Read Quechua Cuzco Bible 1988 DEUTERONOMIO 33 Bible Online

DEUTERONOMIO 33 - Quechua Cuzco Bible 1988 bible

DEUTERONOMIO 33

¹Dios sonqo runa Moisesmi manaraq wañukapushaspa Israel runakunata samincharqan:

²—Señor Diosqa Sinaí orqomantan hamurqan, Seirmantapachan k'anchamurqan, Parán orqomantapachan illamurqan, waranqa-waranqa angelkunan paywan hamurqan, paña ladonpitaq atiyniyoqkuna hamurqan.

³Señor Diosqa llaqtanta munakunmi, paypaq t'aqasqakunataqa waqaychanmi, paykunaqa ñawpaqenpin k'umuykukunku, kamachikusqankunatataq kasunku.

⁴Ñoqa Moisesmi kamachikuykunata qorqani, herenciata hina Jacobpa mirayninpaq.

⁵Hinan Señor Diosqa Jesurunpi rey kapurqan, llaqta umallikuna huñukuqtin, Israel ayllukuna huñukuqtin, nispa.

⁶Rubenmanta nirqan: ¡Kawsachun Rubén! Ama tukukuchunchu, pisillaña wawankuna kaqtinpas, nispa.

⁷Judamanta nirqan: Señor Diosníy, Judapa waqyakusqanta uyariy, ayllu-masinkunawan huñuykuy, kikinmi atiyninwan tupakun, qantaq awqankuna contra yanapaykuy, nispa.

⁸Levimanta nirqan: Señor Diosníy, munayniyki watuna Tumimpas Urimpas qan sonqo runaykipaqmi, paytan Masahpi wateqarqani paytan Meriba unupi probarqani.

⁹Paymi tayta-mamanmanta nirqan: Manan hayk'aqpas rikurqanichu, nispa. Wawqenkunata mana reqsirqanchu, kikin wawankunatapas mana reqsirqanchu, simiykikunata kasusqanrayku, rimanakusqaykita hunt'asqanrayku.

¹⁰Paykunan Jacobman chaninchayniykikunata yachachinqa, Israel runakunamanpas kamachikuyniykikunata yachachinqa. Altarniykipin ruphachina sacrificiokunata haywanqa, ñawpaqeykipin inciensota q'osñichinqa.

¹¹Señor Diosníy, kallpanta yapaykuy, llank'asqanta munakuywan chaskiykuy, awqankunata t'ustuy, cheqnikuqninkunapas manaña astawan hatarimunankupaq, nispa.

¹²Benjaminmanta nirqan: Señor Diosmi payta munakun, chaywan mana ima llakiyoq kawsachun. Paymi p'unchay ch'isiyaq waqaychan, munakuyninwantaq p'istuykun, nispa.

¹³Josemanta nirqan: Señor Dios hallp'anta saminchachun, allinnin hanaq pacha qarpanwan, pachaq ukhunpi kashaq unuwan,

¹⁴intiq poqochisqan sumaq rurukunawan, sapa killa allinnin rurukunawan.

¹⁵Ñawpa orqonkuna allinta ruruchun, wiñay senqankuna sumaqta llanllachichun.

¹⁶Allinnin rurukunawan hallp'an hunt'aykusqa kachun, ch'aphrapi Rikhuriq chaykunata saminchachun. Tukuy chay saminchakuna Josepaq kachun, paymi wawqenkunaq qollanan kashan.

¹⁷Phiwi churinqa kallpasapa toro hinan, salqa toro hinan waqrasapa, llapa llaqtakunata waqraspa kay pacha cantonkamaraq wikch'un. Chhaynan Efrainpa waranqa-waranqa mirayninqa, chhaynan Manasespa waranqa mirayninqa, nispa.

¹⁸Zabulonmanta Isakarmantawan nirqan: Q'ochukuy, Zabulón, purinaykimanta, kusikuy, Isakar, karpaykikunamanta.

¹⁹Paykunan orqonkuman llaqtakunata waqyanqaku, chaypin chanin sacrificiokunata haywanqaku. Mama Qochapi askha kaqkunawan qhapaqyanqaku, aqo-aqopi pakasqa qhapaq-kayta hap'ikapunqaku, nispa.

²⁰Gadmanta nirqan: ¡Saminchasqa kachun Diosqa! Paymi hallp'anta hatunyachirqan. Gadqa león hinan thallaykuspa suyashan, llawq'aykuntaq makinmanta umanmantawan.

²¹Payqa allinnin hallp'atan akllakurqan, paypaqmi umallipaq t'aqasqa hallp'a hina karqan. Paymi llaqtakunata llallirqan Señor Diospa kamachisqanta hunt'aspa Israelwan Señor Diospa chaninchayninta ruwaspa, nispa.

²²Danmanta nirqan: Danqa leonpa uñanmi, Basanmantapacha saltamun, nispa.

²³Neftalimanta nirqan: Señor Diosqa Neftalita anchatan qhawarin, hinan askha saminchayninta usachin. Paymi qochata qochaq urantawan hap'ikapunqa, nispa.

²⁴Asermanta nirqan: Aserqa wawqenkunamanta aswan saminchasqan, wawqenkunaq ancha luylusqan kachun, olivos sach'ankunapas askhata ruruchun.

²⁵Punku wisq'anankunapas fierromanta broncemantawanmi, tukuy kawsasqan p'unchaykunan kallpallantin kanqa, nispa.

²⁶Jesurún, manan pipas Dios hina kanchu. Paymi hanaq pachapi qhapaqllaña purishan, yanapaqniykin phuyu patanta hamushan.

²⁷Wiñay kawsaq Diosmi pakakunayki, wiñay atiynintaq p'istuykusunki, awqaykita ñawpaqeykimanta wikch'un, kamachirqasunki: Paykunata wañuchiy, nispa.

²⁸Ahinapin Israelqa mana ima llakiyoq kawsanqa, Jacobqa sapaqpin tiyanqa, trigoqpas vinoqpas askhallaña kasqanpi, manataq hanaq pacha qarpapas pisinqachu.

²⁹Israel, kusisamiyoqmi kanki. ¿Pitaq qanman aypasunkiman? Kikin Señor Diosmi qespichirqasunki, paymi waqaychasunkipas yanapasunkipas, paymi llallinayki espadaqa. Awqaykikunaqa ñawpaqeykipin k'umuykukunqaku, qantaq paykunata sarunchakunki, nispa.