anejokunata mikhurqanku, hinallataq granza trigotapas yawar-puka vinotapas ukyarqanku.

¹⁵Jesurunmi ichaqa wirayarqan, k'ulluchakurqantaq, sinchita wirayarqan llusk'ay-llusk'ata, Kamaqnin Diosta wikch'upurqan, hatun Qaqanta qespichiqninta pisicharqan.

¹⁶Diosta phiñachirqanku wak dioskunata yupaychaspa, millay ruwaykunawan qhellichakuspa.

¹⁷Supaykunamanmi sacrificiota haywarqanku, manataq Diosmanchu, aswanpas mana reqsisqanku dioskunaman. Chayllaraq rikhuriq mosoq dioskunaman, machulankuq mana hayk'aq yupaychasqan dioskunaman haywarqanku.

¹⁸Qankunaqa Hatun Qaqa Taytaykichistan qonqapurqankichis, paqarichiqniykichis Diostan saqepurqankichis.

¹⁹Chayta rikuspanmi Diosqa sinchita phiñakurqan, chaymi churinkunata ususinkunata pisicharqan,

²⁰nirqantaq: Paykunamanta pakakusaq, ¡imallatas ruwanqaku! Millay runakunan kanku, wasanchaq wawakunan kanku.

²¹Mana valeq dioswanmi renegachiwarqanku, idolonkuwanmi phiñachiwarqanku. Chaymi ñoqapas mana valeq llaqtawan paykunata renegachisaq, mana yuyayniyoq llaqtawan phiñachisaq.

²²Nina hinan phiñakuyniy rawrarinqa, rawranqataq Wañuy-pachakamaraq, ruphanqataq kay pachatapas rurunkunatapas, orqokunaq teqsintapas q'olaykunqa.

²³Tukuy mana allinkunawan paykunata muchuchisaq, tukuy wach'inaykunata paykunaman chanqasaq.

²⁴Yarqaymanta wañunqaku, ruphapakuywan millay onqoywan wañunqaku, salqa animalkunatan kachamusaq, venenoyoq mach'aqwaykunatan kachamusaq.

²⁵Callekunapin espadawan wawakuna wañunqa, wasikunapitaq llaksakuy q'aqchanqa, waynakuna sipaskuna wañunqa, yuyaqkuna ñuñuq wawakunapas wañunqa.

²⁶Ñoqaqa yuyaykurqani karuman ch'eqechiyta, sutinkuta kay pachapi ch'usaqyachiyta.

²⁷Manataqmi munarqanichu awqankuq asikunanta, manallataq umata hoqarispa: Manan Señor Dioschu chaytaqa ruwarqan, ñoqanchismi atiyninchiswan ruwanchis, nispa ninankutapas.

²⁸Israelqa yuyay chinkasqa llaqtan, manan yuyaynin kanchu.

²⁹Yachaysapa kaspaqa entiendenkumanmi, qhawarinkumanmi imaynachus tukukuyninku kananta.

³⁰¿Imaynan hukllamantaqa ayqenman waranqa? ¿Imaynataq iskayllaqa chunka waranqata atipanman? Hatun Qaqanmi hap'ichirqan, Señor Diosmi paykunata atipachirqan.

³¹Awqanchiskunaqa allintan yachanku hatun qaqankuqa mana Hatun Qaqanchis hinachu kasqanta.

³²Paykunaqa uvas sach'a hinan kanku, chay sach'aqa Sodoma uvas sach'a hinan, Gomorra chakramanta apamusqa. Uvasninkuqa venenoyoqmi, rurunkuqa sinchi p'osqon.

³³Vinonkupas mach'aqwaypa venenonmi, picaqpa wañuchiq venenonmi.

³⁴Tukuy kaykunatan pakashani, qhapaq-kayta hinan waqaychashani:

³⁵Ñoqan awqakunata vengakuqqa kani, ñoqan chaskinanta pagaqqa kani, urmananku p'unchaymi hamushanña, ch'usaqyananku p'unchaymi qayllamushanña, wañunanku p'unchaymi usqhamushanña.

³⁶Señor Diosmi llaqtanta chaninchanqa manaña kallpan kapusqanta rikuspa. Señor Diosmi serviqninkunata khuyapayanqa manaña pipas kallpayoq qhepasqanta rikuspa.

³⁷Señor Diosmi llaqtanta ninqa: ¿Maytaq diosniykichiskunari? ¿Maytaq pakakunaykichis qaqari?

³⁸¿Maytaq sacrificioykichispa wiranta mikhuqkunari? ¿Maytaq vino hich'ay ofrenda chaskiqkunari? ¡Hatarichunku yanapaqniykichiskuna! ¡Hamuchunku waqaychaqniykichiskuna!

³⁹Ñoqallan Diosqa kani, ñoqamanta wak dioskunaqa manan kanchu. Ñoqan kawsachini, wañuchinitaq, ñoqan k'irini, hampinitaq. Manan pipas atiyniymanta qespichinmanchu.

⁴⁰Wiñay kawsaq Dios kaspaymi makiyta haywarispa jurani:

⁴¹K'ancharishaq espadayta ariyachisaq, atiyniywan kuskachasaq, awqaykunata vengakusaq, cheqnikuwaqniykunaman chaskinankuta qosaq.

⁴²Wach'inaykunata yawarchasaq k'irisqakunaq presokunaq yawarninwan, espadaywanmi wañuchisaq chukchasapa awqaykunata, nispa.

⁴³Suyukuna, Señor Diospa llaqtanta hatunchaychis. Paymi vengakun serviqkunaq wañusqanmanta, paymi awqankunaman chaskinankuta qon, llaqtantapas hallp'antapas pampachanmi, nispa.

⁴⁴Moisesmi Nunpa churin Josuepiwan llapa Israel runakunaman qayllaykuspa chay takita llapallanta rimarqan.

⁴⁵

⁴⁶Chaymantataq paykunata nirqan: —Allinta yuyaykuychis tukuy chay yachachisqaykunata, hinaspa wawaykichista kamachiychis tukuy chay kamachikuyta makilla hunt'anankupaq.

⁴⁷Manan yanqa rimayllachu chay simikunaqa, aswanpas kawsay qoqniykichismi. Chayta kasuspaykichismi unayta kawsankichis Jordán mayu chimpapi hap'ikapunkichis chay suyupi, nispa.

⁴⁸Chay kikin p'unchaymi Señor Diosqa Moisesta nirqan:

⁴⁹—Jericó llaqtawan qhawanakuy Moab suyupi Abarim orqo-orqota riy, hinaspa Nebo orqoman wichaspa qhawarinki Israel runakunaman hap'ikapunankupaq qosaq chay Canaán suyuta.

⁵⁰Chay Nebo orqo patapin wañukapunki, hinaspa machulaykikunawan huñukapunki, imaynan wawqeyki Aaronpas Hor orqopi wañukapuspa machulankuwan huñukapurqan hinata.

⁵¹Zin nisqa ch'inneq Kades llaqta qaylla Meriba unupi iskayniykichis huchallikurqankichis, Israel runakunaq qayllanpin mana ch'uya kasqayman hinachu yupaychawarqankichis.

⁵²Chayrayku karullamanta qhawarinki Israel runakunaman qonay suyuta, manataq chay suyumanqa haykunkichu, nispa.